កាលពី១៦ឆ្នាំមុន ក្រសួងការពារជាតិសហរដ្ឋអាមេរិកបានរងការវាយប្រហារ។ យន្តហោះក្រុមហ៊ុនអាកាសចរណ៍ American Airlines ជើងហោះហើរលេខ 77 ត្រូវបានចាប់ពង្រត់និងបើកបំបុកមន្ទីរបញ្ចកោណក្នុងរដ្ឋធានីវ៉ាស៊ីនតោន ដែលជាទីបញ្ជាការក្រសួងការពារជាតិសហរដ្ឋអាមេរិក ដោយសម្លាប់អ្នកដំណើរទាំងអស់នៅលើយន្តហោះនេះ ព្រមទាំងសម្លាប់មនុស្ស១២៥នាក់ផ្សេងទៀតដែលបម្រើការនៅក្នុងអគារមន្ទីរបញ្ចកោណ។
សព្វថ្ងៃនេះ ស្តូបអនុស្សាវរីយ៍ 9/11 Pentagon Memorial ស្ថិតនៅជាប់កន្លែងដែលយន្តហោះបានបុកចូលអគារមន្ទីរបញ្ចកោណនេះ ដោយរំឭកពីការបាត់បង់ជីវិតនៅក្នុងថ្ងៃមួយដែលបានផ្លាស់ប្តូរពិភពលោកជារៀងរហូត។
លោក Jamie McIntyre អ្នកសរសេរជាន់ខ្ពស់ខាងផ្នែកព័ត៌មានសន្តិសុខនៃកាសែត The Washington Examiner ក្នុងពេលមានការវាយប្រហារភេរវកម្មនោះ កំពុងធ្វើការនៅក្នុងអគារមន្ទីរបច្ចកោណក្នុងនាមជាអ្នកឆ្លើយឆ្លងព័ត៌មានឲ្យទូរទស្សន៍ CNN ។ លោកថ្លែងប្រាប់ VOA នៅទីតាំងស្តូប ដោយហៅទីតាំងស្តូបអនុស្សាវរីយ៍នេះថា ជា«ដីពិសិដ្ឋ»។
លោក McIntyre ថ្លែងថា៖
«ខ្ញុំបានឈរត្រង់នេះក្នុងថ្ងៃទី១១ ខែកញ្ញា ហើយសម្រាប់អ្នកដែលបានឆ្លងកាត់ព្រឹត្តិការណ៍នេះ វាដូចជាចំណុចរបត់មួយនៅក្នុងជីវិតរបស់អ្នក។»
ក្នុងចំណោមអ្នកដែលត្រូវសម្លាប់នៅក្នុងព្រឹត្តិការណ៍វាយប្រហារភេរវកម្មនេះរួមមានលោក David Laychak បុគ្គលិកស៊ីវិលរបស់កងទ័ពសហរដ្ឋអាមេរិក ដែលបានចេញចូលអគារមន្ទីរបញ្ចកោណដោយសារអគារនេះត្រូវបានជួសជុល។
ប្អូនប្រុសរបស់លោកគឺលោក James Laychak ដែលជាប្រធានមូលនិធិ Pentagon Memorial Fund ថ្លែងប្រាប់ VOA ក្នុងសម្តីដើមថា៖
«ខ្ញុំមិនទាំងដឹងថា Dave ពេលនោះគាត់នៅក្នុងអគារនេះឬទេ។ ខ្ញុំមិននឹកថា គាត់នៅក្នុងអគារនេះទេពេលនោះ។»
លោក Laychak រំឭកឡើងវិញថា ក្នុងពេលមានព្រឹត្តិការណ៍វាយប្រហារភេរវកម្មនោះ លោកកំពុងនៅផ្ទះ ចម្ងាយប្រហែល៣គីឡូម៉ែត្រពីមន្ទីរបញ្ចកោណ ហើយលោកនិងភរិយារបស់លោកក៏ឃើញបង្អួចចាប់ផ្តើមរង្គើ។ ពួកគេកំពុងមើលទូរទស្សន៍ដែលផ្សាយរូបភាពអំពីការវាយប្រហារលើអតីតប៉មផ្លោះនៅបូរីញូវយ៉ក ហើយពេលនោះពួកគេគិតឆ្ងល់ថា តើមន្ទីរបញ្ចកោណអាចជាទីតាំងវាយប្រហារបន្ទាប់ទេ?
ខណៈដែលការរង់ចាំរាប់ម៉ោងក្លាយជាច្រើនថ្ងៃ ដោយមិនមានដំណឹងអ្វីពីលោក David Laychak សុបិនអាក្រក់របស់ពួកគេត្រូវបញ្ជាក់ថាជាការណ៍ពិត។ បងប្អូនរបស់លោកពិតជាបានទៅមន្ទីរបញ្ចកោណក្នុងថ្ងៃនោះ ហើយលោកបានស្លាប់នៅក្នុងការវាយប្រហារនេះ។ លោកបន្សល់ទុកនូវភរិយាមេម៉ាយឈ្មោះ Laurie និងកូនពីរនាក់គឺ Zach អាយុ៩ឆ្នាំ និង Jenny អាយុ៧ឆ្នាំ។
ការស្ថាបនាស្តូបអនុស្សាវរីយ៍នេះ
គម្រោងស្ថាបនាស្តូបអនុស្សាវរីយ៍នេះចាប់ផ្តើមឡើងនៅប៉ុន្មានសប្តាហ៍បន្ទាប់។
លោក Laychak ថ្លែងថា ក្រុមគ្រួសារនៃជនរងគ្រោះ ដំបូងឡើយបានធ្វើការជាមួយមន្ទីរបញ្ចកោណដើម្បីរក្សាទីតាំងមួយកន្លែងនៅក្បែរកន្លែងយន្តហោះបុកអគារនោះ។
អស់រយៈពេលជាច្រើនឆ្នាំនៃការរៃអង្គាសប្រាក់ ការរចនា និងការស្ថាបនាស្តូប ស្តូបអនុស្សាវរីយ៍ Pentagon Memorial បានបើកដល់សាធារណជនជាលើកដំបូងកាលពីថ្ងៃទី១១ ខែកញ្ញា ឆ្នាំ២០០៨។ លោក Laychak ថ្លែងថា ស្តូបអនុស្សាវរីយ៍ជាតិ 9/11 Pentagon Memorial នេះបានក្លាយជាស្តូបរំឭកព្រឹត្តិការណ៍វាយប្រហារ១១ កញ្ញា ដំបូងគេដែលបានបើកជាផ្លូវការ។ ហើយទោះបីស្តូបនេះមានទីតាំងជាប់នឹងទីបញ្ជាការកណ្តាលរបស់ក្រសួងការពារជាតិអាមេរិកក្តី ក៏សាធារណជនអាចចូលទស្សនាស្តូបនេះរយៈពេល២៤ម៉ោងក្នុងមួយថ្ងៃ និង៣៦៥ថ្ងៃក្នុងមួយឆ្នាំ។
លោក Laychak ថ្លែងក្នុងសម្តីដើមថា៖
«ខ្ញុំគិតថា ស្តូបនេះសរបញ្ជាក់ពីស្មារតីរបស់ប្រទេសជាតិយើង។ ស្តូបនេះបើកជាសាធារណៈជានិច្ច លើកលែងតែមានព្យុះទឹកកកធ្ងន់ធ្ងរប៉ុណ្ណោះ។»
ប្រែសម្រួលដោយ សឹង សុផាត
