ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សកម្មជន​បក្ស​សង្គ្រោះជាតិ​​រង​ពិន័យ​ក្នុង​ពន្ធនាគារ​ក្រោយ​ប្រតិកម្ម​​របស់​លោក ហ៊ុន សែន


រូបឯកសារ៖ លោក ​មាជ សុវណ្ណារ៉ា ប្រធាន​នាយកដ្ឋាន​ពត៌មាន​​គណបក្ស​សង្រ្គោះជាតិ​ដែល​ត្រូវ​បាន​តុលាការ​រំលាយ កំពុង​ជាប់ឃុំ​នៅ​ពន្ធនាគារ​ព្រៃស​ត្រូវ​ប៉ូលិស​នាំចូល​បន្ទប់​នៅ​ក្នុង​សាលាឧទ្ទរណ៍​នៅ​ថ្ងៃ​អង្គារ ទី​២៣ ខែ​សីហា ឆ្នាំ​២០១៦។ (VOA)

លោក​ ​មាជ សុវណ្ណារ៉ា​ ​និង​សកម្មជន​គណបក្ស​ប្រឆាំង​ជាង​១០​នាក់​ទៀត ត្រូវ​បាន​សាលា​ដំបូង​រាជធានី​ភ្នំពេញ​ផ្តន្ទា​ទោស​ដាក់​ពន្ធនាគារ​ក្នុង​ម្នាក់ៗ​ពី​៧ ​ទៅ​២០​ឆ្នាំ​ ពី​បទ​ដឹក​នាំ​ ​និង​ចូល​រួម​បាតុកម្ម​​រំដោះ​ទីលាន​ប្រជាធិបតេយ្យ​ ​នៅ​​ខែ​កក្កដា​ ឆ្នាំ​២០១៤។

មន្រ្តី​ជាន់ខ្ពស់​និង​សកម្មជន​គណបក្ស​សង្គ្រោះជាតិ​ជាប់ឃុំ​ជាង​១០​នាក់ ​កំពុង​រង​ពិន័យ​ក្នុង​ពន្ធនាគារ​ ​បន្ទាប់​ពី​លោក​នាយក​រដ្ឋមន្រ្តី​ ​ហ៊ុន សែន​ ​បាន​ធ្វើ​ប្រតិកម្ម​នឹងលោក​ ​មាជ សុវណ្ណារ៉ា​ ​ដែល​ចោទ​ថា​លោក​បាន​លួច​ប្រើប្រាស់​ទូរស័ព្ទ​ចេញពី​ពន្ធនាគារ។​ ​នេះ​បើតាម​ការ​លើក​ឡើង​របស់​លោក​ ​អ៊ូ ច័ន្ទរ័ត្ន​ ​តំណាង​រាស្រ្ត​គណ​បក្ស​ប្រឆាំង​ ​ដែល​ត្រូវ​បាន​តុលាការ​រំលាយ។​

នៅ​ព្រឹក​ថ្ងៃ​ព្រហស្បតិ៍​នេះ​ ​តំណាង​រាស្រ្ត​គណបក្ស​សង្គ្រោះជាតិ៣​រូប​ ​ដែល​ត្រូវ​បាន​តុលាការ​រំលាយ​ និង​ព្យួរសិទ្ធិ​នយោបាយ​ ​រួម​មាន​លោក​ ​អ៊ូ ច័ន្ទរ័ត្ន​ ​លោក​ ​ម៉ៅ មុនីវណ្ណ​ ​និង​លោក​ ​កង គឹមហាក់​ ​បាន​ចូល​សួរ​សុខទុក្ខ​សកម្មជននិង​មន្រ្តី​ជាន់​ខ្ពស់​គណ​បក្ស​នេះជាង​១០​រូប​ដែល​កំពុង​ជាប់​ឃុំ​ក្នុងពន្ធនាគារ​ព្រៃ​ស​ពាក់ព័ន្ធនឹង​បទ​ល្មើស​ផ្សេងៗគ្នា។​

