ភ្ជាប់​ទៅ​គេហទំព័រ​ទាក់ទង

គណបក្ស​ជំទាស់៖លទ្ធផល​បោះឆ្នោតគ្មាន​តម្លាភាព​នឹងនាំ​ឲ្យគាំង​ដំណើរ​ការ​បង្កើត​រដ្ឋសភា​ និង​រដ្ឋាភិបាល

  • សុខ ខេមរា

មេដឹកនាំ​គណ​បក្ស​សង្គ្រោះជាតិ​​​​ប្រកាសថា ​បើគ្មាន​រកយុត្តិធម៌​ក្នុង​ការបោះឆ្នោត​លោកនឹង​ធ្វើពហិកា​ការបង្កើតសភា​និងរដ្ឋាភិបាលថ្មី។
គណបក្ស​ជំទាស់​បាន​អះអាងថា ​ការ​ប្រកាស​លទ្ធផល​បោះឆ្នោត​ដែល​គ្មាន​ការស៊ើប​អង្កេត​ដោយ​តម្លាភាព​ជាមុននោះ​នឹងនាំ​ឲ្យមាន​ការ​គាំង​ដំណើរ​បង្កើត​រដ្ឋសភា​និង​រដ្ឋាភិបាល ​ហើយ​នឹង​គ្មាន​ការ​ទទួលស្គាល់​ជា​អន្តរជាតិ។​ លោក​សុខ ខេមរា​នៃ​វីអូអេ​រាយការណ៍​ពីរដ្ឋធានី​វ៉ាស៊ីនតោន​ថា​ គណបក្ស​ទាំងពីរ​នៅ​មាន​ច្រក​មួយ​ទៀត​គឺ​ដំណោះ​ស្រាយ​តាម​រយៈ​ជំនួប​នៃ​មេដឹកនាំ​កំពូល។​

ដោយសារ​តែ​លទ្ធផល​បោះឆ្នោត​ដែល​មាន​រឿងភាព​មិន​ប្រក្រតី​ធ្ងន់ធ្ងរ​ជាច្រើន​ កើត​ឡើង​ហើយមិន​ត្រូវគេ​ស៊ើបអង្កេត​មុន​នឹង​ប្រកាស​លទ្ធផល​បោះឆ្នោត​ដែល ផ្តល់​ជ័យជម្នះ​ទៅឲ្យ​គណបក្ស​ប្រជាជន​កម្ពុជា​នោះ​ ក្រុម​មេដឹកនាំ​គណបក្ស​ ជំទាស់​បាន​ព្រមាន​ថា​ ពួកគេ​នឹងមិន​ចូលរួម​ប្រជុំ​សភា​ដំបូង​ដើម្បី​បង្កើត​សភា​និង រដ្ឋាភិបាល​ថ្មី​ទេ ​ដែល​បញ្ហានេះ​ត្រូវគេ​គិត​ថា ​នឹងធ្វើ​ឲ្យមាន​ការ​ជាប់​គាំង​នយោ បាយ​ ឬការ​បង្ខំចិត្ត​របស់​គណបក្ស​ប្រជាជន​កម្ពុជា​ដើម្បី​បង្កើត​សភា​ និង​រដ្ឋា ភិបាល​ថ្មី​មួយ​ដោយ​សំឡេង​ឯកបក្ស​ដែល​សហគមន៍​អន្តរជាតិ​ទំនង​ជា​មិន​ទទួល​ ស្គាល់​ឲ្យបាន​ទូលំ​ទូលាយ។​

