ភ្នំពេញ —
គណបក្សសង្គ្រោះជាតិបានដឹកនាំមហាបាតុកម្មមួយនៅថ្ងៃសៅរ៍នេះ ដូចការគ្រោងទុក ហើយក៏បានប្តេជ្ញាដឹកនាំមហាបាតុកម្មបន្តទៀត ប្រសិនបើគ្មានការបង្កើតគណៈកម្មការឯករាជ្យដើម្បីដោះស្រាយភាពមិនប្រក្រតីក្នុងការបោះឆ្នោតទៅតាមការទាមទាររបស់ខ្លួនទេនោះ។
គណបក្សសង្គ្រោះជាតិ ដែលដឹកនាំដោយលោក សម រង្ស៊ី និងលោកកឹម សុខាបានដឹកនាំមហាបាតុកម្មមួយដូចដែលខ្លួនបានសន្យា នៅទីលានប្រជាធិបតេយ្យក្នុងរាជធានីភ្នំពេញ នៅថ្ងៃសៅរ៍ទី៧ ខែកញ្ញានេះ ដោយមានអ្នកចូលរួមដែលគេប៉ាន់ស្មានប្រមាណ២ម៉ឺននាក់។
មហាបាតុកម្មដោយសន្តិវិធីនេះបានធ្វើឡើងតែមួយថ្ងៃប៉ុណ្ណោះ មុនពេលគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប.ត្រៀមនឹងប្រកាសលទ្ធផលផ្លូវការនៅថ្ងៃអាទិត្យអំពីការបោះឆ្នោតជ្រើសតាំងតំណាងរាស្ត្រអាណត្តិទី៥កាលពីថ្ងៃទី២៨ ខែកក្កដាកន្លងទៅនេះ។
គណបក្សប្រឆាំងចង់ឲ្យមានការបង្កើតគណៈកម្មាធិការឯករាជ្យមួយដើម្បីដោះស្រាយភាពមិនប្រក្រតីនៃការបោះឆ្នោត ដែលខ្លួនបានរកឃើញយ៉ាងច្រើន បន្ទាប់ពីលទ្ធផលបឋមប្រកាសដោយគ.ជ.ប.បានបង្ហាញថា គណបក្សប្រជាជនកម្ពុជាឈ្នះដោយទទួលបានសំឡេង៦៨អាសនៈ រីឯគណបក្សសង្គ្រោះជាតិទទួលបាន៥៥អាសនៈ។
អ្នកស្រី ហ៊ុយ ម៉ារ៉ាន់គឺជាអាជីវករម្នាក់នៅក្នុងរាជធានីភ្នំពេញ។
«គ.ជ.ប.ប្រកាសលទ្ធផលហ្នឹង ខ្ញុំមិនអាចទទួលយកបានទេ ព្រោះក្រុមគ្រួសារខ្ញុំច្រើនណាស់បោះឆ្នោតជូនគណបក្សសង្គ្រោះជាតិ សូម្បីតែភូមិ ឃុំខ្ញុំ ក៏បោះជូនសង្គ្រោះជាតិច្រើនណាស់ដែរ។ ដល់គ.ជ.ប.ប្រកាសលទ្ធផលបានទៅគណបក្សប្រជាជនកម្ពុជា ខ្ញុំមិនអាចទទួលយកបានទេ។ ហើយខ្ញុំមកបាតុកម្មនេះដើម្បីទាមទារសន្លឹកឆ្នោតរបស់ខ្ញុំដែលបោះឲ្យសង្គ្រោះជាតិ។ ហើយសូមឲ្យគណបក្សសង្គ្រោះជាតិ ជាពិសេសឯកឧត្តម សម រង្ស៊ី ធ្វើជានាយករដ្ឋមន្ត្រី»។
