ប្រធានាធិបតីសហរដ្ឋអាមេរិកលោក ដូណាល់ ត្រាំ បានថ្លែងថាលោកបានចុះហត្ថលេខាលើសំណើថវិកាចំណាយ១,៣លានលានដុល្លារឲ្យក្លាយជាច្បាប់ កាលពីថ្ងៃសុក្រ។
ការចុះហត្ថលេខានេះត្រូវបានធ្វើឡើង បើទោះបីជាមានការគំរាមប្រឆាំងលើសំណើនេះដោយសារតែសំណើនេះមិនបានចែងគ្រប់គ្រាន់អំពីការការពារដល់ជនអន្តោប្រវេសន៍គ្មានក្រដាសស្មាមដែលបានចូលមកក្នុងសហរដ្ឋអាមេរិកតាំងពីពេលវ័យក្មេង និងដោយសារតែសំណើនេះមិនបានផ្តល់ថវិកាគ្រប់គ្រាន់ដល់គម្រោងសង់ជញ្ជាំងតាមព្រំដែនរបស់លោកយ៉ាងណាក៏ដោយ។
លោក ត្រាំ បានថ្លែងថា៖ «ខ្ញុំនឹងមិនយល់ព្រមចុះហត្ថលេខាលើសំណើព្រៀងច្បាប់ដូចនេះម្តងទៀតឡើយ»។ លោក ត្រាំ បានចុះហត្ថលេខាលើសំណើថវិកា ដែលបានបញ្ចៀសកុំឲ្យបិទទ្វាររដ្ឋាភិបាលសហព័ន្ធកាលពីយប់ថ្ងៃសុក្រ។
សេតវិមានបានរៀបចំធ្វើសន្និសីទកាសែតយ៉ាងប្រញាប់ប្រញាល់ ដោយលោកប្រធានាធិបតីខាងគណបក្សសាធារណរដ្ឋរូបនេះបានស្តីបន្ទោសគណបក្សប្រជាធិបតេយ្យថាខ្វះការការពារសម្រាប់ពួកអន្តោប្រវេសន៍ដែលបានចូលក្នុងសហរដ្ឋអាមេរិកក្រោមកម្មវិធី DACA។ លោក ត្រាំ បានថ្លែងថា៖ «យើងចង់បញ្ជូលកម្មវិធី DACA ទៅក្នុងសេចក្តីព្រៀងច្បាប់នេះ។ ប៉ុន្តែគណបក្សប្រជាធិបតេយ្យមិនចង់ធ្វើវា»។
លោក ត្រាំ បានស្នើទៅសភាឲ្យបន្ថែមឃ្លាថាមិនយល់ព្រម នៅលើសំណើថវិកាចំណាយរបស់រដ្ឋាភិបាលទាំងអស់នៅថ្ងៃអានាគត៕