គណៈ​កម្មាធិការ​ជាតិ​រៀបចំ​ការ​បោះឆ្នោត​បាន​ប្រកាស​លទ្ធផល​ជា​ផ្លូវការ​ចុង​ ក្រោយ​ បន្ទាប់ពី​ក្រុមប្រឹក្សា​ធម្មនុញ្ញ​ដោះស្រាយ​វិវាទ​រឿង​ការ​បោះឆ្នោត​ដែល​ គណបក្ស​ជំទាស់​ថា ​ជា​ការ​ដោះស្រាយ​គ្មាន​យុត្តិធម៌​នោះ។​ ការ​ប្រកាស​នោះ​គឺ ដូច​គ្នា​នឹង​លទ្ធផល​ផ្លូវការ​ដំបូង​គឺ​គណបក្ស​ប្រជាជន​កម្ពុជា​របស់​លោក​នាយក​ រដ្ឋមន្ត្រី​ហ៊ុន សែន​ឈ្នះបាន​៦៨​អាសនៈ​ក្នុងចំណោម​១២៣​អាសនៈ​ក្នុង​សភា​ ហើយ​គណបក្ស​សង្គ្រោះជាតិ​ឈ្នះ​បាន​៥៥​អាសនៈ។​ មេ​ដឹកនាំ​គណបក្ស​ជំទាស់​បាន​ច្រាន​ចោល​ការប្រកាស​នោះ​ភ្លាមៗ ហើយ​អះអាង​ថា​ ប្រសិន​បើគ្មាន​ការ​ដោះ​ស្រាយ​ឲ្យ​បាន​យុត្តិធម៌​ទេ​ ពួកគេ​នឹងមិន​ចូលប្រជុំ​សភា​ឡើយ ​ហើយនឹង​ធ្វើ​មហា​បាតុកម្ម​តវ៉ា​បន្ត​ទៀត។​

លោកសម រង្ស៉ី ​ប្រធាន​គណបក្ស​ជំទាស់​បាន​អះអាង​ថា​ គណបក្ស​លោក​នៅ​តែ​ តវ៉ា​រក​ការ​ណ៍ពិតដែលជា​មូលដ្ឋាន​នៃ​យុត្តិធម៌​ ជាមួយ​នឹង​ការ​ដែលត្រូវ​បង្កើត​ឲ្យ​មាន​គណៈ​កម្មការ​ឯករាជ្យ​មួយ​ដើម្បី​ស៊ើប​អង្កេតរក​ការណ៍​ពិត​ឲ្យអស់​ចិត្ត​ថា​នរណា​ចាញ់​នរណា​ឈ្នះ?​

«បើ​ណៈ​កម្មការ​ឯករាជ្យ​ប្រកាស​ថា ​គណបក្ស​ប្រជាជន​កម្ពុជា​ឈ្នះ ​គណបក្ស​សង្គ្រោះ​ជាតិ​នឹង​ទទួល​ ស្គាល់។​ តែ​ផ្ទុយ​ទៅវិញ​បើ​គណៈ​កម្មការ​ឯករាជ្យ​ប្រកាស​ថា ​គណបក្ស​សង្គ្រោះ​ជាតិ​ឈ្នះ ​យើងក៏​សុំឲ្យ​គណបក្ស​ប្រជាជន​ប្រកាន់​ឥរិយាបទ​ថ្លៃថ្នូរ ​អ្នក​កីឡា​ដូច​យើង​អញ្ចឹង។ ​បើអ្នក​ឯករាជ្យ​ប្រកាស​ថា ​គណបក្ស​ប្រជាជន​ចាញ់​ ហើយ​គណបក្ស​សង្គ្រោះ​ជាតិ​ឈ្នះ ​គណបក្ស​ប្រជាជន​ត្រូវ​ទទួល​ស្គាល់​ជ័យ​ជម្នះ​គណបក្ស​សង្គ្រោះជាតិ​ ហើយ​ត្រូវផ្ទេរ​អំណាច​ដោយ​សន្តិវិធី​មក​គណបក្ស​សង្គ្រោះ​ជាតិ ​ហើយ​ត្រូវ​ដក​កងកម្លាំង​ប្រដាប់​អាវុធ»។​

