ការិយាល័យរបស់ប្រធានាធិបតីហ្វីលីពីនលោក Rodrigo Duterte កាលពីថ្ងៃពុធបានច្រានចោលការអះអាងមួយដែលធ្វើឡើងនៅខែនេះដោយអង្គការសិទ្ធិមនុស្ស Human Rights Watch ថា ការសម្លាប់ដែលទាក់ទិននឹងថ្នាំញៀនដោយប៉ូលិសហ្វីលីពីន បានកើនឡើងយ៉ាងខ្លាំងក្នុងអំឡុងការបិទសកម្មភាពសង្គមដើម្បីប្រឆាំងនឹងវីរុសកូរ៉ូណា។
អង្គការសិទ្ធិមនុស្សនេះ បាននិយាយនៅក្នុងរបាយការណ៍កាលពីថ្ងៃទី៨ ខែកញ្ញាថា ការសម្លាប់ដោយគ្មានការជំនុំជម្រះនៃយុទ្ធនាការរបស់ប្រធានាធិបតី Duterte ប្រឆាំងនឹងថ្នាំញៀនខុសច្បាប់ បានកើនឡើង៥០ភាគរយចាប់ពីខែមេសា នៅពេលដែលការបិទសកម្មភាពសង្គមបានចាប់ផ្តើម រហូតដល់ខែកក្កដា បើប្រៀបធៀបទៅនឹងរយៈពេល៤ខែមុននោះ។
អង្គការសិទ្ធិមនុស្ស Human Rights Watch បានបញ្ជាក់ថា មនុស្ស១៥៥នាក់ បានត្រូវសម្លាប់ដោយទីភ្នាក់ងារពង្រឹងច្បាប់ចាប់តាំងពីខែមេសារហូតដល់ខែកក្កដា ដោយកើនឡើងពីចំនួន១០៣នាក់ ចាប់ពីខែធ្នូឆ្នាំទៅរហូតដល់ខែមីនា។ យុទ្ធនាការប្រឆាំងថ្នាំញៀន បានធ្វើឲ្យមនុស្សដែលសង្ស័យជាមេជួញដូរនិងអ្នកប្រើប្រាស់ថ្នាំញៀនស្លាប់យ៉ាងតិចណាស់ក៏៥៨១០នាក់ដែរក្នុងអំឡុងនៃការបង្ក្រាបរបស់ប៉ូលិស។
ការិយាល័យរបស់ប្រធានាធិបតី Duterte កាលពីថ្ងៃពុធ បានហៅរបាយការណ៍នោះថា ជាការការបំផ្លើសដែលផ្អែកលើទិន្នន័យដែលគ្មានការផ្ទៀងផ្ទាត់ត្រឹមត្រូវ៕