រហូតមកដល់ពេលនេះ ក្រុមប្រឹក្សាធម្មនុញ្ញ និងគ.ជ.ប.បានពិនិត្យដោះស្រាយភាពមិនប្រក្រតីខ្លះប៉ុណ្ណោះនៃភាពមិនប្រក្រតីជាច្រើនដែលលើកឡើងដោយគណបក្សសង្គ្រោះជាតិ។ ប៉ុន្តែគណបក្សនេះបានចោទប្រកាន់ស្ថាប័នទាំងពីរថា លម្អៀងទៅរកគណក្សបក្សកាន់អំណាច។
លោកយឹម សុវណ្ណ គឺជាអ្នកនាំពាក្យរបស់គណបក្សសង្គ្រោះជាតិ។
«ស្ថាប័នទាំងពីរនេះបង្ហាញឲ្យឃើញនូវការធ្វើសេចក្តីសម្រេចដ៏អយុត្តិធម៌សម្រាប់ប្រជាជាតិខ្លួនឯង។ យើងបានឃើញតាមរយៈការកាត់សេចក្តី ការធ្វើសេចក្តីសម្រេចតាំងពីដើមទីរហូតមកទល់ពេលនេះ យើងមិនដែលទទួលបានយុត្តិធម៌ទេ»។
លោកបន្ថែមថា ប្រសិនបើគ.ជ.ប.នៅតែប្រកាសលទ្ធផលផ្លូវការនៃការបោះឆ្នោតនៅថ្ងៃអាទិត្យស្អែកនេះមែន នោះគណបក្សរបស់លោកនឹងបន្តដឹកនាំបាតុកម្មនៅទូទាំងប្រទេសរហូតទាល់តែមានដំណោះស្រាយចំពោះភាពមិនប្រក្រតីនៃការបោះឆ្នោត។
បាតុករខ្លះនិយាយថា ពួកគេនឹងចូលរួមនៅក្នុងមហាបាតុកម្មដែលដឹកនាំដោយគណបក្សនេះតទៅទៀតដោយឥតភ័យខ្លាចអ្វីទាំងអស់ ដើម្បីស្វែងរកយុត្តិធម៌ និងផ្លាស់ប្តូរជីវភាពរស់ឲ្យប្រសើរជាងនេះ។
លោកចាន់ សាំង គឺជាជាងភ្លើងម្នាក់នៅក្នុងទីក្រុងភ្នំពេញ។
«ពីមុនខ្លាចមែន ប៉ុន្តែឥឡូវលែងខ្លាចអស់ហើយ ព្រោះខ្មែរមានអីទៀត? បើក្ររកបាយស៊ីសឹងគ្មានផងហ្នឹង។ ដូចខ្ញុំរាល់ថ្ងៃ កូនពីរ ចិញ្ចឹមលែងចង់រស់ហើយ»។
តាមច្បាប់ ប្រទេសកម្ពុជាត្រូវបង្កើតរដ្ឋសភាថ្មីដោយត្រូវកោះប្រជុំសមាជិកសភាជាប់ឆ្នោតលើកដំបូងឲ្យបានត្រឹមថ្ងៃទី២៨ខែកញ្ញានេះ ដើម្បីឈានទៅបង្កើតរដ្ឋាភិបាលអាណត្តិថ្មី។
ប៉ុន្តែលោកយឹម សុវណ្ណនិយាយថា គណបក្សសង្គ្រោះជាតិនឹងមិនចូលរួមកិច្ចប្រជុំនោះឡើយ ប្រសិនបើគ្មានដំណោះស្រាយចំពោះភាពមិនប្រក្រតីនៃការបោះឆ្នោតជាមុននោះ។
«ដរាបណាយុត្តិធម៌នៅមិនទាន់មានចំពោះម្ចាស់ឆ្នោត ដរាបណាភាពមិនប្រក្រតីមិនត្រូវបានដោះស្រាយ គឺដរាបនោះ អត់មានការជជែកគ្នាអំពីការបង្កើតរដ្ឋសភា ឬរដ្ឋាភិបាលអ្វីទាំងអស់»៕