លោក​កឹម សុខា​ អនុប្រធាន​គណបក្ស​សង្គ្រោះ​ជាតិ​ បាន​បន្ទរ​ថា៖​ «បើ​សិន​គេមិន​ដោះស្រាយ​រហូត​ដល់ថ្ងៃប្រជុំសភា​គឺយើង​មិនចូល​រួម​ប្រជុំ​ទេ​ បើ​គ្មាន​ដំណោះ​ស្រាយ​យុត្តិធម៌​ រក​ការណ៍​ពិត​ជូន​ប្រជាពល​រដ្ឋ។​ យើង​បាន​ធ្វើ លិខិត​ទៅទូល​ថ្វាយ​ព្រះ​មហាក្សត្រ​ដើម្បី​ទូល​លោក​ហើយ​ ដូចដែល​យើង​ធ្លាប់ ដាក់​ញតិ្ត​ ដូច​ញតិ្ត​បាតុកម្ម​ដាក់ថ្វាយ​លោក​ពីរឿងសុំ​ឲ្យលោក​អន្តរាគមន៍​ដើម្បី​ រក​យុត្តិធម៌​ជូនម្ចាស់​ឆ្នោត។​ ហើយ​បើអត់​រក​យុត្តិធម៌​ជូនម្ចាស់​ឆ្នោត​ទេ​គឺ​យើង​ បាន​សម្រេចក្នុង​ថ្នាក់​ដឹកនាំ​យើង​ហើយ​ថា ​យើង​អត់​អាច​ចូល​ប្រជុំសភា​លើក​ដំបូង​នោះ​ទេ»។​

គណបក្ស​ជំទាស់​បាន​អះអាង​ថា ​ក្រុម​ប្រឹក្សា​ធម្មនុញ្ញ​និង​គ.ជ.ប.​បាន​ដោះស្រាយ​ លម្អៀង​ទៅ​រក​គណបក្ស​ប្រជាជន​កម្ពុជា​របស់​លោក​នាយក​រដ្ឋមន្ត្រី​ហ៊ុន ​សែន​ ដោយ​ដោះស្រាយ​តែ​បណ្តឹង​មួយ​ចំនួន​តូច​ក្នុង​ចំណោម​បណ្តឹង​ទាមទារ​យ៉ាង​ ច្រើន​របស់​គណបក្ស​ជំទាស់​ដែល​បាន​ចោទ​ប្រកាន់​អំពី​ការ​លួច​បន្លំ​សន្លឹក​ឆ្នោត ​ជាប្រព័ន្ធ​ ការ​ផ្លាស់ប្តូរ​តួលេខ​ក្នុង​កញ្ចប់​បោះឆ្នោត​ ការ​បំបាត់​និង​លុប​ឈ្មោះ​អ្នក​បោះឆ្នោត​ពី​បញ្ជី​អ្នក​បោះឆ្នោត​ជាង​១​លាន​២​សែន​នាក់​ ការ​ចេញ​ប័ណ្ណ​បោះ ឆ្នោត​ជាច្រើន ​ដែលធ្វើ​ឲ្យ​មាន​ឈ្មោះ​ស្ទួន​ ឬ​ម្នាក់​បោះ​ឆ្នោត​បាន​ច្រើនដង​ ការ​មិន អនុញ្ញាត​ឲ្យមាន​ការ​ត្រួត​ពិនិត្យ​កញ្ចប់​សុវត្ថិភាព​នានា​ ​មិន​ផ្ទៀងផ្ទាត់​សន្លឹក​ឆ្នោត​បាន​ការ ​និង​មិន​បានការ​ដ៏​ទូលំទូលាយ​ និង​ផ្ទៀង​ផ្ទាត់​បញ្ជីឈ្មោះ​ប៉ោង​ក្រោយ​ការ​បោះឆ្នោត​ជា​ដើម។​

ទោះជា​យ៉ាងណា​ក៏ដោយ​ លោក ​អ៊ុត ឈន ​សមាជិក​ក្រុម​ប្រឹក្សា​ធម្មនុញ្ញ​ បាន​ អះអាង​ប្រាប់​វីអូអេ​ថា​ ក្រុម​ប្រឹក្សា​ធម្មនុញ្ញ​បាន​ដោះស្រាយ​ទៅ​តាម​ច្បាប់​តែ​ ប៉ុណ្ណោះ​ ទៅលើ​បណ្តឹង​របស់​គណបក្ស​ជំទាស់​ដោយ​មិន​លម្អៀង​ទេ។

