ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អ្នកឃ្លាំមើល​សង្គម​យល់​ថា ការ​ធ្វើ​បត្យាប័ន​​ជន​ល្មើស​ជនជាតិ​ចិន​មិន​បាន​បន្ថយ​បទ​ល្មើស​របស់​ជនជាតិ​នេះ​នៅ​កម្ពុជា​ទេ


រូបឯកសារ៖ ជនជាតិចិនជាច្រើននាក់ត្រូវបានចាប់ខ្លួនបញ្ជូនចេញពីប្រទេសកម្ពុជាទៅកាន់ប្រទេសចិនវិញ ពីបទប្រព្រឹត្តបទល្មើសជំរិតទារប្រាក់តាមអ៊ីនធឺណិត ថ្ងៃទី១២ ខែតុលា ឆ្នាំ២០១៧។

នៅ​សប្តាហ៍​នេះ​ សមត្ថ​កិច្ច​កម្ពុជា​បាន​ឃាត់​ខ្លួន​ជនជាតិ​ចិន​ចំនួន​ជិត​១៣០​នាក់ ​ដែល​បាន​ប្រើ​ប្រាស់​កម្ពុជា​ធ្វើ​ជា​ទីតាំង​ចាប់​ជំរិត​ទារ​ប្រាក់​តាម​ប្រព័ន្ធ​អ៊ីនធឺណិត​ ទៅ​លើ​​ជនជាតិ​ចិន​ដូច​គ្នា​នៅ​ឯ​ប្រទេស​ចិន។

ក្រុម​សមត្ថកិច្ចកម្ពុជា​បានឃាត់​ខ្លួន​ជន​ជាតិ​ចិន​ចំនួន​១២៧​នាក់ទាក់​ទង​នឹង​បទ​ល្មើស​ជំរិត​ទារ​ប្រាក់​ពីជនជាតិ​ចិន​ដូច​គ្នា​តាម​ប្រព័ន្ធ​អ៊ីនធឺណិត​ (VOIP) នៅក្នុងខេត្ត​ព្រះ​សីហនុ ដែលជា​ខេត្ត​ជាប់​មាត់​សមុទ្រ​មានលំហូរ​ជន​ជាតិ​ចិន​ទៅ​កាន់​ទីនោះ​យ៉ាង​គំហុក។

លោក​អ៊ី សុខឃី ​ប្រធាន​នាយកដ្ឋាន​ប្រឆាំង​ភេរវកម្ម​ និង​ឧក្រិដ្ឋ​កម្ម​ឆ្លង​ដែន​នៃ​អគ្គ​ស្នងការ​ដ្ឋាន​នគរបាល​ជាតិ ​ប្រាប់ ​VOA ​នៅថ្ងៃ​ព្រហស្បតិ៍​នេះថា ​ជនជាតិ​ចិន​ទាំង១២៧​នាក់​ ​ក្នុង​នោះ​មាន​ស្ត្រី​ចំនួន​ដប់​នាក់​ ត្រូវ​បាន​ចាប់​ខ្លួន​កាល​ពី​ថ្ងៃ​ពុធ​ម្សិលមិញ​នេះ។​ លោក​ថា ​ពួក​គេ​ប្រើប្រាស់​ទីតាំង​ក្នុង​ខេត្ត​ព្រះ​សីហនុ​ដើម្បី​ជំរិត​ទារ​ប្រាក់ពី​ជនជាតិ​ចិន​ដូច​គ្នានៅ​ក្រៅ​ប្រទេសតាម​ប្រព័ន្ធ​អ៊ីនធឺណិត។

លោក​អ៊ី សុខឃី បញ្ជាក់​ថា​ បច្ចុប្បន្ន​ជនជាតិ​ចិនទាំង១២៧​នាក់កំពុង​ស្ថិត​នៅ​អគ្គ​នាយក​ដ្ឋាន​អន្តោ​ប្រវេសន៍​ក្នុង​រាជធានី​ភ្នំពេញ ​រង់​ចាំ​ការ​ស៊ើប​អង្កេត ​និង​ប្រមូល​ភ័ស្តុតាង​បន្ថែម​ដើម្បី​សម្រេច​ថា​ នឹង​ត្រូវ​បណ្តេញ​ចេញ​ពី​កម្ពុជា​ ឬ​យ៉ាង​ណា។​

«មិន​ទាន់​កំណត់​បាន​ទេ ​ដោយសារ​យើង​កំពុង​ប្រមូល​វត្ថុតាង​ថែម​ទៀត​ ហើយ​ទី​ពីរ​យើង​ត្រូវ​គោរព​រាយ​ការណ៍​ជូន​ថ្នាក់​ដឹកនាំ​ ដើម្បី​លោក​ពិនិត្យ​សម្រេច»។​

របាយ​ការណ៍​របស់​អគ្គ​នាយកដ្ឋាន​អន្តោ​ប្រវេសន៍​នៃ​ក្រសួង​មហា​ផ្ទៃ​ចេញ​កាល​ពី​ចុង​ឆ្នាំ​២០១៨​បង្ហាញ​ថា​ ​ចាប់​តាំង​ពី​ឆ្នាំ​២០១៤​រហូត​ដល់​ខែ​តុលា​ឆ្នាំ​២០១៨ អាជ្ញាធរ​កម្ពុជា​បាន​បញ្ជូន​ជនជាតិ​ចិនប្រមាណ​២០០០​នាក់​ ដែល​ពាក់ព័ន្ធ​នឹង​បទ​ល្មើសជំរិត​ទារ​ប្រាក់​តាម​ប្រព័ន្ធ​អ៊ីនធឺណិត​នេះ​ទៅ​ប្រទេស​ចិន​វិញ។​ ​ជនជាតិ​ចិន​ទាំង​នោះ​បាន​ប្រើ​ទីតាំង​តាម​បណ្តា​រាជធានី​ខេត្ត​មួយ​ចំនួន​នៅ​កម្ពុជា​ រួម​មាន​រាជធានី​ភ្នំពេញ​ ​ខេត្ត​ព្រះ​សីហនុ​ ​ខេត្ត​កំពង់ស្ពឺ​ ​ខេត្ត​តាកែវ​ និង​ខេត្ត​ស្វាយ​រៀង​ជាដើម​ ដើម្បី​ធ្វើ​សកម្មភាព។​