គណបក្សសង្គ្រោះជាតិបានអះអាងថា ខ្លួននឹងដឹកនាំមហាបាតុកម្មតទៅទៀត បើគ.ជ.ប.នឹងប្រកាសលទ្ធផលផ្លូវការដូចលទ្ធផលបណ្តោះអាសន្នដែលគណៈកម្មាធិការរៀបចំបោះឆ្នោតនេះបានប្រកាសកន្លងមក៕
គណបក្សសង្គ្រោះជាតិ ដែលដឹកនាំដោយលោក សម រង្ស៊ី និងលោកកឹម សុខាបានដឹកនាំមហាបាតុកម្មមួយដូចដែលខ្លួនបានសន្យា នៅទីលានប្រជាធិបតេយ្យក្នុងរាជធានីភ្នំពេញ នៅថ្ងៃសៅរ៍ទី៧ ខែកញ្ញានេះ ដោយមានអ្នកចូលរួមដែលគេប៉ាន់ស្មានប្រមាណ២ម៉ឺននាក់។
មហាបាតុកម្មដោយសន្តិវិធីនេះបានធ្វើឡើងតែមួយថ្ងៃប៉ុណ្ណោះ មុនពេលគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប.ត្រៀមនឹងប្រកាសលទ្ធផលផ្លូវការនៅថ្ងៃអាទិត្យអំពីការបោះឆ្នោតជ្រើសតាំងតំណាងរាស្ត្រអាណត្តិទី៥កាលពីថ្ងៃទី២៨ ខែកក្កដាកន្លងទៅនេះ។
គណបក្សប្រឆាំងចង់ឲ្យមានការបង្កើតគណៈកម្មាធិការឯករាជ្យមួយដើម្បីដោះស្រាយភាពមិនប្រក្រតីនៃការបោះឆ្នោត ដែលខ្លួនបានរកឃើញយ៉ាងច្រើន បន្ទាប់ពីលទ្ធផលបឋមប្រកាសដោយគ.ជ.ប.បានបង្ហាញថា គណបក្សប្រជាជនកម្ពុជាឈ្នះដោយទទួលបានសំឡេង៦៨អាសនៈ រីឯគណបក្សសង្គ្រោះជាតិទទួលបាន៥៥អាសនៈ។
អ្នកស្រី ហ៊ុយ ម៉ារ៉ាន់គឺជាអាជីវករម្នាក់នៅក្នុងរាជធានីភ្នំពេញ។
«គ.ជ.ប.ប្រកាសលទ្ធផលហ្នឹង ខ្ញុំមិនអាចទទួលយកបានទេ ព្រោះក្រុមគ្រួសារខ្ញុំច្រើនណាស់បោះឆ្នោតជូនគណបក្សសង្គ្រោះជាតិ សូម្បីតែភូមិ ឃុំខ្ញុំ ក៏បោះជូនសង្គ្រោះជាតិច្រើនណាស់ដែរ។ ដល់គ.ជ.ប.ប្រកាសលទ្ធផលបានទៅគណបក្សប្រជាជនកម្ពុជា ខ្ញុំមិនអាចទទួលយកបានទេ។ ហើយខ្ញុំមកបាតុកម្មនេះដើម្បីទាមទារសន្លឹកឆ្នោតរបស់ខ្ញុំដែលបោះឲ្យសង្គ្រោះជាតិ។ ហើយសូមឲ្យគណបក្សសង្គ្រោះជាតិ ជាពិសេសឯកឧត្តម សម រង្ស៊ី ធ្វើជានាយករដ្ឋមន្ត្រី»។
រហូតមកដល់ពេលនេះ ក្រុមប្រឹក្សាធម្មនុញ្ញ និងគ.ជ.ប.បានពិនិត្យដោះស្រាយភាពមិនប្រក្រតីខ្លះប៉ុណ្ណោះនៃភាពមិនប្រក្រតីជាច្រើនដែលលើកឡើងដោយគណបក្សសង្គ្រោះជាតិ។ ប៉ុន្តែគណបក្សនេះបានចោទប្រកាន់ស្ថាប័នទាំងពីរថា លម្អៀងទៅរកគណក្សបក្សកាន់អំណាច។
