លោកនាយករដ្ឋមន្រ្តី ហ៊ុន សែន បានសរសេរលិខិតទៅកាន់ប្រធានាធិបតីសហរដ្ឋអាមេរិក លោក ដូណាល់ ត្រាំ ដោយលោកថា រដ្ឋាភិបាលកម្ពុជាត្រៀមបង្កើតក្រុមការងារដើម្បីស្តារទំនុកចិត្ត និងភាពជឿជាក់រវាងកម្ពុជានិងអាមេរិកឡើងវិញ។
លិខិតរបស់លោក ហ៊ុន សែន ជាការឆ្លើយតបទៅនឹងលិខិតរបស់លោកប្រធានាធិបតីសហរដ្ឋអាមេរិក ដូណាល់ ត្រាំ ដែលបានចុះនៅថ្ងៃទី១ ខែវិច្ឆិកានេះ ដោយបញ្ជាក់អំពីបំណងពង្រឹងចំណងមិត្តភាពរវាងប្រទេសទាំងពីរ ដែលកំពុងមានភាពរកាំរកូសជាច្រើនឆ្នាំ។ លោក ត្រាំ បានបញ្ជាក់ថា សហរដ្ឋអាមេរិកគោរពអធិបតេយ្យភាពរបស់កម្ពុជា និងមិនទាមទារឲ្យមានការផ្លាស់ប្តូររបបនោះទេ ប៉ុន្តែលោកត្រាំបានប្រាប់ឲ្យលោកនាយករដ្ឋមន្រ្តី ហ៊ុន សែន ដាក់ប្រទេសកម្ពុជាលើមាគ៌ាអភិបាលកិច្ចប្រជាធិបតេយ្យឡើងវិញ។
ក្នុងលិខិតមានចុះហត្ថលេខារបស់លោកនាយករដ្ឋមន្ត្រី ហ៊ុន សែន នៅថ្ងៃទី២៦ ខែវិច្ឆិកា ឆ្នាំ២០១៩ នេះ លោក ហ៊ុន សែន បញ្ជាក់ថា លោកយល់ស្របជាមួយលោកប្រធានាធិបតី ដូណាល់ ត្រាំ ដែលលើកឡើងថា ទំនាក់ទំនងកម្ពុជា-អាមេរិក បានឆ្លងកាត់ដំណាក់កាលតឹងតែង និងធូរស្រាលមកវិញជាបន្តបន្ទាប់។ លោកនាយករដ្ឋមន្ត្រីបន្ថែមថា លោកនឹងឲ្យក្រុមការងារកិច្ចការបរទេសរបស់កម្ពុជា ធ្វើការជាមួយក្រុមការងារកិច្ចការបរទេសរបស់សហរដ្ឋអាមេរិក ដើម្បីស្តារទំនុកចិត្ត និងភាពជឿជាក់ឡើងវិញ និងកសាងឡើងវិញនូវចំណងមិត្តភាពរវាងប្រទេស និងប្រជាជននៃប្រទេសទាំងពីរ។
លោកសរសេរតាមន័យដើមថា៖ «ខ្ញុំយល់ថា យើងមិនត្រូវឲ្យខ្លួនយើងក្លាយជាចំណាប់ខ្មាំងនៃទំព័រខ្មៅងងឹតនៃប្រវត្តិសាស្រ្តរបស់យើងនោះទេ។ មានដំណាក់កាលដ៏ស្រស់បំព្រងជាច្រើនទៀត ដែលមានសារប្រយោជន៍ក្នុងការបំពាក់បំប៉នពូនជ្រុំសម្រាប់ធ្វើឲ្យទំនាក់ទំនងរវាងប្រទេស និងប្រជាជនយើងទាំងពីរ កាន់តែមានការរីកលូតលាស់ថែមទៀត»។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីប្រាប់ VOA ថា ក្រុមការងារកិច្ចការបរទេសដែលកំពុងត្រៀមនេះ នឹងដឹកនាំដោយក្រសួងការបរទេសកម្ពុជា ដើម្បីជជែកលើសពីទំនាក់ទំនងរវាងស្ថានទូតប្រចាំប្រទេស។ យ៉ាងណាក្តីលោកមិនទាន់អាចបញ្ជាក់ពីពេលវេលានៃការចាប់ផ្តើម និងចំណុចដែលនឹងត្រូវជជែកនៅឡើយទេ។
ទំនាក់ទំនងរវាងសហរដ្ឋអាមេរិកនិងកម្ពុជាត្រូវបានគេមើលឃើញថា មានការធ្លាក់ចុះយ៉ាងខ្លាំង ជាពិសេសមុនការបោះឆ្នោតជាតិខែកក្កដាឆ្នាំ២០១៨ ក្រោយរដ្ឋាភិបាលកម្ពុជាផ្តើមការបង្ក្រាបលើអង្គការសង្គមស៊ីវិល ស្ថាប័នព័ត៌មានឯករាជ្យ ក្រុមជំទាស់ និងអ្នករិះគន់រដ្ឋាភិបាល។
ក្នុងពេលនោះ ក្រុមអ្នកគាំទ្រគណបក្សប្រជាជនកម្ពុជារបស់លោក ហ៊ុន សែន បានបង្កើនវោហាសាស្រ្តវាយប្រហារសហរដ្ឋអាមេរិក ជាបន្តបន្ទាប់ និងតែងលើកឡើងថា សហរដ្ឋអាមេរិកនៅពីក្រោយគណបក្សប្រឆាំងក្នុងការរៀបចំផែនការផ្តួលរំលំរដ្ឋាភិបាលកម្ពុជាជាដើម។
អ្នកនាំពាក្យស្ថានទូតអាមេរិកប្រចាំកម្ពុជា អ្នកស្រី Emily Zeeberg ប្រាប់ VOA ថា៖ «យើង [សហរដ្ឋអាមេរិក] ទន្ទឹងរង់ចាំបន្តការពិភាក្សារបស់យើងជាមួយរដ្ឋាភិបាលកម្ពុជា លើការគាំទ្ររបស់សហរដ្ឋអាមេរិកចំពោះប្រជាជនកម្ពុជា ក៏ដូចជាជំហានចាំបាច់នានាដើម្បីបើកលំហនយោបាយ និងពលរដ្ឋសម្រាប់ប្រជាជនកម្ពុជាទាំងអស់ ដែលនឹងពង្រឹងទំនាក់ទំនងទ្វេភាគីរបស់យើង និងធ្វើឱ្យមានការរីកចម្រើនពិតប្រាកដ»។
លោក អ៊ា សុផល សាស្ត្រាចារ្យផ្នែកការទូត និងកិច្ចការអន្តរជាតិនៅមហាវិទ្យាល័យ Occidental ទីក្រុង Los Angeles រដ្ឋ California សហរដ្ឋអាមេរិក និយាយថា លិខិតរបស់លោកប្រធានាធិបតីសហរដ្ឋអាមេរិក ដូណាល់ ត្រាំ គឺចង់ឲ្យលោក ហ៊ុន សែន ទទួលស្គាល់ពីបញ្ហាដែលកើតមាននៅកម្ពុជា ហើយដោះស្រាយដើម្បីអាចពង្រឹងទំនាក់ទំនងរវាងកម្ពុជា និងអាមេរិកឡើងវិញ។ លោកបន្ថែមថា លោកមិនមានសុទិដ្ឋិនិយមថារដ្ឋាភិបាលកម្ពុជានឹងដោះស្រាយបញ្ហាទាំងនោះបានទេ។
លោកបញ្ជាក់ថា៖ «លិខិតនេះកំពុងព្យាយាមនិយាយយោងទៅរកចំណុចទាក់ទងការផ្លាស់ប្តូររបប ខណៈនិយាយពីលទ្ធិប្រជាធិបតេយ្យពហុបក្ស។ ជាក់ស្តែងរដ្ឋាភិបាលក្រុងភ្នំពេញមិនគិតថា អ្វីដែលបានកើតឡើងនៅកម្ពុជា គឺជាការបំផ្លិចបំផ្លាញលទ្ធិប្រជាធិបតេយ្យនោះទេ។ ទាំងនោះជាអ្វីដែលលិខិតរបស់លោក ត្រាំ ចង់សំដៅទៅលើ។ ជំហានដំបូងដើម្បីធ្វើឲ្យប្រសើរឡើងបាន គឺទទួលស្គាល់ថាមានបញ្ហា។ តែលិខិតរបស់លោក ហ៊ុន សែន មិនបាននិយាយពីរឿងនេះទេ»។
ក្រោយការបោះឆ្នោតថ្នាក់ជាតិដោយមិនមានគណបក្សសង្គ្រោះជាតិ សហរដ្ឋអាមេរិកប្រកាសមិនទទួលស្គាល់លទ្ធផលបោះឆ្នោត និងបានព្រមានចាត់វិធានការដោយការបង្កកទ្រព្យសម្បត្តិ និងដាក់ទណ្ឌកម្មទិដ្ឋាការដល់មន្ត្រីកម្ពុជាមួយចំនួន ដែលពាក់ព័ន្ធនឹងការរំលោភសិទ្ធិមនុស្ស។
ការព្រមានរបស់សហរដ្ឋអាមេរិកធ្វើឡើងបន្ទាប់ពីតុលាការកំពូលបានរំលាយគណបក្សសង្គ្រោះជាតិ និងហាមឃាត់មន្ត្រីជាន់ខ្ពស់គណបក្សនេះចំនួន១១៨រូប មិនឲ្យធ្វើនយោបាយរយៈពេល៥ឆ្នាំ។ ចំណែកការបង្ក្រាបលើសង្គមស៊ីវិល ការរឹតត្បិតលើសារព័ត៌មានឯករាជ្យ ព្រមទាំងការរឹតត្បិតក្រុមសំឡេងប្រឆាំងក៏ជាផ្នែកមួយដែលធ្វើឲ្យមានការព្រមានដាក់ទណ្ឌកម្ម និងរិះគន់ផងដែរ៕