លោក​ ​អ៊ូ ច័ន្ទរ័ត្ន​ ​តំណាង​រាស្រ្តគណបក្ស​ប្រឆាំង​មួយ​រូប​ដែល​ត្រូវ​បាន​តុលាការ​ព្យួរសិទ្ធិ​ធ្វើ​នយោ​បាយរយៈពេល​៥​ឆ្នាំ​ ​ប្រាប់​ ​VOA​ ​នា​រសៀល​ថ្ងៃ​ព្រហស្បតិ៍​នេះ​ថា​ ​លោក​ និង​តំណា​ង​រាស្រ្ត​ពីរ​រូប​ទៀត​បាន​ជួប​ជាមួយ​មន្រ្តី​ជាន់ខ្ពស់​ ​និង​សកម្មជន​ចំនួន​១៤​នាក់​ ​ក្នុង​នោះ​រួម​មាន​លោក​ ​អ៊ុំ សំអាន​ ​ផង​ ​ប៉ុន្តែ​លោក​ថា​ ​មិនមាន​ការ​អនុញ្ញាត​ឲ្យ​ក្រុម​លោក​ជួប​ជាមួយ​លោក​ ​មាជ សុវណ្ណារ៉ា​ ​នោះ​ទេ។​ ​លោក​បន្ថែម​ថា​ ​ទាំង​លោក​ ​មាជ សុវណ្ណារ៉ា​ ​និង​មន្រ្តី​ ​ព្រមទាំង​សកម្មជន​ទាំង​នោះ​ ​កំពុង​រង​ពិន័យ​ ​ក្រោយ​ការធ្វើ​ប្រតិកម្ម​របស់​លោក​នាយក​រដ្ឋមន្រ្តី​ ​ហ៊ុន សែន​ ​កាល​ពីសប្តាហ៍​មុន​ ​លើការ​ប្រើ​ទូរស័ព្ទ​ពី​ក្នុង​ពន្ធនាគារ​របស់​លោក​ ​មាជ សុវណ្ណារ៉ា​។​

លោក ​អ៊ូ ច័ន្ទរ័ត្ន​ ​បញ្ជាក់​ថា៖​

«ពួកគាត់​បាន​ប្រាប់​មក​ខ្ញុំ​ថា​ក្នុង​មួយ​រយៈ​នេះ​អត់បាន​ជួប​ក្រុមគ្រួសារ​ទេ ​ប្រហែល​ ​ជា​១០​ថ្ងៃហើយ​ ​គេ​មិន​ឲ្យ​ជួប។​ ​ហើយទី២​ ​ការ​ផ្លាស់​ប្តូរ​កន្លែង​សម្រាក​របស់​គាត់​ហ្នឹង​ ​ដាក់នៅ​កន្លែង​ដែល​គ្មាន​កង្ហារ មិនឲ្យ​ប្រើប្រាស់​កង្ហារ​ទេ​ ​ហើយ​បច្ចុប្បន្ន​នេះ​វា​មាន​មូស​ច្រើន។​ ​ហើយ​ខ្ញុំ​បាន​ឃើញ​ស្លាក​ស្នាម​ ​គាត់​លាត់​ដៃលាត់​ជើង​អី​ ​ឃើញ​គាត់មាន​មូសខាំ​ច្រើន​មែន។​ ​ហើយទី៣​ ​គ្រប់​បន្ទប់​របស់​ពួកគាត់​ហ្នឹង​សុទ្ធតែ​បំពាក់​កាមេរ៉ា​ ​ហើយគាត់​ថា​វាធ្វើ​ឲ្យ​ប៉ះពាល់​ដល់​ភាព​អៀន​ខ្មាស​របស់​គាត់​ ​ពិបាកផ្លាស់​ខោ​ផ្លាស់​អាវ​ក្តី​ វា​ប៉ះពាល់​ដល់​សិទ្ធិ​ផ្ទាល់​ខ្លួន»។​

លោក​ ​អ៊ូ ច័ន្ទរ័ត្ន​ ​បន្ថែមថា​ ​លោក​ ​និង​អ្នកកំពុង​ជាប់​ឃុំ​ទាំង​ជាង​១០​នាក់​នោះ រំពឹង​ថា​នឹង​អាច​មាន​ការ​ដោះលែង​ ​ឬ​បន្ធូរបន្ថយ​ទោស​ពួកគេ​ក្នុង​ថ្ងៃ​បុណ្យ​ជាតិ​ផ្សេងៗ​នា​ពេល​ខាងមុខ​បន្ទាប់ពី​ពួកគេ​មួយ​ចំនួន​បាន​អនុវត្ត​ទោស​ក្នុង​ពន្ធនាគារ​បាន​២ភាគ៣​រួច​មក​។

