ព្រះអង្គម្ចាស់រជ្ជទាយាទអារ៉ាប៊ីសាអូឌីត ព្រះនាម Mohammed bin Salman នឹងធ្វើព្រះរាជទស្សនកិច្ចនៅក្នុងរដ្ឋធានីវ៉ាស៊ីនតោននៅសប្តាហ៍នេះ នៅស្របពេលដែលការប្រកួតប្រជែងរវាងប្រទេសអារ៉ាសាអូឌីតនិងអ៊ីរ៉ង់កំពុងឡើងកម្តៅ។
ការយាងមកសហរដ្ឋអាមេរិករបស់ព្រះអង្គម្ចាស់ Mohammed bin Salman គឺដើម្បីបង្ហាញពីទស្សនៈវិស័យថ្មីមួយរបស់ប្រទេសអារ៉ាប៊ីសាអូឌីត ហើយលោកប្រធានាធិបតី Donald Trump ប្រហែលជានឹងស្តាប់ទស្សនៈវិស័យរបស់ព្រះអង្គនៅក្នុងជំនួបនៅថ្ងៃអង្គារនេះ។
លោក Trump បានបង្ហាញពីជំហរគាំទ្រពួកនីកាយ Sunni នៅក្នុងការប្រជែងជាមួយនឹងពួកនីកាយ Shi'ite របស់អ៊ីរ៉ង់។
ព្រះអង្គម្ចាស់រជ្ជទាយាទដែលត្រូវបានស្គាល់ថាព្រះអង្គម្ចាស់ MBS ហាក់ដូចជាចង់ទាញយកប្រយោជន៍ពីដំណើរទស្សនកិច្ចនេះ។
នៅក្នុងបទសម្ភាសន៍ជាមួយទូរទស្សន៍ CBS ព្រះអង្គម្ចាស់រូបនេះបានប្រៀបធៀបមេដឹកនាំអ៊ីរ៉ង់ទៅនឹងមេដឹកនាំផ្តាច់ការហ៊ីត្លែរ ហើយព្រះអង្គមានព្រះបន្ទូលថា ប្រសិនបើអ៊ីរ៉ង់មានអាវុធនុយក្លេអ៊ែរ នោះអារ៉ាប៊ីសាអូឌីតនឹងផលិតអាវុធនុយក្លេអ៊ែរដែរ។
ព្រះអង្គម្ចាស់បានមានព្រះបន្ទូលថា «អារ៉ាប៊ីសាអូឌីតមិនចង់បានអាវុធនុយក្លេអ៊ែរទេ ប៉ុន្តែប្រសិនអ៊ីរ៉ង់ផលិតអាវុធនេះបាន យើងនឹងធ្វើតាមដែរក្នុងពេលឆាប់ៗនេះ»។
ការលើកឡើងបែបនេះរបស់ព្រះអង្គកំពុងដាក់សម្ពាធលើលោកប្រធានាធិបតី Trump នៅមុនថ្ងៃកំណត់នៃកិច្ចព្រមព្រៀងនុយក្លេអ៊ែររបស់អ៊ីរ៉ង់នៅខែឧសភាខាងមុខនេះ។ លោក Fashed Nazer អ្នកសរសេរអត្ថបទវិភាគឲ្យកាសែតអារ៉ាប់ បាននិយាយថា៖ «ពួកគេមិនសូវជឿជាក់លើកិច្ចព្រមព្រៀងនុយក្លេអ៊ែរជាមួយអ៊ីរ៉ង់ ប៉ុន្តែប្រសិនបើអ៊ីរ៉ង់ធានាថា ខ្លួនមិនផលិតអាវុធនុយក្លេអ៊ែរទេនោះ ពួកគេនឹងគាំទ្រ»៕
