ពលរដ្ឋប៉ាឡេស្ទីនដែលកាន់ទុក្ខរាប់ពាន់នាក់បានប្រមូលផ្តុំគ្នានៅតំបន់កាហ្សាកាលពីថ្ងៃអង្គារ នៅឯពិធីបុណ្យសពរបស់ពួកបាតុកររាប់សិបនាក់ដែលបានត្រូវសម្លាប់នៅក្នុងហេតុការណ៍ប៉ះទង្គិចគ្នានៅតាមព្រំដែនជាមួយកងកម្លាំងសន្តិសុខអ៊ីស្រាអែល ជាការវាយប្រហារមួយ ដែលពួកមន្រ្តីសិទ្ធិមនុស្សនៃអង្គការសហប្រជាជាតិបានថ្កោលទោសថាជាហេតុការណ៍«ដ៏រន្ធត់»។
ពួកអ្នកកាន់ទុក្ខជាច្រើនបានគ្រវីទង់ជាតិប៉ាឡេស្ទីន ហើយមួយចំនួនទៀតបានប្រកាសសងសឹកប្រឆាំងនឹងអ៊ីស្រាអែល ដែលបានសម្លាប់បាតុករចំនួន៦០នាក់ និងធ្វើឲ្យបាតុករ២៧០០នាក់ផ្សេងទៀតរងរបួសកាលពីថ្ងៃចន្ទ។ ពួកអ្នកកាន់ទុក្ខទាំងនោះបានដើរឆ្ពោះទៅទីតាំងបុណ្យសពពីរកន្លែងនៅតំបន់កាហ្សាភាគខាងត្បូង និងបានស្រែកថា«យើងនឹងធ្វើការសងសឹកជូនដល់ព្រលឹងនិងឈាមរបស់អ្នក»។
បាតុកម្មតវ៉ាថ្មីៗបានផ្ទុះឡើងនៅតាមបណ្តោយព្រំដែនតំបន់កាហ្សាជាមួយនឹង អ៊ីស្រាអែល និងនៅតំបន់ West Bank ដែលមានពួកបាតុករជាច្រើនបានគប់ដុំថ្មទៅលើកងកម្លាំងអ៊ីស្រាអែល និងបានដុតកង់ឡាន ខណៈដែលទាហានអ៊ីស្រាអែលបានបាញ់ឧស័្មនបង្ហូរទឹកភ្នែកទៅលើពួកបាតុករជាការឆ្លើយតបវិញ។
ពួកបាតុករកាន់តែច្រើនពាន់នាក់បានប្រមូលផ្តុំគ្នាធ្វើការតវ៉ានៅតាមកន្លែងជាច្រើន ប៉ុន្តែមានចំនួនតិចជាង ចំនួនបាតុករដែលបានធ្វើការតវ៉ាកាលពីថ្ងៃចន្ទ ដែលមានចំនួនរហូតដល់ទៅ៤ម៉ឺននាក់បានប្រមូលផ្តុំគ្នាតវ៉ានៅតាមព្រំដែនតំបន់កាហ្សា ប្រឆាំងទៅនឹងការបើកស្ថានទូតសហរដ្ឋអាមេរិកនៅក្នុងទីក្រុងហ្ស៊េរុយសាឡិម។ យ៉ាងហោចណាស់មានពលរដ្ឋប៉ាឡេស្ទីន២នាក់ត្រូវបានរាយការណ៍មកថាបានស្លាប់កាលពីថ្ងៃអង្គារ។
លោកនាយករដ្ឋមន្រ្តីអ៊ីស្រាអែល Benjamin Netanyahu បានថ្លែងការពារសិទ្ធិរបស់រដ្ឋជ្វីសក្នុងការការពារព្រំដែនរបស់ខ្លួន។ ទោះជាយ៉ាងណាក៏ដោយសហរដ្ឋអាមេរិកបានស្តីបន្ទោសដល់ពួកសកម្មប្រយុទ្ធរបស់ក្រុម Hamas ដែលជាអ្នកគ្រប់គ្រងនៅតំបន់កាហ្សាចំពោះការញុះញង់ឲ្យមានការធ្វើបាតុកម្មនេះ និងបានរារាំងដល់សេចក្តីថ្លែងការណ៍របស់ក្រុមប្រឹក្សាអង្គការសហប្រជាជាតិដែលអំពាវនាវឲ្យធ្វើការស៊ើបអង្កេតលើការស្លាប់របស់ពួកប៉ាឡេស្ទីនទាំងនេះ៕