«ក្រុម​ប្រឹក្សា​ធម្មនុញ្ញ​បាន​ធ្វើ​សព្វគ្រប់​ផ្អែក​លើ​មូលដ្ឋាន​ច្បាប់​ដែល​គាត់​បាន​ប្តឹង​ មក។​ អញ្ចឹង​គេ​ផ្អែក​លើ​មូលដ្ឋាន​ច្បាប់​សព្វគ្រប់​ហើយ​ ហើយ​អត់​មាន​រឿង​អ្វី ធ្វើ​លម្អៀង​ទេ​ គឺគេ​លើក​សុទ្ធ​តែ​លើ​មូលដ្ឋាន​ច្បាប់​ទាំង​អស់។​ រួច​គាត់​ចោទ​ថា​ ចំនួន​មនុស្ស​លើស​ចំនួន​មនុស្ស​បាត់។​ រឿង​ហ្នឹង​គេ​សួរ​ថា ​ហ្នក! ​គេ​រៀបចំ​បញ្ជី​បោះឆ្នោត​តាំងពី​ចុងឆ្នាំ​២០១២ ​គេ​ឲ្យ​ទៅមើល។​ គេ​សួរ​ថា​ ហ្អក! ​មនុស្ស​ជ្រលក់​ ទឹក​ខ្មៅ​រលុប​បាន។​ គេសួរ​រក​នៅ​ឯណា?​ វាអត់​មាន​ អត់​មាន​ច្បាស់​ បង្ហាញ​គេ។​អញ្ចឹង​មាន​មូលដ្ឋាន​អ្វីដើម្បី​និយាយ?​ វា​អត់មាន។​ អញ្ចឹង​ចំពោះ​គាត់​តវ៉ា​ នៅ​ក្នុង​ ដំណាក់​កាល​នេះតាម​ជំនាញ​ខ្ញុំមើល​ទៅ​ វាអត់​មាន​មូលដ្ឋាន»។​

ដូចគ្នា​ដែរ ​លោក​អ៊ឹម សួស្តី​ ប្រធាន​គណៈ​កម្មាធិការ​ជាតិ​រៀបចំ​ការ​បោះឆ្នោត​ បាន​អះអាង​ថា​ អ្វី​ដែល​គ.ជ.ប.​បាន​ប្រកាស​លទ្ធផល​គឺ​ជា​ការ​បញ្ចប់​កិច្ចការ​របស់​ ខ្លួន។​ ដោយ​ឡែក​នៅពេល​សួរពី​បញ្ហា​ដែល​គណបក្ស​ជំទាស់​តវ៉ា​មិន​ទទួល​ ស្គាល់​លទ្ធផល​បោះឆ្នោត ​លោក​សួស្តី​អះអាង​ថា ​រឿង​នោះ​មិនមែន​ជា​កិច្ចការ​ របស់​គ.ជ.ប.​ទៀត​ទេ។​

«វា​ហួស​សមត្ថកិច្ច​ខ្ញុំ​ហើយ។​ អ្វី​ដែល​ខ្ញុំបាន​ធ្វើ​គឺ​ទៅ​តាម​ច្បាប់​បាន​ចែង​មក។​ ភារកិច្ច​ដែល​ខ្ញុំ​ធ្វើ​ តួនាទី​ដែល​ខ្ញុំ​ធ្វើ​គឺ​ចប់សព្វ​គ្រប់​របស់ខ្ញុំ​ហើយ។​ ហើយ​ដោយ​ ឡែក​រឿង​អី​ផ្សេង​ទៀត​វាហួស​សមត្ថកិច្ច​ខ្ញុំ​ហើយ»។​

