នៅព្រឹកថ្ងៃចន្ទនេះលោកនាយករដ្ឋមន្ត្រី ហ៊ុន សែន បានសារទរចំពោះកិច្ចចរចាដ៏មានប្រសិទ្ធភាពរវាងប្រទេសកូរ៉េទាំងពីរ ដែលឈានដល់ដំណើរការនៃការបញ្ចប់កម្មវិធីអាវុធនុយក្លេអ៊ែរដ៏រ៉ាំរ៉ៃរបស់កូរ៉េខាងជើង។ លោកក៏នឹងរង់ចាំមើលជំនួបរបស់ប្រធានាធិបតីអាមេរិកលោក Donald Trump (ដូណាល់ ត្រាំ) និងមេដឹកនាំកូរ៉េខាងជើងលោកKim Jon Un (គីម ជុងអ៊ុន) នៅសិង្ហបុរីនាខែខាងមុខផងដែរ។
ថ្លែងទៅកាន់អ្នកចូលរួមក្នុងកម្មវិធីសម្ពោធឱ្យប្រើប្រាស់អាគារក្នុងមន្ទីរពេទ្យកុមារជាតិក្នុងក្រុងភ្នំពេញដែលជាជំនួយរបស់កូរ៉េខាងត្បូង លោក ហ៊ុន សែន បញ្ជាក់ក្នុងន័យដើមថា៖
«ប៉ុន្មានអាទិត្យមុននេះ មានជំនួបដ៏ល្អជាប្រវត្តិសាស្ត្ររវាងប្រធានាធិបតី Moon Jae-in របស់កូរ៉េខាងត្បូងជាមួយនឹងមេដឹកនាំកូរ៉េខាងជើង គីម ជុងអ៊ុន ដែលនេះគឺជាការអំណរសាទររបស់ប្រជាជនកម្ពុជារំពឹងថា សភាពការណ៍នៅឧបទ្វីបកូរ៉េនឹងទទួលបានការរីកចម្រើនបន្តទៅទៀត»។
ការលើកឡើងរបស់នាយករដ្ឋមន្ត្រីខ្មែរ ធ្វើឡើងមិនប៉ុន្មានសប្តាហ៍ក្រោយពីជំនួបដ៏ជោគជ័យមួយរវាងថ្នាក់ដឹកនាំនៃប្រទេសកូរ៉េទាំងពីរគឺលោក Moon Jae-in ប្រធានាធិបតីកូរ៉េខាងត្បូង និងប្រធានាធិបតីកូរ៉េខាងជើងលោក គីម ជុងអ៊ុន។
ក្នុងជំនួបដ៏គួរឱ្យសារទរមួយកាលពីចុងខែមេសាកន្លងទៅ កូរ៉េទំាងពីរបានយល់ព្រមបញ្ចប់ជម្លោះនៅឧបទ្វីបកូរ៉េដែលអូសបន្លាយជាង៤ទសវត្សរ៍។ ជាមួយនឹងជោគជ័យនៃជំនួបរបស់កូរ៉េទាំងពីរ ក៏មានការដោះលែងអ្នកទោសអាមេរិកដើមកំណើតកូរ៉េបីរូបដែលរដ្ឋាភិបាលលោក គីម ជុងអ៊ុន បានចាប់ឃុំខ្លួន។
នៅឯជំនួបលើកទី១ ក្នុងរយៈពេលជាង១០ឆ្នាំចុងក្រោយនេះ ប្រធានាធិបតីកូរ៉េខាងជើងលោក គីម ជុងអ៊ុន ក៏បានយល់ព្រមបោះបង់ចោលកម្មវិធី និងផ្អាកការសាកល្បងអាវុធនុយក្លេអ៊ែររបស់ខ្លួនផងដែរ។
