លោកប្រធានាធិបតីស.រ.អា. បារ៉ាក់ អូបាម៉ា បានមានប្រសាសន៍ថាស.រ.អា. «ត្រូវតែទប់ទល់ជាមួយនឹងអ្វីដែលជម្រុញឲ្យស.រ.អា.ធ្វើហួសពីសមត្តភាពខ្លួន» នៅពេលអាមេរិកចូលពាក់ព័ន្ធក្នុងវិបត្តិសាកល។
នៅពេលលោកចេញផ្សាយឯកសារថ្មីមួយគូសបញ្ជាក់យុទ្ធសាស្ត្រសន្តិសុខជាតិរបស់លោក លោកអូបាម៉ាបានមានប្រសាសន៍ថា «ប្រទេសអាមេរិកដឹកនាំចេញពីគោលជំហរនៃភាពរឹងមាំ។ ដោយសារយើងមានអំណាចខ្លាំងនៅពេលនះនិងនៅតែមានទៀត ប្រភពធនធាននិងឥទ្ធិពលរបស់យើងមិនមែនគ្មានព្រំដែនទេ។ហើយនៅក្នុងពិភពលោកដែលស្មុគស្មាញនេះ បញ្ហាសន្តិសុខជាច្រើនដែលយើងប្រឈមមុខមិនអាចដោះស្រាយបានឆាប់រហ័សនិងដោយងាយទេ»។
ឯកសារដែលមាន៣៥ទំព័រនេះត្រូវផ្សព្វផ្សាយកាលពីថ្ងៃសុក្រដោយគ្មានការកែប្រែធំៗទេ ក៏ប៉ុន្តែឯកសារនេះបំភ្លឺអំពីរបៀបដោះស្រាយឧបសគ្គមួយចំនួនរបស់ស.រ.អា.ចាប់តាំងពីការប្រយុទ្ធប្រឆាំងនឹងក្រុមជនសកម្មប្រយុទ្ធរដ្ឋអ៊ីស្លាមរហូតដល់សកម្មភាពរបស់រុស្សីក្នុងប្រទេសអ៊ុយក្រែន និងការលេចទ្បើងនៃអំណាចរបស់ប្រទេសចិន។
នៅក្នុងសេចក្តីផ្តើមរបស់លោក លោកប្រធានាធិបតីអូបាម៉ាបានមានប្រសាសន៍ថាស.រ.អា.មិនគួរពឹងពាក់តែទៅលើកម្លាំងយោធាតែមួយទេ ហើយលោកបានគូសបញ្ជាក់ថាស.រ.អា «ខ្លាំងជាងមុននៅពេលយើងរៀបចំសកម្មភាពជាប្រព័ន្ធ»។ នៅក្នុងការប្រយុទ្ធប្រឆាំងនឹងភេរវកម្ម លោកប្រធានាធិបតីបានមានប្រសាសន៍ថាស.រ.អា.បានងាកចេញពីការធ្វើសង្គ្រាមដែលមានទំហំធំធេង ហើយស្វែងរកកិច្ចប្រតិបត្តិការប្រឆាំងនឹងភេរវកម្មដែលមានទិសដៅនិងសកម្មភាពរួមគ្នាជាមួយដៃគូសាកល។ លោកប្រធានាធិបតីអូបាម៉ាបានមានប្រសាសន៍ថាការគំរាមកំហែងនៃការវាយប្រហារភេរវកម្មប្រកបដោយ «មហន្តរាយ» ប្រឆាំងនឹងស.រ.អា.បានថយចុះហើយ ក៏ប៉ុន្តែនៅតែមានតទៅទៀត។
ក្រុមមន្ត្រីជាន់ខ្ពស់មួយចំនួននៃរដ្ឋបាលលោកអូបាម៉ាបានចេញសេចក្តីថ្លែងការណ៍គាំទ្រគោលនយោបាយសន្តិសុខថ្មីនេះនៅពេលវាត្រូវបានចេញផ្សាយ៕