ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

Mike Pence៖ ​អាមេរិក​និង​សម្ព័ន្ធមិត្ត​ពង្រីក​យុទ្ធនាការ​​បញ្ចប់​កម្មវិធី​នុយក្លេអ៊ែរ​របស់​​កូរ៉េខាង​ជើង


អនុប្រធានាធិបតី​សហរដ្ឋ​អាមេរិក លោក Mike Pence នៅ​ឯ​មូលដ្ឋាន​ទ័ព​អាកាស​ Osan ក្នុង​ទីក្រុង​ Pyeongtaek ប្រទេស​កូរ៉េ​ខាង​ត្បូង កាល​ពី​ថ្ងៃ​ទី​០៨ កុម្ភៈ ២០១៨។

អនុ​ប្រធានា​ធិបតី​សហរដ្ឋ​អាមេរិក​ លោក​ Mike Pence​ បាន​ចាក​ចេញ​ពី​ប្រទេស​កូរ៉េ​ខាង​ត្បូង​កាល​ពី​ថ្ងៃ​សៅរ៍​ដោយ​និយាយ​ថា ​សហរដ្ឋ​អាមេរិក​និង​សម្ព័ន្ធមិត្ត​របស់​ខ្លួនបាន​តាំង​ចិត្ត​កាន់​តែ​ខ្លាំង​ឡើង​ជាង​ពេល​ណាៗ​ទាំង​អស់​ដើម្បី​រុះរើ​កម្មវិធី​អភិវឌ្ឍន៍​អាវុធ​នុយក្លអ៊ែរ​ និង​កាំជ្រួច​មីស៊ីល​របស់​កូរ៉េ​ខាង​ជើង។

លោក​អនុប្រធានា​ធិប​តី​សហរដ្ឋ​អាមេរិក Mike ​Pence​ បាន​ប្រាប់​ពួក​អ្នក​យក​ព័ត៌មាន​នៅ​លើ​យន្ត​ហោះ​ Air Force Two​ នៅ​ពេល​ដែល​ហោះ​វិល​ត្រឡប់​មក​កាន់​សហរដ្ឋ​អាមេរិក​វិញ​ថា៖ «យើង​កំពុង​បន្ត​រួបរួម​គ្នា​ជាមួយ​សម្ព័ន្ធមិត្ត​ និង​ដៃគូ​ផ្សេង​ទៀត​របស់​យើងដើម្បី​បន្ត​ពង្រីក​ការ​ដាក់​គំនាប​ខាង​សេដ្ឋ​កិច្ច ​និង​ការទូត​លើ​កូរ៉េខាង​ជើង​រហូត​ទាល់​តែ​ពួកគេ​បោះ​បង់​ចោល​ជា​អចិន្រ្តៃយ៍​នូវ​កម្មវិធី​នុយក្លេអ៊ែរ​ និង​កាំជ្រួច​ឆ្លង​ទ្វីប​របស់​ពួក​គេ‍»។

លោក​អនុប្រធានា​ធិបតី​អាមេរិក​បាន​មាន​ប្រសាសន៍​ទៀត​ថា ​លោក​បាន​ទទួល​ការ​លើក​ទឹក​ចិត្ត​ពី​ការ​ពិភាក្សាទ្វេភាគី​ជាមួយ​ប្រធានា​ធិបតី ​Moon Jae-in ​នៃ​ប្រទេស​កូរ៉េខាង​ត្បូង ហើយ​និង​ការ​ពិភាក្សា​របស់​ប្រធានា​ធិបតី ​Moon ​ជាមួយ​សមា​ជិក​គណៈ​ប្រតិភូ​របស់​កូរ៉េខាង​ជើង​ដែល​ចូល​រួមកីឡា​អូឡាំពិក​រដូវ​រងា​ឆ្នាំ​២០១៨ ​នេះ​ ដែល​រួមមាន ​Kim Yo jong​ ប្អូនស្រី​ដ៏​មាន​ឥទ្ធិពល​ម្នាក់​របស់​មេដឹកនាំ​កូរ៉េខាង​ជើង​ គីម ជុង​អ៊ុន។

​នៅ​ពេល​ដែល​គេ​សួរ​ថា​ តើ​ការ​តាំង​ចិត្ត​របស់​លោក​ដល់​ការ​ធ្វើ​ឲ្យ​កូរ៉េ​ខាង​ជើង​គ្មាន​អាវុធ​នុយក្លេអ៊ែរ​នោះ​ ជា​បញ្ហា​ផ្ទាល់​ខ្លួន​ពីព្រោះ​តែ​ឪពុក​របស់​លោក​បានបម្រើ​ជា​ទាហាន​ក្នុង​សង្គ្រាម​កូរ៉េ​នោះ​ឬ​យ៉ាង​ណា ​លោក​អនុប្រធានា​ធិបតី​បាន​ឆ្លើយ​តប​ថា៖ «សហគមន៍​ពិភពលោកទាំង​មូល​បាន​តាំង​ចិត្ត​ដល់​ការ​ធ្វើ​ឲ្យ​ឧបទ្វីប​កូរ៉េ​គ្មាន​អាវុធ​នុយក្លេអ៊ែរ។ ហើយ​ខ្ញុំ​ក៏​មាន​ទស្សនៈ​បែប​នេះ​ដែរ‍»៕

XS
SM
MD
LG