ប្រទេសហ្វីលីពីនត្រូវបានជាប់ឆ្នោតនៅក្នុងក្រុមប្រឹក្សាសិទ្ធិមនុស្សអង្គការសហប្រជាជាតិ ដែលការណ៍នេះបានជួយជំរុញកេរ្តិ៍ឈ្មោះរបស់លោកប្រធានាធិបតី Rodrigo Duterte បន្ទាប់ពីមានការរិះគន់រយៈពេលពីរឆ្នាំប្រឆាំងនឹងការសម្លាប់មនុស្សក្រៅប្រព័ន្ធតុលាការនៅក្នុងការបង្ក្រាបថ្នាំញៀនក្នុងប្រទេសហ្វីលីពីន។
ក្រុមអង្គការសិទ្ធិមនុស្សបានប្រឆាំងទៅនឹងបោះឆ្នោតជ្រើសរើសប្រទេសហ្វីលីពីន ដោយបាននិយាយថា ប្រទេសនេះមិនគួរចូលរួមក្នុងក្រុមប្រឹក្សាសិទ្ធិមនុស្សទេ និងបានហៅប្រទេសហ្វីលីពីនថាជាប្រទេសរំលោភសិទ្ធិមនុស្ស។
លោក Duterte ដែលបានជាប់ឆ្នោតកាលពីឆ្នាំ២០១៦ បានបង្កក្តីបារម្ភដល់ពួកអ្នករាយការណ៍អង្គការសហប្រជាជាតិអំពីស្ថានភាពសិទ្ធិមនុស្សក្នុងប្រទេសហ្វីលីពីន។ កាលពីដើមឆ្នាំ២០១៨នេះ រដ្ឋាភិបាលរបស់លោកបានដកសមាជិកភាពពីតុលាការ ព្រហ្មទណ្ឌអន្តរជាតិ ICC បន្ទាប់ពីតុលាការនេះបានពិនិត្យមើលការចោទប្រកាន់នានាថាលោក Duterte និងក្រុមមន្រ្តីផ្សេងៗទៀតបានប្រព្រឹត្តឧក្រិដ្ឋកម្មប្រឆាំងមនុស្សជាតិនៅក្នុងយុទ្ធនាការប្រឆាំងគ្រឿងញៀន។
ក៏ប៉ុន្តែលោក Duterte បានអនុញ្ញាតឲ្យរដ្ឋាភិបាលហ្វីលីពីនបង្កើតគណៈកម្មការសិទ្ធិមនុស្សដើម្បីត្រួតពិនិត្យមើលរបាយការណ៍សម្លាប់មនុស្សក្រៅប្រព័ន្ធតុលាការដល់ទៅ ១២០០០នាក់ រួមទាំងអនីតិជនផងដែរ ក្រោមស្នាដៃរបស់ពួកប៉ូលិស។
លោក Duterte ក៏បានអនុម័តលើកំណែទម្រង់សិទ្ធិជាមូលដ្ឋានបស់ពលរដ្ឋហ្វីលីពីនផងដែរ។ នេះបើយោងតាមការប្រាប់ឲ្យដឹងពីរដ្ឋមន្រ្តីការបរទេសរបស់លោក Duterte៕
