របាយការណ៍ថ្មីមួយរបស់ក្រសួងការពារជាតិសហរដ្ឋអាមេរិកព្យាករណ៍ថា ប្រទេសចិននឹង «យ៉ាងហោចណាស់បង្កើនទ្វេដង» នូវបរិមាណក្បាលគ្រាប់នុយក្លេអ៊ែររបស់ខ្លួន ក្នុងពេលមួយទសវត្សរ៍ទៀត ស្របពេលដែលចិនប្រឹងបន្តសម្រេចឲ្យបាននូវរចនាសម្ព័ន្ធកម្លាំងនុយក្លេរអ៊ែររបស់ខ្លួនដើម្បីអាចបាញ់ចេញពីដីគោក ពីសមុទ្រ និងពីអាកាស។
បើយោងតាមរបាយការណ៍ប្រចាំឆ្នាំរបស់ក្រសួងការពារជាតិអាមេរិកស្ដីអំពី «ឥទ្ធិពលយោធារបស់ចិន» ដែលផ្ញើទៅកាន់សភា និងដែលត្រូវបានផ្សព្វផ្សាយកាលពីថ្ងៃអង្គារ គេឃើញថា ការពង្រីក និងការធ្វើទំនើបកម្មនុយក្លេអ៊ែររបស់ចិនគឺជាផ្នែកមួយនៃកិច្ចខិតខំប្រឹងប្រែងដ៏ទូលំទូលាយមួយក្នុងគោលបំណងធ្វើយ៉ាងណាឲ្យស្មើកម្លាំងយោធារបស់សហរដ្ឋអាមេរិក ឬក្នុងករណីខ្លះខ្លាំងជាងអាមេរិកនៅត្រឹមឆ្នាំ ២០៤៩ ខាងមុខ ក្នុងនាមជាប្រទេសមហាអំណាចតំបន់ឥណ្ឌូ-ប៉ាស៊ីហ្វិក។
របាយការណ៍នេះបានឲ្យដឹងថា ចំនួននៃក្បាលគ្រាប់នុយក្លេរអ៊ែររបស់ចិន បច្ចុប្បន្ននេះត្រូវបានគេប៉ាន់ស្មានថា មានជាង ២០០ គ្រាប់ ដែលក្នុងនោះរួមមានទាំងក្បាលគ្រាប់ដែលអាចបំពាក់លើគ្រាប់ផ្លោងមីស៊ីលដែលអាចបាញ់ដល់ទឹកដីសហរដ្ឋអាមេរិកបានផងដែរ។
លោក Chad Sbragia ឧបការីរងរដ្ឋមន្ត្រីការពារជាតិសហរដ្ឋអាមេរិក បានឲ្យដឹងក្នុងសប្ដាហ៍នេះថា នេះជាលើកទីមួយហើយដែលក្រសួងការពារជាតិអាមេរិកបញ្ជាក់អំពីចំនួនជាក់លាក់នៃក្បាលគ្រាប់នុយក្លេអ៊ែររបស់ចិន៕
