ភ្ជាប់​ទៅ​គេហទំព័រ​ទាក់ទង

កុមារី​អាយុ​៨​ឆ្នាំ​ម្នាក់​ត្រូវ​បាន​សម្លាប់ ​ខណៈ​ដែល​រថយន្ត​បើក​សំដៅ​ទៅ​ហាង​ភីហ្សា​មួយ​នៅ​បារាំង


ប៉ូលិស​បារាំង​ការពារ​នៅ​ជិត​កន្លែង​កើត​ហេតុ​ដែល​ឡាន​មួយ​គ្រឿង​បាន​បើក​ចូល​ហាង​ភីហ្សា សម្លាប់​ក្មេង​ស្រីម្នាក់​នៅ​ក្រុង Sept-Sorts កាល​ពី​ថ្ងៃទី​១៤ សីហា។

ប៉ូលិស​បារាំង​ថ្លែង​ថា កុមារី​អាយុ​៨​ឆ្នាំ​ម្នាក់​ត្រូវ​បាន​សម្លាប់ ហើយ​មនុស្ស​យ៉ាង​ហោច​ណាស់​៥​នាក់​ទៀត​រងរបួស​ នៅ​ពេល​ដែល​អ្នក​បើកបរ​រថយន្ត​ម្នាក់​បាន​បើក​រថយន្ត​របស់​ខ្លួន​ទៅ​រក​ផ្លូវ​ដើរ​មួយ​នៃ​ហាង​លក់​ភីហ្សា​មួយ​កន្លែង​នៅ​ក្នុង​ក្រុង​តូច​មួយ ដែល​ស្ថិត​នៅ​ប៉ែក​ខាង​កើត​ទីក្រុង ប៉ារីស។

មន្ត្រី​ម្នាក់​នៃ​កងល្បាត​ជាតិ​បាន​និយាយ​ថា អ្នក​បើកបរ​រថយន្ត​នោះ​ត្រូវ​បាន​ចាប់​ខ្លួន​ភ្លាមៗ បន្ទាប់​ពី​ហេតុការណ៍​កាល​ពី​យប់​ថ្ងៃ​ចន្ទ នៅ​ក្នុង​ក្រុង​ Sept-Sorts។ ​

មន្ត្រី​រូប​នោះ​ ​និយាយ​ថា ខ្លួន​នៅ​មិន​ទាន់​ច្បាស់​នៅ​ឡើយ​ទេ ថា​សកម្មភាព​នេះ​គឺ​ជា​ចេតនា​ឬ​យ៉ាង​ណា។ ​មន្ត្រី​រូប​នោះ​មិន​ត្រូវ​បាន​អនុញ្ញាត​ឲ្យ​បញ្ចេញ​ឈ្មោះ​ជា​សាធារណៈ​នោះ​ទេ។ នេះ​បើ​យោង​តាម​គោលការណ៍​របស់​ប៉ូលិស។

បុរស​ជនជាតិ​អាល់ហ្សេរី​ម្នាក់​បាន​បើក​រថយន្ត​របស់​ខ្លួន​ទៅ​បុក​ទាហាន​បារាំង​មួយ​ក្រុម​កាល​ពី​សប្តាហ៍​មុន ហើយ​ការ​វាយ​ប្រហារ​ដោយ​រថយន្ត​ធុន​ធំ​មួយ​គ្រឿង​ក្នុង​ទីក្រុង នីស​ នៃ​ប្រទេស​បារាំង បាន​សម្លាប់​មនុស្ស​អស់​ចំនួន ៨៦ នាក់ កាល​ពី​ជាង​មួយ​ឆ្នាំ​មុន។ គេ​ឃើញ​មាន​ ការប្រើប្រាស់​រថយន្ត​ធ្វើ​ជា​អាវុធ​ដើម្បី​វាយប្រហារ​នៅ​ក្នុង​ប្រទេស​ផ្សេង​ទៀត​ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ៕​

XS
SM
MD
LG