យ៉ាងណាក៏ដោយ នៅក្នុងជំនួបមួយកាលពីថ្ងៃសុក្រ រដ្ឋមន្ត្រីការបរទេសរបស់សហរដ្ឋអាមេរិក និងកូរ៉េខាងត្បូងបានឯកភាពថា ការបំបាត់កម្មវិធីអាវុធរបស់កូរ៉េខាងជើងត្រូវទាមទារឱ្យមានការបញ្ជាក់ឱ្យបានច្បាស់ពីកូរ៉េខាងជើងជាមុនសិន មុននឹងឈានដល់ការដកទណ្ឌកម្មនានាប្រឆំាងនឹងរដ្ឋាភិបាលក្រុងព្យុងយ៉ាង។
ក្នុងសន្និសីទរួមគ្នាមួយជាមួយរដ្ឋមន្ត្រីការបរទេសកូរ៉េខាងត្បូងលោកស្រី Kang Kyung-wha នៅរដ្ឋធានីវ៉ាស៊ីនតោន លោក Mike Pompeo រដ្ឋមន្ត្រីការបរទេសសហរដ្ឋអាមេរិកបានមានប្រសាសន៍ថា៖
«សហរដ្ឋអាមេរិកនិងសាធារណរដ្ឋកូរ៉េប្តេជ្ញាធ្វើឲ្យបានសម្រេចនូវការលុបបំបាត់អាវុធនុយក្លេអ៊ែរជាអចិន្ត្រៃយ៍ ដែលអាចបញ្ជាក់បាននិងមិនអាចកើតឡើងវិញសារជាថ្មីលើឧបទ្វីបកូរ៉េ»។
លោកប្រធានាធិបតីសហរដ្ឋអាមេរិក ដូណាល់ ត្រាំ និងប្រធានាធិបតីកូរ៉េខាងជើងលោក គីម ជុងអ៊ុន គ្រោងនឹងណាត់ជួបគ្នាជាលើកទី១នៅថ្ងៃទី១២ខែមិថុនាខាងមុខនៅក្នុងប្រទេសសិង្ហបុរី។
លោកនាយករដ្ឋមន្ត្រី ហ៊ុន សែន នៃកម្ពុជាបញ្ជាក់នៅថ្ងៃចន្ទនេះថា លោកទន្ទឹងរង់ចាំមើលកិច្ចជំនួបនោះមកដល់ និងរង់ចាំមើលលទ្ធផលថ្មីៗបន្ថែមទៀត។
«ហើយយើងក៏កំពុងរងចាំមើលជំនួបជាប្រវត្តិសាស្ត្រ ដែលនឹងអាចកើតមានរវាងប្រធានាធិបតីសហរដ្ឋអាមេរិកជាមួយនឹងមេដឹកនាំកូរ៉េខាងជើងដែលបច្ចុប្បន្ននេះហាក់ដូចជាត្រូវបានរៀបចំរួចជាស្រេចហើយនៅប្រទេសសិង្ហបុរី»។
ការលើកឡើងដូច្នោះរបស់លោក ហ៊ុន សែន ធ្វើឡើងបន្ទាប់ពីលោកបញ្ជាក់ពីជំហរកម្ពុជា ក្នុងការរក្សាចំណងការទូតរវាងប្រទេសកូរ៉េទាំងពីរ និងកម្ពុជា ឱ្យមានតុល្យភាព។
បន្ទាប់ពីសាទរដល់ដំណើរជាវិជ្ជមានដើម្បីឈានដល់បញ្ចប់ជម្លោះនៅឧបទ្វីបកូរ៉េ លោក ហ៊ុន សែន ក៏បានថ្លែងប្រាប់ឯកអគ្គរដ្ឋទូតកូរ៉េខាងត្បូងដែលចូលរួមក្នុងកម្មវិធីនៅព្រឹកថ្ងៃចន្ទនេះ ឱ្យជួយផ្តល់ជំនួញបន្ថែមទៀតដល់កម្ពុជាដើម្បីឱ្យមានតុល្យភាពដូចសមមិត្តចិននិងប្រទេសជប៉ុន៕