លោកយឹម សុវណ្ណ គឺជាអ្នកនាំពាក្យរបស់គណបក្សសង្គ្រោះជាតិ។
«ស្ថាប័នទាំងពីរនេះបង្ហាញឲ្យឃើញនូវការធ្វើសេចក្តីសម្រេចដ៏អយុត្តិធម៌សម្រាប់ប្រជាជាតិខ្លួនឯង។ យើងបានឃើញតាមរយៈការកាត់សេចក្តី ការធ្វើសេចក្តីសម្រេចតាំងពីដើមទីរហូតមកទល់ពេលនេះ យើងមិនដែលទទួលបានយុត្តិធម៌ទេ»។
លោកបន្ថែមថា ប្រសិនបើគ.ជ.ប.នៅតែប្រកាសលទ្ធផលផ្លូវការនៃការបោះឆ្នោតនៅថ្ងៃអាទិត្យស្អែកនេះមែន នោះគណបក្សរបស់លោកនឹងបន្តដឹកនាំបាតុកម្មនៅទូទាំងប្រទេសរហូតទាល់តែមានដំណោះស្រាយចំពោះភាពមិនប្រក្រតីនៃការបោះឆ្នោត។
បាតុករខ្លះនិយាយថា ពួកគេនឹងចូលរួមនៅក្នុងមហាបាតុកម្មដែលដឹកនាំដោយគណបក្សនេះតទៅទៀតដោយឥតភ័យខ្លាចអ្វីទាំងអស់ ដើម្បីស្វែងរកយុត្តិធម៌ និងផ្លាស់ប្តូរជីវភាពរស់ឲ្យប្រសើរជាងនេះ។
លោកចាន់ សាំង គឺជាជាងភ្លើងម្នាក់នៅក្នុងទីក្រុងភ្នំពេញ។
«ពីមុនខ្លាចមែន ប៉ុន្តែឥឡូវលែងខ្លាចអស់ហើយ ព្រោះខ្មែរមានអីទៀត? បើក្ររកបាយស៊ីសឹងគ្មានផងហ្នឹង។ ដូចខ្ញុំរាល់ថ្ងៃ កូនពីរ ចិញ្ចឹមលែងចង់រស់ហើយ»។
តាមច្បាប់ ប្រទេសកម្ពុជាត្រូវបង្កើតរដ្ឋសភាថ្មីដោយត្រូវកោះប្រជុំសមាជិកសភាជាប់ឆ្នោតលើកដំបូងឲ្យបានត្រឹមថ្ងៃទី២៨ខែកញ្ញានេះ ដើម្បីឈានទៅបង្កើតរដ្ឋាភិបាលអាណត្តិថ្មី។
ប៉ុន្តែលោកយឹម សុវណ្ណនិយាយថា គណបក្សសង្គ្រោះជាតិនឹងមិនចូលរួមកិច្ចប្រជុំនោះឡើយ ប្រសិនបើគ្មានដំណោះស្រាយចំពោះភាពមិនប្រក្រតីនៃការបោះឆ្នោតជាមុននោះ។
«ដរាបណាយុត្តិធម៌នៅមិនទាន់មានចំពោះម្ចាស់ឆ្នោត ដរាបណាភាពមិនប្រក្រតីមិនត្រូវបានដោះស្រាយ គឺដរាបនោះ អត់មានការជជែកគ្នាអំពីការបង្កើតរដ្ឋសភា ឬរដ្ឋាភិបាលអ្វីទាំងអស់»៕
គណបក្សសង្គ្រោះជាតិបានអះអាងថា ខ្លួននឹងដឹកនាំមហាបាតុកម្មតទៅទៀត បើគ.ជ.ប.នឹងប្រកាសលទ្ធផលផ្លូវការដូចលទ្ធផលបណ្តោះអាសន្នដែលគណៈកម្មាធិការរៀបចំបោះឆ្នោតនេះបានប្រកាសកន្លងមក៕
