ភាពស្មុគស្មាញ បានលេចចេញពីបទសម្ភាសជាមួយនឹងមេដឹកនាំក្នុងវិស័យសារព័ត៌មានចំនួន២០រូបនៅទូទាំងទ្វីបអឺរ៉ុប ពាក់ព័ន្ធនឹងផលវិបាកដែលមាននៅជាប់រហូតពីវិបត្តិវីរុសកូរ៉ូណា ទៅលើវិស័យសារព័ត៌មានផ្សព្វផ្សាយសាធារណៈ។
នាយិកាផ្នែកព័ត៌មានប្រចាំសហភាពប្រព័ន្ធផ្សព្វផ្សាយអឺរ៉ុប (European Broadcasting Union) អ្នកស្រី Liz Corbin និយាយថា វិបត្តិជំងឺរាតត្បាតបានជួយពន្លឿននូវការផ្លាស់ប្តូរនានា ដែលកំពុងមានដំណើរការទៅមុខរួចស្រាប់ទៅហើយ។ អ្នកស្រីបានបន្តថា គំនិតយោបល់ផ្សេងៗត្រូវបានសម្រេចជាការពិតលឿនជាងការរំពឹងទុក បើធៀបនឹងសម័យកាលមុនការកើតមានជំងឺកូវីដ១៩។
អ្នកស្រីបាននិយាយថា៖ «ការរាតត្បាតជំងឺជាសាកលបានធ្វើឲ្យមនុស្សចង់បាននូវព័ត៌មានប្រកបដោយគុណភាពល្អ។ ទស្សនិកជនយ៉ាងច្រើនបានងាកទៅរកប្រព័ន្ធផ្សព្វផ្សាយសាធារណៈ។ ហើយនៅក្នុងសម័យកាលមានជំងឺរាតត្បាត ដែលការរីកសាយភាយនូវព័ត៌មានក្លែងក្លាយប្រហែលជាអ្វីតែមួយគត់ដែលមានល្បឿនលឿនដូចនឹងការរាតត្បាតជំងឺកូវីដ១៩ ក៏មានការច្នៃប្រឌិត និងការបង្កើតថ្មីក្នុងវិស័យព័ត៌មានផងដែរ»។
នៅដំណាក់កាលដំបូងនៃការរាតត្បាតជំងឺជាសាកល របាយការណ៍បានរកឃើញថា ជំនឿទុកចិត្តរបស់ពលរដ្ឋមកលើបណ្តាញផ្សព្វផ្សាយព័ត៌មានសាធារណៈ និងរដ្ឋាភិបាល គឺមានកម្រិតខ្ពស់។ អំឡុងពេលដូចគ្នានេះ របាយការណ៍និយាយថា រដ្ឋាភិបាលបានជួយជ្រោមជ្រែងទៅលើតួនាទីរបស់បណ្តាញផ្សព្វផ្សាយក្នុងការចែកចាយព័ត៌មានសំខាន់ៗ។ ប៉ុន្តែនៅពេលដែលទីភ្នាក់ងារព័ត៌មានចាប់ផ្តើមរិះគន់ការឆ្លើយតបរបស់រដ្ឋាភិបាលទៅលើវិបត្តិជំងឺកូវីដ១៩ ទំនាក់ទំនងរវាងស្ថាប័នទាំងពីរចាប់ផ្តើមមានភាពអាប់អួរ។
អ្នកស្រី Maike Olij សហនិពន្ធរបាយការណ៍ខាងលើ និយាយថា ការវាយប្រហារពីសំណាក់រដ្ឋាភិបាល និងអ្នកនយោបាយមួយចំនួនមកលើភាពជឿទុកចិត្តនៃប្រព័ន្ធផ្សព្វផ្សាយព័ត៌មានបាននាំឲ្យមានការធ្លាក់ចុះជំនឿទុកចិត្តរបស់សាធារណជនមកលើបណ្តាញផ្សព្វផ្សាយ។ អ្នកស្រីបានបន្តថា ការគំរាមកំហែងមកលើសេរីភាពបណ្តាញផ្សព្វផ្សាយ និងការវាយប្រហារមកលើបណ្តាញផ្សព្វផ្សាយសាធារណៈក៏បានកើនឡើងផងដែរ។
អ្នកស្រីបានថ្លែងថា៖ «មានការលើកឡើងអំពីការឃុបឃិតគ្នាច្រើនក្រែលដែរ ហើយនៅពេលនេះ ពិតណាស់ មានការចោទប្រកាន់មកលើបណ្តាញផ្សព្វផ្សាយសាធារណៈ ឬប្រព័ន្ធផ្សព្វផ្សាយក្នុងទម្រង់ផ្សេងពីនេះ។ ហើយនៅពេលដែលភាពអសន្តិសុខ និងការរាតត្បាតជំងឺអូសបន្លាយកាន់តែយូរ មនុស្សកាន់តែមានមន្ទិលសង្ស័យ និងភ័យខ្លាច។ ពួកគេចាប់ផ្តើមមានមន្ទិលមកលើមតិជាផ្លូវការ និងបណ្តាញផ្សព្វផ្សាយព័ត៌មានសាធារណៈផងដែរ»។
ការជំរុញឲ្យមានការវិវិត្តប្រសើរឡើងជាងមុន គឺមិនមានភាពងាយស្រួលនោះទេ។ ប៉ុន្តែ របាយការណ៍បានលើកឡើងនូវការណែនាំមួយចំនួន។ របាយការណ៍បានសរសេរថា បណ្តាញផ្សព្វផ្សាយសាធារណៈគួរតែផ្តល់នូវព័ត៌មានគួរឱ្យជឿទុកចិត្តបាន ហើយវិស័យសារព័ត៌មានតាមប្រព័ន្ធអ៊ីនធឺណិតគួរសម្រិតសម្រាំងការរាយការណ៍របស់ខ្លួនទៅតាមតម្រូវការរបស់ទស្សនិកជន។
របាយការណ៍បានបន្តថា ការដោះស្រាយបញ្ហាព័ត៌មានក្លែងក្លាយ និងការផ្តោតមកលើនិន្នាការដែលគេមិនសូវចាប់អារម្មណ៍នៅក្នុងសង្គមគឺ មានសារៈសំខាន់នៅអំឡុងពេលដែលមានការបែងចែករវាងសាធារណៈមតិ។ របាយការណ៍ក៏បានសង្កត់ធ្ងន់ពីសារៈសំខាន់នៃវិស័យព័ត៌មានបែបរិះគន់ សូម្បីតែនៅពេលចែករំលែកសារផ្លូវការក៏ដោយ៕
ប្រែសម្រួលដោយលោក ណឹម សុភ័ក្ត្របញ្ញា