លោក​មាន​ប្រសាសន៍​ថា៖​

«បើទុក​ពួកគាត់​យូរ​ពេក​ទៅ​វា​ប៉ះពាល់​ដល់​អនាគត​ផ្ទាល់​ខ្លួនរបស់​គាត់​ ​ក៏​ដូច​ជាក្រុម​គ្រួសារ​ ​ហើយ​អ្នក​ខ្លះ​ក៏​គ្នាទើប​តែមាន​ប្រពន្ធ​ ​មាន​កូន​ ​អី​អញ្ចឹង​ទៅ​ ​វា​ប៉ះពាល់​ដល់​អនាគត​កូន​ប្រពន្ធ​របស់​គាត់​ដែរ។​ ​ហើយ​មនុស្ស​ទាំងអស់​នេះ​ ​មិនមែន​ជា​មនុស្ស​ដែល​កាច​ឃោរ​ឃៅ​ ​កាប់​សម្លាប់​ ​លួច​ប្លន់​អីទេ។​ ហើយ​ជា​មនុស្ស​មាន​ឧត្តមគតិ​ ​មាន​មនសិការ​គិត​គូរ​ពីប្រទេស​ជាតិ។​ ​ដូច្នេះ​អាច​ជា​ធនធាន​មនុស្ស​សម្រាប់​ប្រទេស​ជាតិ​យើង​ដែរ​ មែនទែន​ទៅ​ ​បើ​មាន​ការ​ដោះ​លែង»។​

លោក​ ​មាជ សុវណ្ណារ៉ា​ ​និង​សកម្មជន​គណបក្ស​ប្រឆាំង​ជាង​១០​នាក់​ទៀត ត្រូវ​បាន​សាលា​ដំបូង​រាជធានី​ភ្នំពេញ​ផ្តន្ទា​ទោស​ដាក់​ពន្ធនាគារ​ក្នុង​ម្នាក់ៗ​ពី​៧ ​ទៅ​២០​ឆ្នាំ​ ពី​បទ​ដឹក​នាំ​ ​និង​ចូល​រួម​បាតុកម្មរំដោះ​ទីលាន​ប្រជាធិបតេយ្យ​ ​នៅខែ​កក្កដា​ ឆ្នាំ​២០១៤។​ ​ចំណែក​លោក​ ​អ៊ុំ សំអាន​ ​ត្រូវ​បាន​សមត្ថកិច្ច ចាប់​ខ្លួន​នៅ​លើ​ទឹកដី​ខេត្ត​សៀមរាប កាល​ពី​ថ្ងៃ​ទី​១០ ខែ​មេសា​ ​ឆ្នាំ​២០១៦​ ​ក្រោម​បទ​ចោទ​ ​ញុះ​ញង់​ឲ្យ​ប្រព្រឹត្ត​បទ​ឧក្រិដ្ឋ​ជា​អាទិ៍​និង​បទ​ញុះ​ញង់​ឲ្យ​មាន​ការ​រើស​អើង ​បន្ទាប់​ពី​លោក​បាន​បង្ហោះ​ឯកសារ​ផែនទី​ស្ដី​ពី​ព្រំដែន​កម្ពុជា-វៀតណាម។​

លោក​ ​នុត សវនា​ ​អ្នក​នាំពាក្យ​អគ្គនាយកដ្ឋាន​ពន្ធនាគារ​នៃ​ក្រសួង​មហាផ្ទៃ​ ​ប្រាប់​ ​VOA​ ​ថា​ ​ពន្ធនាគារ​អនុវត្ត​ទៅ​តាម​គោលការណ៍​ ​និង​បទ​បញ្ជា​ផ្ទៃក្នុង​ដែល​បានផ្សព្វផ្សាយ​ដល់​អ្នក​កំពុង​ជាប់ឃុំ​ ឲ្យ​ដឹង​ពីការ​ប្រើ​ប្រាស់​សម្ភារៈ​ដែល​ត្រូវ​បាន​ហាមឃាត់។​ ​លោក​បន្ថែម​ថា​ ​សកម្មជន​ ​និង​អតីតមន្រ្តី​បក្ស​ប្រឆាំង​ទាំង​ជាង​១០​នាក់​នោះ​ ​បានប្រព្រឹត្តល្មើស​នឹងបទបញ្ជា​ ​ដោយ​មានការ​ប្រើប្រាស់​ទូរស័ព្ទ​ ​និង​ប្រើប្រាស់​លុយ​ក្នុង​ពន្ធនាគារ​ជាដើម។​

លោក ​នុត សវនា​ ​បញ្ជាក់​ថា៖​

«ពិន័យ​ហ្នឹង​មាន​ជា​អាទិ៍​ដូចជា​ការ​ផ្អាក​ឲ្យ​មាន​ការ​សួរ​សុខទុក្ខ​ ​ហើយ​បើ​គាត់​កាត់​ទោស​ហើយ​ហ្នឹង​គឺ​យើង​មិន​ដាក់​ឈ្មោះ​គាត់​ ​បើគាត់​គ្រប់លក្ខខណ្ឌក៏​យើង​មិន​ដាក់​ឈ្មោះ​គាត់​ឲ្យ​ទៅ​ទទួល​ការ​លើក​លែង​ ​ឬ​ក៏​បន្ធូរបន្ថយ​ទោស​ដែរ។​ ​ហើយ​និង​ពិន័យ​មួយ​ចំនួន​ទៀត​ទាក់ទង​នឹង​ការ​ចេញ​មក​ហាត់​ប្រាណ​នៅ​ខាងក្រៅអីហ្នឹង​ ​យើង​ឲ្យ​គាត់​នៅ​ក្នុង​បន្ទប់​មិន​ឲ្យ​ចេញ​មក​ក្រៅ។​ ​អាហ្នឹង​ពិន័យ​រូបភាព​អស់ហ្នឹង»។​

