ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

គណបក្ស​នយោបាយ និង​គ.ជ.ប. បន្ត​ខ្វែង​គំនិត​គ្នា​លើ​ការកែប្រែ​នីតិវិធី​សម្រាប់​ការបោះឆ្នោត​ឃុំ​សង្កាត់


រូបឯកសារ៖ អ្នក​បោះ​ឆ្នោត ​ត្រូវ​បាន​នាំ​ឱ្យ​ជ្រ​លក់​ម្រាម​ដៃ​ចង្អុល ក្រោយ​ពី​បាន​បោះ​ឆ្នោត​ក្នុង​ការិយាល័យ​បោះ​ឆ្នោត​មួយ នៅ​ខណ្ឌ​សែន​សុខ រាជធានី​ភ្នំពេញ កាលពី​ថ្ងៃ​ទី២៩ ខែ​កក្កដា ឆ្នាំ​២០១៨។ (ទី អូលីស្សា/វីអូអេ)
រូបឯកសារ៖ អ្នក​បោះ​ឆ្នោត ​ត្រូវ​បាន​នាំ​ឱ្យ​ជ្រ​លក់​ម្រាម​ដៃ​ចង្អុល ក្រោយ​ពី​បាន​បោះ​ឆ្នោត​ក្នុង​ការិយាល័យ​បោះ​ឆ្នោត​មួយ នៅ​ខណ្ឌ​សែន​សុខ រាជធានី​ភ្នំពេញ កាលពី​ថ្ងៃ​ទី២៩ ខែ​កក្កដា ឆ្នាំ​២០១៨។ (ទី អូលីស្សា/វីអូអេ)

គណ​បក្ស​នយោបាយ​មួយ​ចំនួន ​និង​គណៈ​កម្មាធិការ​ជាតិ​រៀបចំ​ការ​បោះឆ្នោត​(គ.ជ.ប)​ បន្ត​ខ្វែង​គំនិត​គ្នា​លើ​ការ​លុប​ចោល ​និង​កែ​ប្រែ​នីតិវិធី​មួយ​ចំនួន​សម្រាប់​ការ​បោះ​ឆ្នោត​ឃុំ​សង្កាត់​ឆ្នាំ​២០២២​ខាង​មុខ​នេះ ​ ដោយ​គណបក្ស​ទាមទារ​ឲ្យ​ស្ថាប័ន​រៀបចំ​ការ​បោះ​ឆ្នោត​រក្សា​នីតិវិធី​ដូច​ឆ្នាំ​២០១៧ ​ដើម្បី​ធានា​ឲ្យ​មាន​តម្លាភាព ​និង​ទំនុក​ចិត្ត។​

កាល​ពី​ថ្ងៃ​ទី​៧ ​ខែ​មករា ​គ.ជ.ប.​ បាន​អនុម័ត​លើ​បទ​បញ្ជា​ និង​នីតិវិធី​សម្រាប់​ការ​បោះ​ឆ្នោត​ជ្រើស​រើស​ក្រុម​ប្រឹក្សា​ឃុំ​សង្កាត់ ​ដែល​នឹង​ប្រព្រឹត្ត​ទៅ​នៅ​ថ្ងៃ​ទី​៥​ ខែ​មិថុនា​ ឆ្នាំ​២០២២។ ​ការ​កែ​ប្រែ​នីតិវិធី​នេះ​ ក៏​រង​ការ​រិះគន់​ពី​គណបក្ស​នយោបាយ​មួយ​ចំនួន ​និង​អ្នក​ធ្វើ​ការ​លើ​ការ​បោះឆ្នោត​ផង​ដែរ។​

ភាព​មិន​ទាន់​យល់​ស្រប​គ្នា​នេះ ​គឺ​នៅ​ត្រង់​ចំណុច​មួយ​ចំនួន​ ដែល​ទី​មួយ​ គឺ​ការ​រក្សា​ព័ត៌មាន​អំពី​តួលេខ​នៃ​ចំនួន​សន្លឹក​ឆ្នោត​ដែល​បាន​ទទួល ​សន្លឹក​ឆ្នោត​ដែល​មិន​បាន​ប្រើ ​សន្លឹក​ឆ្នោត​ខូចនៅ​ក្នុង​ទម្រង់​កំណត់​ហេតុ​នៃ​ការ​រាប់​សន្លឹក​ឆ្នោត​ និង​ទីពីរ ​គឺ​ការ​ចែក​ជូន​កំណត់​ហេតុ​នៃ​ការ​រាប់​សន្លឹក​ឆ្នោត​ឲ្យ​ទៅ​គណបក្ស​នយោបាយ​ដែល​មាន​វត្តមាន​ គឺ​ដូច​ការ​បោះ​ឆ្នោត​មុនៗ។​