លោក​ជាម យៀប​ មន្ត្រី​ជាន់ខ្ពស់​គណបក្ស​ប្រជាជន​កម្ពុជា ​បាន​ទទួល​ស្គាល់​ លទ្ធផល​នៃ​ការ​បោះឆ្នោត​ ដោយ​អះអាង​ថា​ ​គណបក្ស​ប្រជាជន​កម្ពុជា​ដែល​ឈ្នះ ឆ្នោត​នឹង​អាច​បង្កើត​រដ្ឋាភិបាល​ម្នាក់​ឯងបាន​ដោយ​គ្មាន​ការ​រាំង​ស្ទះ​ទេ​ ទោះជា​គណបក្ស​ជំទាស់​មិន​ចូល​រួម​ក្តី។

«ត្រង់​គាត់​ចូល​មិន​ចូល​មិន​ដឹង​ទេ។​ នៅពេល​ណា​ដែល​ព្រះ​ករុណា​សព្វ​ព្រះរាជ ហរទ័យ​ថា​ លោក​ត្រូវរៀបចំ​កោះ​អញ្ជើញ​នៅពេល​ណា​ ហើយ​សម័យ​ប្រជុំ​លើក​ ដំបូង​របស់​សភា​នៅ​ទីណា​នោះ។ ​ទោះបី​ជា​គេ​ចូល​មិនចូល​ ធ្វើ​ពហិកា​គ្រប់បែប​ យ៉ាង​អី​ក៏ដោយ​ ក៏សភា​អាច​ដំណើរ​ការ​ អត់​មាន​អ្វី​ដែល​មក​រាំង​ស្ទះ​ ដូច​មុនៗ​បាន​ទេ ​ពីព្រោះ​យើង​បាន​ធ្វើ​ធម្មនុញ្ញ​បន្ថែម​នៅក្នុង​ឆ្នាំ​២០០៤​កន្លងមក​ហើយ»។​

លោក​ជាម យៀប​បាន​បន្ត​ថា៖​ «ខ្ញុំសុំ​ជម្រាបថា​ មហា​បាតុកម្ម​ដែល​គណបក្ស​សង្គ្រោះ​ជាតិ​ធ្វើ​នោះ​មិន​មែន​ជា​បញ្ហា​គន្លឹះ​សម្រាប់ដោះស្រាយ​បញ្ហា​ហ្នឹង​បាន​ទេ​ ហើយ​ធ្វើ​ឲ្យ​ខាត​ពេល​វេលា ​ឲ្យខាត​ផល​ប្រយោជន៍​ប្រជាជន​តែ​ប៉ុណ្ណឹង»។​

លោក​បាន​អះអាង​ពីការ​សោកស្តាយ​របស់​លោក​ ដោយ​បញ្ជាក់​ថា ​គណបក្ស​ សង្គ្រោះ​ជាតិ​មិន​គួរ​ចូលរួម​ការ​បោះឆ្នោត​ទេ​ បើ​មិន​ទុកចិត្ត​គ.ជ.ប.​ឬក៏​ក្រុម​ប្រឹក្សា​ ធម្មនុញ្ញ។​

តែ​លោក​ធន សារ៉ាយ​បាន​អះអាង​ថា ​ដំណោះ​ស្រាយ​នយោបាយ​គឺ​ជា​ជម្រើស​ល្អ ​នៅ​ពេល​នេះ ​ដើម្បី​ដោះស្រាយ​វិវាទ​រឿង​បោះឆ្នោត​តាម​រយៈ​ថ្នាក់​ដឹកនាំ​កំពូល​ជួប​ប្រជុំគ្នា ​ដោយសារ​ថា​ យន្តការ​ស្ថាប័ន​ជាតិ​មិន​ទទួល​បាន​ការ​ទុក​ចិត្ត​និង​មិន​អស់​ចិត្ត​ទាំងសង​ខាង​សម្រាប់គណបក្ស​ជំទាស់​និង​គណបក្ស​ប្រជាជន​កម្ពុជា។​

«យើង​ខ្ញុំ​យល់​ថា ​យន្តការ​ដែល​មាន​ក្នុង​ច្បាប់នេះ​ ទាំង​គ.ជ.ប.​ ទាំង​ក្រុមប្រឹក្សា​ ធម្មនុញ្ញ​នេះ​គឺ​មិន​អាច​ផ្តល់​នូវ​យុត្តិធម៌​បាន​អស់​ចិត្ត​ទាំង​អស់​គ្នា​ទេ​ គឺ​បាន​តែ​ ម្ខាង។ ​អញ្ចឹង​យើងខ្ញុំ​យល់​ថា ​ទាល់តែ​មាន​ការ​ដោះស្រាយ​ផ្នែក​នយោបាយ​វិញ​បាន​អាច​ទៅរួច»។​

លោក​ថា ​បើ​គណបក្យ​ប្រជាជន​នៅតែ​ថា ​យក​យន្តការ​ច្បាប់​តាម​រយៈ​គ.ជ.ប.​ក្រុម​ប្រឹក្សា​ធម្មនុញ្ញ​ ដែល​គ្មាន​ការ​ទទួល​ស្គាល់​ពី​គណបក្ស​ជំទាស់​ដដែល​ នោះ​អាច​ធ្វើឲ្យ​មាន​ការ​ប្រទូស​សារាយ​គ្នា​ទៅមុខ​វែងឆ្ងាយ​ទៀត​ រឿង​បង្កើត​សភា​និង រដ្ឋាភិបាល​ ហើយនឹង​មាន​បញ្ហា​រឿង​ភាព​ស្របច្បាប់​ផង​ដែរ​លើឆាក​អន្តរជាតិ​ ដែរ។​

«ហើយ​សភា​ក៏ដូច​រដ្ឋាភិបាល​យើង​ទៅថ្ងៃ​មុខ ​នេះ​ក៏នឹង​មានការ​ជួប​ប្រទះ​នឹង​ បញ្ហា​និត្យា​នុកូល្យភាព​ ក៏ដូចជា​ការ​ទទួល​ស្គាល់ពី​សំណាក់​ជាតិ​ និង​អន្តរ​ជាតិ​ដែរ»។​

លោក​ជាម យៀប​បានអះអាង​ថា​ ជំហរ​របស់​គណបក្ស​ប្រជាជន​កម្ពុជា​គាំទ្រ​ ការ​ជួប​ប្រជុំ​របស់​ថ្នាក់​ដឹកនាំ​កំពូល​នៃ​គណបក្ស​នយោបាយ​ទាំង​ពីរ។​

«អញ្ចឹង​បាន​ជា​ខ្ញុំ​សុំជម្រាបថា​ អ្វីផ្សេងៗ​ទៀត​គឺ​ថា​ស្រេច​ទៅ​លើ​ថ្នាក់​ដឹកនាំ​ គណបក្ស​ប្រជាជន​កម្ពុជា​និង​គណបក្ស​សង្គ្រោះ​ជាតិ​ទេ ​នៅ​ពេលណា​ដែល​ ជួប​គ្នា​ ព្រោះគណបក្ស​ប្រជាជន​កម្ពុជា​ជានិច្ច​ជាកាល​គឺសុំ​បើកទ្វារ​ជានិច្ច​ អត់មាន​បិទ​ទេ»។​

ដោយ​ឡែក​លោក ​កឹម សុខា​បាន​អះអាង​ថា ​គណបក្ស​សង្គ្រោះ​ជាតិ​ក៏​គាំទ្រ​ជំហរ​ ឲ្យ​មាន​ជំនួប​របស់​ថ្នាក់​ដឹកនាំ​កំពូល​ដែរ។​

តាម​ច្បាប់​ប្រទេស​កម្ពុជា​ សមាជិក​សភា​ជាប់ឆ្នោត​ថ្មី​ត្រូវ​កោះ​ប្រជុំ​យ៉ាង​យូរ​៦០​ ថ្ងៃ​ក្រោយ​ការបោះ​ឆ្នោត​គឺ​មាន​ន័យ​ថា​ មុន​ថ្ងៃ​ទី២៨ ​កញ្ញា​ ដើម្បី​បង្កើត​សភា​និង​រដ្ឋាភិបាល​ថ្មី​ កើត​ចេញ​ពីការ​បោះឆ្នោត៕

អត្ថបទ​ទាក់ទង

XS
SM
MD
LG