លោកឌី ថេហូយ៉ា​ មន្រ្តី​កម្មវិធី​នៃ​មជ្ឈមណ្ឌល​សម្ព័ន្ធ​ការងារ​ និង​សិទ្ធិ​មនុស្ស​ ហៅ​ថា ​សង់​ត្រាល់ លើក​ឡើង​ថា ក្រុម​ឧក្រិដ្ឋជន​ចិន​តែង​ប្រើប្រាស់​កម្ពុជា​ជាទី​កន្លែង​ប្រព្រឹត្ត​បទ​ល្មើស​ផ្សេងៗ​នេះ​ គឺ​ដោយសារ​ការ​ខ្វះ​ចន្លោះ​ និង​កម្សោយ​នៃ​ការ​អនុវត្ត​ច្បាប់​របស់​សមត្ថ​កិច្ច​កម្ពុជា។​

«ការ​អនុវត្ត​ច្បាប់​ហ្នឹង​វា​ត្រូវ​តែ​មាន​ប្រសិទ្ធ​ភាព។​ វា​ត្រូវ​ឲ្យម៉ឺងម៉ាត់​បាន​ឲ្យ​អ្នក​ផ្សេង​ហ្នឹង​រាង​ចាល។ ​ប្រសិន​បើ​គាត់​ប្រព្រឹត្ត​បទ​ល្មើស ​ហើយ​គ្រាន់តែចាប់​បញ្ជូន​ទៅ​រួច​ខ្លួន​ ​មាន​ន័យ​ថា ​ម៉េច? ​មាន​ន័យ​ថា​ យើង​បន្ធូរ​បន្ថយ ​លើក​ទឹក​ចិត្ត​ឲ្យ​ជន​បរទេស​ហ្នឹង​កាន់​តែ​មក​ស្រុក​ខ្មែរ ព្រោះ​អត់​មាន​ច្បាប់​ណា​ដែល​ត្រូវ​ឲ្យ​គាត់​ប្រឈមពន្ធនាគារ​អី​ជា​ដើម។​ គ្រាន់តែ​ចាប់​បញ្ជូន​ទៅ​វិញ​ មាន​អី​ធ្ងន់ធ្ងរ?»​

កម្ពុជា​បាន​ក្លាយ​ជា​កន្លែង​ប្រព្រឹត្ត​បទ​ល្មើស​តាម​ប្រព័ន្ធ​បច្ចេក​វិទ្យា​នេះ ចាប់​តាំង​ពី​ឆ្នាំ​២០១១។​ ជន​ជាតិ​ចិន​ដែល​ជា​ចំណូល​ថ្មី​មួយ​ចំនួន​លើទឹក​ដី​កម្ពុជា​ត្រូវ​បាន​គេ​រាយ​ការណ៍​ថា​ ​បាន​និង​កំពុង​បង្ក​បទ​ល្មើស​ជាច្រើន​ ​ដែល​មួយ​ចំនួន​ធំ​នៃ​បទ​ល្មើស​ធ្ងន់​ គឺ​ពាក់ព័ន្ធ​នឹង​ការ​ចាប់​បង្ខាំង​ជនជាតិ​ចិន​គ្នា​ឯង​ ​ការ​ធ្វើ​ទារុណ​កម្ម​និង​បទ​ល្មើស​ជំរិត​ទារ​ប្រាក់​តាម​អ៊ីនធឺណិត​ជាដើម។

គេហ​ទំព័រ​អគ្គ​ស្នងការ​នគរបាល​ជាតិ​ផ្សាយ​កាល​ពី​ខែ​កញ្ញា​ឆ្នាំ​២០១៨បញ្ជាក់ថា​ នៅ​ចុង​ឆមាស​ទី២ឆ្នាំ​២០១៨ ជនជាតិ​ចិន​នៅ​កម្ពុជា​កើន​ឡើង​ដល់​ជាង​២០​ម៉ឺន​នាក់។ ​ប៉ុន្តែចំនួន​នេះមិន​បូក​បញ្ចូល​ជាមួយ​អ្នក​ការ​ទូត​ ​អ្នក​ទេសចរណ៍​ ​និង​អង្គ​ការ​សង្គម​ស៊ីវិល​ទេ។​ ​ក្នុង​ចំណោម​ជនជាតិ​ចិន​ទាំង​២០​ម៉ឺន​នាក់​នោះ​មាន​ជាង​៧៨.០០០​នាក់​កំពុង​រស់​នៅ​ខេត្ត​ព្រះ​សីហនុ។​ ​ក្នុង​នោះ​ជនជាតិ​ចិន​ដែល​មាន​បណ្ណ​ការ​ងារ​ត្រឹម​ត្រូវ​មាន​ត្រឹម​តែ​ជាង​២​ម៉ឺន​នាក់​ប៉ុណ្ណោះ៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG