ប្រធានាធិបតីប៉ាឡេស្ទីន លោក Mahmoud Abbas បានអំពាវនាវដល់សហគមន៍អន្តរជាតិកាលពីថ្ងៃព្រហស្បតិ៍ ជាពិសេសសហរដ្ឋអាមេរិក ឱ្យបញ្ឈប់ការបញ្ជូនអាវុធទៅឱ្យអ៊ីស្រាអែល ដើម្បីបញ្ចប់ការបង្ហូរឈាមនៅក្នុងតំបន់ West Bank និងហ្កាហ្សា។
លោក Abbas ដែលបានថ្លែងទៅកាន់ជំនួបប្រចាំឆ្នាំរបស់មហាសន្និបាតអង្គការសហប្រជាជាតិ បានចុចសហរដ្ឋអាមេរិកពីព្រោះការដឹកជញ្ជូនអាវុធរបស់អាមេរិកនិងការបោះឆ្នោតវ៉េតូលើសេចក្តីសម្រេចរបស់ក្រុមប្រឹក្សាសន្តិសុខ ដែលថ្កោលទោសសង្គ្រាមជិតមួយឆ្នាំរបស់អ៊ីស្រាអែល ប្រឆាំងនឹងពួកសកម្មប្រយុទ្ធហាម៉ាស់នៅក្នុងតំបន់ហ្កាហ្សា។
លោក Abbas បានថ្លែងថា«បញ្ឈប់ឧក្រិដ្ឋកម្មនេះ»។ បញ្ឈប់វានៅពេលឥឡូវនេះ។ បញ្ឈប់ការសម្លាប់កូនក្មេងនិងស្ត្រី។ បញ្ឈប់អំពើប្រល័យពូជសាសន៍។ បញ្ឈប់ការ បញ្ជូនអាវុធទៅអ៊ីស្រាអែល។ ភាពឆ្កួតលីលានេះមិនអាចបន្តទៀតទេ។ ពិភពលោកទាំងមូលជាអ្នកទទួលខុសត្រូវ ចំពោះអ្វីកំពុងកើតមានឡើងដល់ប្រជាពលរដ្ឋរបស់យើងនៅក្នុងតំបន់ហ្កាហ្សានិង West Bank។
លោកបាននិយាយទៀតថាសហរដ្ឋអាមេរិក នៅក្នុងការអនុវត្តអំណាចនៃការបោះឆ្នោតវ៉េតូរបស់ខ្លួន នៅក្នុងក្រុមប្រឹក្សាសន្តិសុខបាននិយាយថា«ទេ ការប្រយុទ្ធនឹងបន្ត»។
ពួកហាម៉ាស់បានធ្វើឱ្យមានសង្គ្រាមកាលពីថ្ងៃទី៧ តុលា ឆ្នាំមុន ដោយការវាយប្រហារដ៏តក់ស្លុតរបស់ខ្លួនលើអ៊ីស្រាអែល ដែលបានសម្លាប់មនុស្ស១ពាន់២រយនាក់ ហើយនិងចាប់មនុស្សធ្វើចំណាប់ខ្មាំង២៥០នាក់។ ការវាយប្រហារសងសឹករបស់អ៊ីស្រាអែលបានសម្លាប់មនុស្សជាង៤ម៉ឺន១ពាន់នាក់នៅក្នុងតំបន់ហ្កាហ្សា។ នេះបើតាមពួកមន្ត្រីសុខាភិបាលក្រុមហាម៉ាស់ ថ្វីបើយោធាអ៊ីស្រាអែលនិយាយថា ចំនួនមនុស្សស្លាប់នេះ រួមបញ្ចូលទាំងពួកអ្នកប្រយុទ្ធហាម៉ាស់រាប់ពាន់នាក់ក៏ដោយ។
លោក Abbas បាននិយាយទៀតថា ពេលសង្គ្រាមចប់ អាជ្ញាធរប៉ាឡេស្ទីនត្រូវតែត្រួតត្រាតំបន់ហ្កាហ្សាទាំងស្រុង ជាជំហរមួយដែលអ៊ីស្រាអែលបានច្រានចោល៕
