លោកប្រធានាធិបតីស.រ.អា.បារ៉ាក់អូបាម៉ា បានបញ្ជូនសំណើចំណាយ៤លានលានដុល្លារទៅឲ្យសភាដែលអំពាវនាវឲ្យមានការបង្កើនពន្ធដារលើពួកជនមានធនធានច្រើនក្នុងឆ្នាំ២០១៦ ការបញ្ឈប់ការកាត់ចំណាយជាចាំបាច់និងការផ្តល់ប្រាក់ច្រើនជាងមុនសម្រាប់ជួយប្រជារាស្ត្រអាមេរិកាំងថ្នាក់កណ្តាលដែលមានបញ្ហាហិរញ្ញវត្ថុ។
លោកប្រធានាធិបតីអាមេរិកាំងរូបនេះមកពីគណបក្សប្រជាធិបតេយ្យបានទទួលស្គាល់កាលពីថ្ងៃច័ន្ទថា សំណើរបស់លោកនឹងមានការជំទាស់ខ្លាំងពីពួកសាធារណរដ្ឋនៅក្នុងសភា។ ក៏ប៉ុន្តែ លោកបានមានប្រសាសន៍ថា ប្រទេសនេះមាន«ជម្រើសសំខាន់ៗខ្លះត្រូវធ្វើអំពីថាតើ យើងចង់បានប្រទេសនេះទៅជាបែបណា»។
លោកប្រធានាធិបតីអូបាម៉ាបានសួរពួកបុគ្គលិករដ្ឋាភិបាលមួយក្រុមនៃក្រសួងសន្តិសុខមាតុភូមិថា «តើយើងនឹងទទួលយកសេដ្ឋកិច្ចមួយដែលមនុស្សមួយចំនួនតូចក្នុងបណ្តាពួកយើងមានធនធានច្រើនអស្ចារ្យឬមួយយើងនឹងកសាងសេដ្ឋកិច្ចមួយដែលប្រជារាស្ត្រគ្រប់គ្នាដែលឧស្សាហ៍ធ្វើការងារមានឱកាសមួយដើម្បីលូតលាស់ទៅមុខ?»
ជាមួយសេដ្ឋកិច្ចស.រ.អាដែលជាសេដ្ឋកិច្ចធំជាងគេបំផុតក្នុងពិភពលោកកំពុងល្អប្រសើរជាងមុនជាលំដាប់ លោកអូបាម៉ាអំពាវនាវឲ្យមានការយកពន្ធដារ១៤ភាគរយលើប្រាក់កម្រៃរបស់ក្រុមហ៊ុនដែលទៅរកស៊ីនៅក្រៅប្រទេស។
ពន្ធដារនេះអាចជួយផ្តល់ប្រាក់ជិត៥០០ពាន់លានដុល្លារក្នុងការកែលម្អមហាវិថីធំរបស់ប្រទេសជាតិ ជួសជុលស្ពានចាស់ៗនិងហេដ្ឋារចនាសម្ព័ន្ធសំខាន់ៗឯទៀតៗ ចំណែកឯវិក័យបត្រធំជាងនេះសម្រាប់ពួកអ្នកបង់ពន្ធដារមានធនធានច្រើននឹងផ្តល់ប្រាក់៣០០ពាន់លានដុល្លារសម្រាប់ការសម្រាលពន្ធដារឲ្យប្រជារាស្ត្រអាមេរិកាំងមានឋានៈកណ្តាល៕
