អ៊ីស្រាអែលបានទម្លាក់គ្រាប់បែកលើទីដៅនានារបស់ពួកសកម្មប្រយុទ្ធហេសបូឡានៅក្នុងប្រទេសលីបង់កាលពីថ្ងៃអង្គារ ដោយចំនួនមនុស្សស្លាប់មកពីការវាយប្រហារតាមអាកាសរយៈពេលមួយថ្ងៃបានឡើងដល់៥៥៨នាក់ រួមជាមួយមនុស្សរងរបួស១ពាន់៨រយ៣៥នាក់ផ្សេងទៀត។
អ៊ីស្រាអែលបាននិយាយថាខ្លួនបានវាយប្រហារ១ពាន់៥រយកន្លែងនៅក្នុងរយៈពេល២៤ម៉ោង ដោយពួកមន្ត្រីសុខាភិបាលលីបង់និយាយថាកូនក្មេង៥០នាក់បានត្រូវសម្លាប់នៅក្នុងការវាយប្រហារនោះ រួមជាមួយស្ត្រីយ៉ាងតិចណាស់ក៏៥៨នាក់ដែរ។
ជនជាតិលីបង់រាប់ពាន់នាក់បានរត់គេចដោយខ្លួនឯងនិងទៅតាមការស្នើសុំរបស់អ៊ីស្រាអែលចេញពីតំបន់ភាគខាងត្បូងលីបង់នៅក្នុងការស្វែងរកទីសុវត្ថិភាពពីការវាយប្រហាររបស់អ៊ីស្រាអែល ធ្វើឱ្យស្ទះផ្លូវនានានៅផ្នែកខាងជើងទីក្រុងបេរូត។ ក៏ប៉ុន្តែ អ៊ីស្រាអែលក៏បានវាយប្រហារទីកន្លែងមួយចំនួននៅក្នុងរដ្ឋធានីដែរ ដោយការវាយប្រហារមួយបានត្រូវចំអគារកម្ពស់៦ជាន់ដែលបានសម្លាប់មនុស្ស៦នាក់និងធ្វើឱ្យរងរបួស១៥នាក់។
យោធាអ៊ីស្រាអែលបាននិយាយថាការវាយប្រហារតាមអាកាសរបស់ខ្លួនកាលពីថ្ងៃអង្គារបានត្រូវចំទីដៅរាប់សិបរបស់ក្រុមហេសបូឡារួមមានពួកសកម្មប្រយុទ្ធដែលបានទាក់ទិននៅក្នុងការបាញ់គ្រាប់រ៉ុក្កែតជាច្រើនគ្រាប់ដាក់តំបន់ភាគខាងជើងអ៊ីស្រាអែល។
អ៊ីស្រាអែលបាននិយាយថាការវាយប្រហារតាមអាកាសរបស់ខ្លួននៅក្នុងតំបន់ជាយក្រុងខាងត្បូងក្រុងបេរូតបានសម្លាប់លោក Ibrahim Muhammad Qubaisi ដែលខ្លួនបានកំណត់អត្តសញ្ញាណថាជាមេបញ្ជាការយោធាជាន់ខ្ពស់របស់ក្រុមហេសបូឡា ដែលមើលខុសត្រូវប្រព័ន្ធកាំជ្រួចមីស៊ីលរបស់ក្រុមហេសបូឡា៕
ព័ត៌មានខ្លះនៃសេចក្តីរាយការណ៍នេះផ្តល់ដោយទីភ្នាក់ងារសារព័ត៌មាន AP, AFPនិង Reuters