លោក​ ​នុត សវនា​ ​បន្ថែមថា​ ​លោក​មិន​ទាន់​អាច​បញ្ជាក់​បាន​ថា​ ​តើ​ពន្ធនាគារ​នឹង​ដាក់​ពិន័យ​អ្នក​ជាប់​ឃុំ​ទាំង​នោះ​រហូត​ដល់​ពេល​ណា​នៅ​ឡើយ។​

លោក​ ​ស៊ឹង សែនករុណា​ ​មន្រ្តី​ផ្នែក​អង្កេតនៃ​សមាគម​ការពារ​សិទ្ធិមនុស្ស​អាដ​ហុក​ ​លើក​ឡើង​ថា ការ​ដាក់​ពិន័យទៅ​លើ​អ្នកជាប់ឃុំ​ដែល​បាន​ប្រើប្រាស់​ទូរស័ព្ទ​ក្នុង​ពន្ធនាគារ​ទាំង​នោះ​ ​គឺជា​ការ​រំលោភ​សិទ្ធិ​មនុស្ស។​ ​លោក​បន្ថែម​ថា​ ​មន្រ្តី​ពន្ធនាគារ​ដែល​ជា​អ្នកឃ្លាំ​មើល​អ្នកជាប់ឃុំ​ ​គួរតែ​ជា​អ្នក​ទទួល​ខុសត្រូវ​ក្នុង​ករណី​នេះ។​

លោក​មាន​ប្រសាសន៍​ថា៖​

«យើង​ដឹង​ហើយ​មុននឹង​ចូល​ទៅ​ដល់​ក្នុងមន្ទីរ​ឃុំឃាំង​ហ្នឹង​ ​ឃើញ​ហើយ​មាន​ការ​ដកហូត​សម្ភារៈ​ផ្សេងៗ​ ​ត្រួត​ពិនិត្យ​ ​ហើយ​ប្តូរ​ផ្លាស់​ខោអាវ​អី​ហ្នឹង​រួច​ស្រេច​ហើយ។​ ​អញ្ចឹង​បើសិនជា​មិនមាន​ចេតនា​ផ្តល់​ ​ឬក៏​មិនផ្តល់​ឱកាស​ពី​អ្នក​ដែល​គាត់​ត្រួតពិនិត្យ​ហ្នឹង​ទេ​ ​ប្រហែល​ជា​មិន​អាច​នាំ​យក​សម្ភារៈ​ផ្សេងៗ​ ​អាច​យក​ទៅ​ប្រើប្រាស់​ក្នុង​ពន្ធនាគារ​ហ្នឹង​បាន​ទេ»។​

ថ្លែង​ក្នុង​ពិធី​ចែក​សញ្ញាបត្រ​មួយ​កាលពី​ចុង​ខែមីនានេះ​ ​លោក​នាយក​រដ្ឋមន្រ្តី​ ​ហ៊ុន សែន​ ​បាន​ប្រកាស​ខ្លាំងៗ​ថា​ ​លោកនឹងមិនស្នើ​ឲ្យ​មាន​ការ​លើកលែង​ ​ឬ​បន្ធូរបន្ថយ​ទោស​ដល់​សកម្មជន​ ​និង​មន្រ្តី​គណបក្ស​ប្រឆាំង​ដែល​កំពុង​ជាប់​ពន្ធនាគារ​នោះ​ទេ។​ ​លោក​នាយក​រដ្ឋមន្រ្តីក៏​បាន​បញ្ជា​ឲ្យសមត្ថ​កិច្ច​ដកហូត​ទូរស័ព្ទ​ពី​លោក​ ​មាជ សុវណ្ណារ៉ា​ ​អតី​តមន្រ្តី​ជាន់​ខ្ពស់​គណបក្ស​សង្គ្រោះជាតិ​ភ្លាមៗ​ ​បន្ទាប់​ពី​លោក​បាន​បញ្ចេញ​ប្រតិកម្មទៅ​នឹងលោក​ ​មាជ សុវណ្ណារ៉ា​ ​ថា​ ​បាន​ប្រើប្រាស់​ទូរស័ព្ទ​ធ្វើ​នយោបាយ​ចេញ​ពី​ក្នុង​ពន្ធនាគារ៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG