វាជាយប់សម្រាប់កីឡាបូលីងនៅក្នុងទីក្រុង Holms រដ្ឋ Pennsylvania ដែលស្ថិតនៅចម្ងាយប្រហែល៣០នាទីខាងក្រៅទីក្រុង Philadelphia ដែលជាអតីតរដ្ឋធានីរបស់សហរដ្ឋអាមេរិក កីឡាបូលីងបានចាប់ផ្តើម ហើយសុន្ទរកថាដោយប្រធានាធិបតីត្រាំទៅកាន់សភា ហើយប្រជាពលរដ្ឋអាមេរិកាំងក៏ចាប់ផ្តើមដែរ។ «ប្រទេសទាំងអស់នៅលើពិភពលោក មិត្តភក្តិ ឬគូសត្រូវ នឹងដឹងថា ប្រទេសអាមេរិកខ្លាំង អាមេរិកមានមោទនភាព ហើយអាមេរិកមានសេរីភាព»។
ក៏ប៉ុន្តែ ដូចជាពួកមន្រ្តីជាប់ឆ្នោតផ្សេងទៀតដែរ ប្រជាពលរដ្ឋអាមេរិកមានការបែកបាក់គ្នាពីខ្លឹមសារសុន្ទរកថារបស់លោកប្រធានាធិបតី។ លោក Bryan Gallagher ជាអ្នកគាំទ្រប្រធានាធិបតីត្រាំបាននិយាយថា៖ «ដើម្បីនាំប្រាក់ និងការងារមកប្រទេសអាមេរិកវិញ មនុស្សគ្រប់គ្នា នៅទីបញ្ចប់និយាយអំពីសេដ្ឋកិច្ចនិងកម្មករអាមេរិកាំង។ តើមានអ្វីខុសអំពីបញ្ហានេះ?»។ លោក Pete Harwan ជាអ្នកគាំទ្រលោកស្រីគ្លីនតុន។ «តើប្រធានាធិបតីត្រាំ នឹងស្ថាបនាហេដ្ឋារចនាសម្ព័ន្ធយ៉ាងដូចម្តេចទៅនៅពេលដែលលោកកាត់បន្ថយពន្ធដារនោះ?។ដើម្បីស្ថាបនាហេដ្ឋារចនាសម្ព័ន្ធ លោកប្រធានាធិបតី ចាំបាច់បង្កើនពន្ធដារពួកអ្នកមាន។ នេះជារបៀបដែលលោកអ្នក ត្រូវស្ថាបនាហេដ្ឋារចនាសម្ព័ន្ធសម្រាប់ប្រទេសនេះ»។
នៅម្ខាងទៀតនៃប្រទេសនៅក្នុងទីក្រុង Las Vegas ភាគខាងលិចក្នុងរដ្ឋ Nevada នៅ ឯពិធីជប់លៀងមួយដែលរៀបចំដោយជនជាតិចិន អាមេរិកាំងសម្រាប់លោកត្រាំ បញ្ហានៅតែមានអំពីទស្សនៈរបស់ប្រធានាធិបតីសម្រាប់ប្រទេសអាមេរិក។ លោក Chris Villasenor ជាអ្នកគាំទ្រប្រធានាធិបតីត្រាំ និយាយថា៖ «មកទល់ពេលនេះ ការសន្ទនាជាការល្អពិតប្រាកដ។មិនទាន់ធ្វើអ្វីនៅឡើយទេ។ បញ្ហាទាំងអស់ស្ថិតនៅលើតុ ក៏ប៉ុន្តែ ពួកគេកំពុងចាប់ផ្តើមដោយនិយាយថា សូមរង់ចាំ។ ខ្ញុំចង់ធ្វើកិច្ចការនោះ។ សូមចាំមើល តើមានអ្វីនឹងកើតឡើង»។
នៅក្នុងរដ្ឋតិចសាស លោក Jeff Olsen ជាអ្នកអប់រំ និងអតីតយុទ្ធជននិយាយថា លោកចូលចិត្តអ្វីដែលឮពីប្រធានាធិបតីត្រាំ។
«ខ្ញុំមានអារម្មណ៍គ្រាន់បើខ្លាំងណាស់ក្រោយពីឮសុន្ទរកថានេះកាលពី៥សប្តាហ៍មុន។ យើងទាំងអស់គ្នាជាជនជាតិអាមេរិកាំង។ យើងទាំងអស់គ្នាចង់ឃើញអ្វីដែលល្អបំផុតសម្រាប់ប្រទេសអាមេរិក ក៏ប៉ុន្តែ ខ្ញុំគិតថា មានសំឡេងប្រកបដោយការបង្រួបបង្រួមកាន់តែខ្លាំងឡើងនៅក្នុងអ្វីដែលលោកបាននិយាយកាលពីរសៀល»។
លោក John នៅក្នុងរដ្ឋ Iowa និយាយថា លោកមិនមែនជាអ្នកគាំទ្រលោកត្រាំទេ ប៉ុន្តែ លោកកំពុងសង្ឃឹមថា នឹងមានរឿងល្អកើតឡើង។
«ខ្ញុំមិនមែនជាអ្នកសាធារណរដ្ឋទេ។ ខ្ញុំមិនមែនជាអ្នកគាំទ្រលោកត្រាំទេ ក៏ប៉ុន្តែ លោក អ្នក ត្រូវតែផ្តល់ឱកាសឲ្យលោក។ លោកបានឈ្នះឆ្នោត ហើយយើងមិនអាចធ្វើអ្វីបានទេ ក្រៅពីគាំទ្រលោកហើយសង្ឃឹមថា លោកធ្វើកិច្ចការដ៏អស្ចារ្យ»។
ក៏ប៉ុន្តែ ត្រឡប់ទៅកាន់រដ្ឋធានីវ៉ាស៊ីនតោនវិញ ពួកបាតុករបានប្រមូលផ្តុំគ្នានៅក្រោមដំណក់ទឹកភ្លៀងដើម្បីតវ៉ាប្រឆាំងប្រធានាធិបតី។ មនុស្សដូចជាលោក Sheldon Cohen មានជំងឺមហារីកដែលត្រូវបានចាត់ទុកថាបានទទួលការធានាពីច្បាប់ថែទាំសុខភាពរបស់អតីតប្រធានាធិបតីបារ៉ាក់ អូបាម៉ាដែលឥឡូវនេះ កំពុងស្ថិតនៅក្រោមរិះគន់ពីប្រធានាធិបតីដូណាល់ ត្រាំ។
«ខ្ញុំផ្តល់ពិន្ទុខ្ពស់ដល់លោកជាប្រធានខាងចាត់ចែងកម្មវិធីកម្សាន្ត ហើយនិងជាប្រធានាធិបតីធ្វើឲ្យមានការចលាចល។ ខ្ញុំផ្តល់ពិន្ទុធ្លាក់ដល់លោកលើការដឹកនាំហើយនិងខាងបង្រួបបង្រួមប្រទេស»។
ប្រធានាធិបតីទី៤៥របស់អាមេរិក ទើបតែកាន់តំណែងជាង១ខែតែប៉ុណ្ណោះ។ លោកបានបង្កើតទាំងមិត្តភក្តិ និងសត្រូវ ខណៈដែលប៉ុនប៉ងធ្វើទៅតាមការសន្យាក្នុងយុទ្ធនា ការឃោសនាបោះឆ្នោតរបស់លោក។ ថាតើលោកធ្វើបានប៉ុន្មានអាស្រ័យទៅលើពួកសមាជិកសភានៅក្នុងបន្ទប់នេះ ហើយនិងពួកអ្នកបោះឆ្នោតនៅទូទាំងប្រទេសដែលបានបោះឆ្នោតជ្រើសរើសពួកគេឲ្យមកកាន់សភាសហរដ្ឋអាមេរិក៕
ប្រែសម្រួលដោយ ជឹង ប៉ូជីន
