ភ្ជាប់​ទៅ​គេហទំព័រ​ទាក់ទង

អាជ្ញាធរ​បារាំង​បាន​កំណត់​អត្តសញ្ញាណ​អ្នក​វាយ​ប្រហារ​ប៉ូលិស​នៅ​វិហារ​គ្រិស្ត​សាសនា Notre Dame


លោក Gerard Collomb រដ្ឋ​មន្ត្រី​ក្រសួង​មហាផ្ទៃ​បារាំង​ថ្លែង​ទៅ​កាន់​សារព័ត៌មាន​បន្ទាប់​ពី​បុរស​ម្នាក់​បាន​វាយប្រហារ​លើ​ប៉ូលិស​នៅ​ព្រះ​វិហារ Notre Dame ក្នុង​ក្រុង​ប៉ារីស ប្រទេស​បារាំង កាលពី​ថ្ងៃទី៦ ខែមិថុនា ឆ្នាំ២០១៧។

អ្នក​នាំ​ពាក្យ​រដ្ឋាភិបាល​បារាំង​បាន​និយាយ​នៅ​ថ្ងៃ​ពុធ​នេះ​ថា បុរស​ដែល​ប្រើ​ញញួរ​វាយ​ប្រហារ​មន្ត្រី​ប៉ូលិស​នៅ​ឯ​វិហារ​គ្រិស្ត​សាសនា Notre Dame នៅ​ក្នុង​ទីក្រុង​ប៉ារីស កាល​ពី​ថ្ងៃ​អង្គារ​ម្សិលមិញ គឺ​ជា​និស្សិត​ដែល​កំពុង​សរសេរ​និក្ខេបបទ​ថ្នាក់​បណ្ឌិត​របស់​ខ្លួន ហើយ​កន្លង​មក មិន​ដែល​ជាប់​សង្ស័យ​ថា​មាន​ទស្សនៈ​ជ្រុល​និយម​ហួសហេតុ​នោះ​ទេ។

លោក Christopher Castaner ដែល​ជា​អ្នក​នាំ​ពាក្យ​រដ្ឋាភិបាល​បារាំង បាន​និយាយ​នៅ​ក្នុង​បទ​សម្ភាសន៍​មួយ​ជាមួយ​នឹង​វិទ្យុ RTL ថា ប៉ូលិស​ចាត់ទុក​ការ​វាយ​ប្រហារ​នោះ ថា​ជា​សកម្មភាព​ភេរវកម្ម ដោយសារ​តែ​នេះ​ជា​អ្វី​ដែល​បុរស​វាយ​ប្រហារ​នោះ​បាន​លើក​ឡើង។

លោក Gerard Collomb រដ្ឋ​មន្ត្រី​ក្រសួង​មហាផ្ទៃ​បារាំង បាន​និយាយ​កាល​ពី​ថ្ងៃ​អង្គារ​ម្សិលមិញ បន្ទាប់ពី​មាន​ការ​វាយ​ប្រហារ​នេះ ថា បុរស​នោះ​បាន​ស្រែក​ថា ខ្លួន​ធ្វើ​ដូច្នេះ «គឺ​ដើម្បី​ប្រទេស​ស៊ីរី‍»។ លោក Gerard Collomb ក៏​បាន​ប្រាប់​អ្នក​សារព័ត៌មាន​នានា​ថា អត្តសញ្ញាណប័ណ្ណ​ដែល​រក​ឃើញ​ក្នុង​ខ្លួន​របស់​បុរស​វាយ​ប្រហារ​នោះ បាន​បញ្ជាក់​ថា បុរស​នោះ​ជា​និស្សិត​ជនជាតិ​អាល់ហ្សេរី។

ប៉ូលិស​បាន​ឆែកឆេរ​បន្ទប់​ស្នាក់នៅ​របស់​បុរស​វាយ​ប្រហារ​នោះ ដោយ​បាន​រក​ឃើញ​វីដេអូ​មួយ ដែល​នៅ​ក្នុង​នោះ បុរស​នោះ​បាន​ប្រកាស​ពី​ភាព​ស្មោះស្ម័គ្រ​របស់​ខ្លួន​ចំពោះ​ក្រុម​ជ្រុល​និយម​រដ្ឋ​ឥស្លាម។

ការិយាល័យ​រដ្ឋអាជ្ញា​បារាំង​បាន​បញ្ជាក់​ថា អង្គភាព​ប្រឆាំង​អំពើ​ភេរវកម្ម​របស់​ខ្លួន បាន​ធ្វើ​ការ​ស៊ើប​អង្កេត​លើ​ការ​វាយ​ប្រហារ​នេះ។

នាយកដ្ឋាន​ប៉ូលិស​ប្រចាំ​ទីក្រុង​ប៉ារីស បាន​ឲ្យ​ដឹង​ថា មន្ត្រី​ប៉ូលិស​មួយ​រូប​បាន​បាញ់​ឲ្យ​បុរស​នោះ​រង​របួស បន្ទាប់ពី​បុរស​នោះ​បាន​វាយ​ប្រហារ​មន្ត្រី​ប៉ូលិស​ម្នាក់​ដោយ​ញញួរ។ លោក Gerard Collomb បាន​និយាយ​ថា មន្ត្រី​ប៉ូលិស និង​បុរស​រូប​នោះ ត្រូវ​បាន​បញ្ជូន​ទៅ​កាន់​មន្ទីរ​ពេទ្យ៕

XS
SM
MD
LG