គណបក្ស​ចំនួន​៣ រួម​មាន​គណបក្ស​ប្រជា​ធិបតេយ្យ​មូលដ្ឋាន ​គណបក្ស​កម្ពុជា​និយម ​និង​គណបក្ស​កែ​ទម្រង់​កម្ពុជា ​បាន​ចេញ​ញត្តិ​រួម​គ្នា​មួយ​ ចុះ​ថ្ងៃ​ទី​១១ ​ខែ​មករា ដោយ​ទាមទារ​ឲ្យ​ស្ថាប័ន ​គ.ជ.ប. ​រក្សា​ទុក​នូវ​ចំណុច​ទាំង​ពីរ​ខាង​លើ​នេះ ​ដើម្បី​ធានា​ឱ្យ​ការ​បោះ​ឆ្នោត​ប្រព្រឹត្ត​ទៅ​ដោយ​សេរី ​ត្រឹមត្រូវ​ និង​យុត្តិធម៌​ ដោយ​មាន​ការ​ទុក​ចិត្ត​ពី​គណបក្ស​នយោបាយ ​និង​អ្នក​បោះ​ឆ្នោត។ ​នេះ​ បើ​តាម​ញត្តិ​ដែល​វីអូអេ​ទទួល​បាន។​

គណបក្ស​ទាំង​នោះ​ក៏​ទាមទារ​ឲ្យ​គ.ជ.ប.​ រក្សា​នូវ​ការ​កត់​ត្រា​ទិន្នន័យ​នៃ​ចំនួន​សន្លឹក​ឆ្នោត​ខូច ​ចំនួន​សន្លឹក​ឆ្នោត​ដែល​ទទួល​បាន​ជាក់​ស្តែង​ ចំនួន​សន្លឹក​ឆ្នោត​ដែល​មិន​បាន​ប្រើ​ ចំនួន​សន្លឹក​ឆ្នោត​ដែល​មាន​ក្នុង​ហិប​ឆ្នោត ​ឲ្យ​នៅ​ដដែល​ ដូចការ​បោះឆ្នោតអាណត្តិ​មុន​ ដែល​មាន​នៅ​ក្នុង​ចំណុច​ទីពីរ​ស្តីពី​លទ្ធផល​នៃ​ការ​ផ្ទៀង​ផ្ទាត់​ចំនួន​សន្លឹក​ឆ្នោត​តាម​ការិយាល័យ​បោះ​ឆ្នោត​ និង​រាប់​សន្លឹក​ឆ្នោត ​ដែល​មាន​ចែង​នៅ​ក្នុង​កំណត់​ហេតុ​នៃ​ការ​រាប់​សន្លឹក​ឆ្នោត ​(ទម្រង់​១១០២)​ ដែល​ជា​កំណត់​ហេតុ​ត្រូវ​ចែក​ជូន​គណបក្ស​នយោបាយ​ដែល​មាន​វត្តមាន​ ហើយ​បិទ​ផ្សាយ​នៅ​តាម​ការិយាល័យ​រាប់​សន្លឹក​ឆ្នោត​ និង​នៅ​ទីស្នាក់​ការ​គណៈ​កម្មការ​ឃុំ​សង្កាត់​រៀបចំ​ការ​បោះ​ឆ្នោត ​រហូត​ដល់​ថ្ងៃ​ប្រកាស​លទ្ធផល​ផ្លូវ​ការ។​

លោក ​ឡឹក សុធារ ​អ្នក​នាំពាក្យ​គណបក្ស​ប្រជា​ធិបតេយ្យ​មូលដ្ឋាន ​លើក​ឡើង​ថា​ គណបក្ស​នៅ​តែ​ទាមទារ​ឲ្យ​គ.ជ.ប.​ រក្សា​ទិន្នន័យ​ក្នុង​ទម្រង់​កំណត់​ហេតុ​នៃ​ការ​រាប់​សន្លឹក​ឆ្នោត ​(ទម្រង់១១០២)​ ឲ្យ​នៅ​ដដែល ​ហើយ​គណៈ​កម្មការ​ការិយាល័យ​រាប់​សន្លឹក​ឆ្នោត ​ត្រូវ​តែ​ចម្លង​កំណត់​ហេតុ​នៃ​ការ​រាប់​សន្លឹក​ឆ្នោត​ឲ្យ​គណបក្ស​នយោបាយ​ដែល​មាន​វត្តមាន​ ដោយ​មាន​ត្រា​បញ្ជាក់​ឲ្យ​ត្រឹម​ត្រូវ​នៅ​តាម​ការិយាល័យ​បោះ​ឆ្នោត ​ដើម្បី​ឲ្យ​មាន​ការ​ទុក​ចិត្ត​ពី​គណបក្ស​នយោបាយ​ និង​អ្នក​បោះ​ឆ្នោត។​

លោក​បន្ត​ថា​ ការ​បោះ​ឆ្នោត​កន្លង​ទៅ ​លទ្ធ​ផល​ដែល​បិទ​ផ្សាយ​នៅ​មុខ​ការិយាល័យ​បោះ​ឆ្នោត​មាន​ការ​ហែក​ចោល​ភ្លាម​ ហើយ​បើ​សិន​ជា​ថត​តាម​ទូរ​ស័ព្ទ នោះ​ទិន្នន័យ​នឹង​ពិបាក​យក​ធ្វើ​ជា​ទិន្នន័យ​ផ្លូវការ​ក្នុង​ការ​តវ៉ា​ណា​មួយ​ នៅ​ពេល​មាន​ភាព​មិន​ប្រក្រតី​កើត​ឡើង។​

លោក​ថ្លែង​ថា៖​ «នៅ​ពេល​ដែល​យើង​ថត​ទៅ​ស្រាប់​តែ​អ្វី​ដែល​គេ​ upload​ [បញ្ចូល​ទិន្នន័យ]​ចេញ​មក​ខុស​គ្នា ​តើ​ទិន្នន័យ​មួយ​ណា​ជា​ទិន្នន័យ​ផ្លូវ​ការ​ដែល​យើង​យក​ទៅ​ជជែក​គ្នា?​ ស្រួល​មិន​ស្រួល​ គេ​ចោទ​ប្រកាន់​ថា​ យើង​ហ្នឹង​ទៅ​កែ​ទិន្នន័យ​ ទៅ​ក្លែង​ឯកសារ​សាធារណៈ នាំ​មាន​រឿង​មាន​រ៉ាវ​ដល់​ពួក​យើង​ទៀត។ ​អ៊ីចឹង​ដើម្បី​ធានា​បាន​តម្លា​ភាព​គ.ជ.ប. ​ត្រូវ​តែ​បង្ហាញ​នូវ​ភាព​កណ្តាល​ ភាព​យុត្តិធម៌​ ហើយ​ទិន្នន័យ​ទាំង​អស់​ហ្នឹង​ ត្រូវ​តែ​ប្រគល់​ឲ្យ​គណបក្ស​នយោបាយ​ ដូច​ការ​អ្វី​ដែល​បាន​[ធ្វើ]​ ដូច​បោះ​ឆ្នោត​មុនៗ​អ៊ីចឹង»។​

លោក ឡឹក សុធារ​ នៅ​តែ​មិន​ពេញ​ចិត្ត​ទៅ​លើ​ការ​កែ​ប្រែ​នីតិ​វិធី​មួយ​ចំនួន​របស់​គ.ជ.ប.​ ដោយ​បាន​លើក​ឡើង​ថា៖​ «ធ្វើ​ប្រហែល​គ.ជ.ប.​ លើក​មុន​ផង​ នៅ​តែ​មាន​ការ​ជជែក​គ្នា​ នៅតែ​មាន​ការ​បកស្រាយ​ផ្សេងៗ​គ្នា​ពី​រឿង​លទ្ធផល​នៃ​ការ​បោះ​ឆ្នោត។​ចុះ​ទម្រាំ​តែ​លុប​[នីតិវីធី​មួយ​ចំនួន]​ទៀត ​តើ​ភាព​សង្ស័យ​វា​ខ្លាំង​ប៉ុនណា? ​ភាព​ខ្វែង​គំនិត​គ្នា​លើ​លទ្ធ​ផល​កាន់​តែ​ធំ​ប៉ុនណា?»​

កាល​ពី​ចុង​ខែ​ធ្នូ ​ឆ្នាំ​២០២១ ​គណបក្ស​នយោបាយ ​ក៏​ធ្លាប់​ចេញ​សេចក្តី​ថ្លែង​ការណ៍​មួយ​ ដោយ​ទាមទារ​ឲ្យ​គ.ជ.ប. ​រក្សា​ទុក​ប្រការ​មួយ​ចំនួន​នោះ ​ក្នុង​គោល​បំណង​ដើម្បី​បង្ហាញ​អំពី​ការ​ព្យាយាម​ធានា​ឲ្យ​ការ​បោះ​ឆ្នោត​ប្រព្រឹត្ត​ទៅ​ដោយ​សេរី​ ត្រឹមត្រូវ​ និង​យុត្តិ​ធម៌​ ស្រប​ពេល​គោល​ការណ៍​ប្រជា​ធិបតេយ្យ​សេរី​ពហុ​បក្ស​ ទទួល​បាន​ការ​ទុក​ចិត្ត​ពី​សំណាក់​គណបក្ស​នយោបាយ​ និង​អ្នក​បោះឆ្នោត​ និង​បញ្ចៀស​ការ​ជាប់​គាំង​នយោបាយ។​

លោក ​សោម សូរីដា អគ្គ​លេខា​ធិការ​រង​នៃ​គណៈ​កម្មាធិការ​ជាតិ​រៀបចំ​ការ​បោះ​ឆ្នោត​ បាន​ការពារ​ថា​ ការ​កែប្រែ​នីតិ​វិធី​នេះ ​គឺ​ដើម្បី​ធានា​ប្រសិទ្ធ​ភាព​ការ​ងារ​តែ​ប៉ុណ្ណោះ។ ​ លោក​បន្ថែមថា​ នីតិវិធី​សម្រាប់​ការ​បោះ​ឆ្នោត​ឃុំ​សង្កាត់​នេះ ​គឺ​មាន​ការ​កែប្រែ​នូវ​ការ​ទទួល​យក​លទ្ធផល​នៃ​ការ​រាប់​សន្លឹក​ឆ្នោត​តែ​ប៉ុណ្ណោះ ​ដែល​កាល​ពី​អាណត្តិ​មុនគណបក្ស​នយោបាយ​នីមួយៗ​ទៅ​យក​នៅ​តាម​ការិយាល័យ​បោះ​ឆ្នោត ​ប៉ុន្តែ ​អាណត្តិ​នេះ ​គឺ​យក​នៅ​គណៈ​កម្មការ​រៀបចំ​ការ​បោះ​ឆ្នោត​ ឃុំ​សង្កាត់​ក្នុង​ថ្ងៃ​តែ​មួយ​ជំនួស​វិញ។​លោក​បញ្ជាក់​ថា​ ការ​បិទ​លទ្ធផល​នៃ​ការ​រាប់​សន្លឹក​ឆ្នោត​តាម​មុខ​ការិយាល័យ ​និង​ការ​ប្តឹង​តវ៉ា​ គឺ​ធ្វើ​ទៅ​តាម​នីតិវិធី​ច្បាប់​ដដែល ​ដូច​ការ​បោះ​ឆ្នោត​លើក​មុនៗ។​

លោក ​កន សាវាង្ស ​អ្នក​សម្រប​សម្រួល​ផ្នែក​អង្កេត ​និង​តស៊ូ​មតិ​នៃ​អង្គការ​ខុមហ្វ្រែល​ដែល​ឃ្លាំ​មើល​ការ​បោះ​ឆ្នោត​ ប្រាប់​វីអូអេ​ថា​ គ.ជ.ប.​ គួរ​តែ​រក្សា​ទុក​ដូច​នីតិ​វិធី​សម្រាប់​ការ​បោះ​ឆ្នោត​ឃុំ​សង្កាត់​ក្នុង​ឆ្នាំ​២០១៧ ​ដើម្បី​ឲ្យ​គ្រប់​ភាគី​ពាក់​ព័ន្ធ​ទទួល​យក​បាន។​ ហើយ​អ្វី​ដែល​សំខាន់​ គ.ជ.ប. ​ត្រូវ​តែ​ពង្រឹង​សមត្ថ​ភាព​ និង​ការ​ទទួល​ខុស​ត្រូវ​របស់​មន្ត្រី​នៅ​តាម​ការិយាល័យ​ឲ្យ​បាន​ល្អ​ជាង​មុន។​

លោក​ថ្លែង​ថា៖ ​«គ.ជ.ប. ​គួរ​ពិចារណា​រក្សា​នៅ​ដដែល ​ហើយ​ខំប្រឹង​ពង្រឹង​វិញ។ ខ្ញុំ​មើល​ទៅ​ប្រហែល​ជា​ការ​ព្រួយ​បារម្ភ​របស់​គ.ជ.ប.​នូវ​ក្នុង​ការ​លើក​ឡើង​របស់​គណបក្ស​នយោបាយ​ ទាក់​ទង​ការ​ខុស​ឆ្គង​នូវ​ការ​ចម្លង​លទ្ធផល​ទេ។ ​ប៉ុន្តែ​ករណី​នេះ ​ខ្ញុំ​ថា​ គួរ​តែ​ពង្រឹង​សមត្ថ​ភាព​មន្ត្រី​ការិយាល័យ​បោះ​ឆ្នោត​ហ្នឹង។​ ពង្រឹង​គាត់​ឲ្យ​មាន​ការ​យក​ចិត្ត​ទុក​ដាក់។​ វា​ជា​រឿង​មួយ​ដែល​ប្រសើរ​ណាស់»។​

លោក​បន្ត​ថា​ មន្ត្រី​ការិយាល័យ​បោះ​ឆ្នោត​ ជា​អ្នក​ទទួល​បន្ទុក​ និង​ជា​អ្នក​ទទួល​ខុស​ត្រូវ​ចំពោះ​លទ្ធផល​នៃ​ការ​រាប់​សន្លឹក​ឆ្នោត។ ​គណៈ​កម្មការ​ឃុំ​សង្កាត់ ​មិន​មែន​ជា​អ្នក​ទទួល​ខុស​ត្រូវ​នោះ​ទេ។​ ដូច្នេះ​ ការ​ចែក​លទ្ធផល​នៃ​ការ​រាប់​សន្លឹក​ឆ្នោត​តាម​ការិយាល័យ​បោះ​ឆ្នោត ​គឺ​ដើម្បី​ផ្តល់​ទំនុក​ចិត្ត​ដល់​ភាគី​គណបក្ស​ដែល​បាន​ចូលរួម​ និង​សង្កេត​ដោយ​ផ្ទាល់​នៅ​ទីតាំង​បោះ​ឆ្នោត។​

លោក​បញ្ជាក់​ថា៖​ «ការ​យក​ទៅ​ដល់​ឃុំ​នោះ ​ វា​ដូច​គ្នា​យ៉ាង​ណា​ក៏​ដោយ​ ប៉ុន្តែ​ វា​ មិន​ដូច​ជា​ការ​ប្រគល់ ​ការ​រៀបចំ​ ការ​វាយ​ត្រា​នៅ​ការិយាល័យ​ទេ ​ពីព្រោះ​ ការ​វាយ​ត្រា​នៅ​ការិយាល័យ​ វា ​ឆ្លុះ​បញ្ចាំង​អំពី​ការ​ចូលរួម​របស់​គណបក្ស​នយោបាយ​ហ្នឹង»។​

លោក​បន្ថែម​ថា​ ស្ថាប័ន​រៀបចំ​ការ​បោះឆ្នោត ​គ.ជ.ប. ​ត្រូវ​តែ​ពិនិត្យ​ និង​ជជែក​ឲ្យ​យល់​ស្រប​គ្នា​ទៅ​លើ​លក្ខ​ខណ្ឌ​នានា​ជា​មួយ​គណបក្ស​នយោបាយ​ដែល​បាន​ចូល​រួម​ប្រកួត​ការ​បោះ​ឆ្នោត ​មុន​នឹង​អនុម័ត​ ឬ​សម្រេច​នីតិវិធី​សម្រាប់​ការ​បោះ​ឆ្នោត​ណា​មួយ៕

XS
SM
MD
LG