អតីតប្រធានាធិបតីសហរដ្ឋអាមេរិក លោក បារ៉ាក់ អូបាម៉ា បានវិលត្រឡប់ទៅកាន់រដ្ឋធានីហ្សាការតា ជារដ្ឋធានីនៃប្រទេសឥណ្ឌូនេស៊ីដែលលោកបានហៅថាផ្ទះរបស់លោក ដែលជាផ្នែកមួយនៃជីវិតកុមារភាពរបស់លោកដើម្បីធ្វើសុន្ទរកថាដ៏សំខាន់នៅឯសមាជលើកទី៤ របស់ជនជាតិឥណ្ឌូនេស៊ីដែលរស់នៅក្រៅប្រទេស។
លោក អូបាម៉ា បានធ្វើការប្រៀបធៀបគ្នារវាងប្រទេស២ គឺសហរដ្ឋអាមេរិកនិងឥណ្ឌូនេស៊ីដែលមានជនជាតិចម្រុះជាតិសាសន៍ច្រើន ហើយបានអំពាវនាវដល់យុវជនក្មេងៗឲ្យធ្វើការប្រយុទ្ធដើម្បីលទ្ធិប្រជាធិបតេយ្យ។ លោកបានថ្លែងយ៉ាងយូរស្តីពីតម្លៃនៃរបបពហុបក្ស ការអត់ឱន និងភាពចម្រុះខាងសាសនា។សុន្ទរកថារបស់លោកហាក់ដូចជាធ្វើឲ្យខ្ទរខ្ទារក្នុងរដ្ឋធានីហ្សាការតា ជាទីក្រុងមួយដែលមានការរំជើបរំជួលកាលពីឆ្នាំកន្លងទៅ ដោយសារការបោះឆ្នោតជ្រើសរើសអភិបាលក្រុង។
សន្និសីទដែលលោកបានថ្លែងនោះត្រូវបានរៀបចំឡើងកាលពីថ្ងៃសៅរ៍ដោយជនជាតិឥណ្ឌូនេស៊ីមកពីទូទាំងពិភពលោក។ យោងតាមអ្នករៀបចំកម្មវិធីបានប្រាប់ឲ្យដឹងថា មានជនជាតិឥណ្ឌូនេស៊ីមកពីប្រទេសចំនួន៥៥។
បន្ទាប់ពីការរំលឹកអំពីកុមារភាពរបស់លោកនៅក្នុងសង្កាត់ Menteng Dalam នៃរដ្ឋធានីហ្សាការតា ហើយនិងចែករំលែកពីការនិយមចូលចិត្តម្ហូបអាហារក្នុងស្រុកដែលលោកបានភ្លក់រស់ជាតិនៅពេលការឈប់សម្រាករបស់ក្រុមគ្រួសារលោក លោកអូបាម៉ាបាននិយាយពីតម្លៃនៃជនជាតិចម្រុះជាតិសាសន៍ទាំងនៅក្នុងសហរដ្ឋអាមេរិកនិងប្រទេសឥណ្ឌូនេស៊ី។ ដោយមិននិយាយឡើងវិញពីការបោះឆ្នោតនៅក្នុងរដ្ឋធានីហ្សាការតាឬការបោះឆ្នោតប្រធានាធិបតីអាមេរិកកាលពីពេលថ្មីៗនេះ លោក អូបាម៉ា បានប្រកាសប្រឆាំងនយោបាយប្រកាន់និកាយសាសនា។
លោកអតីតប្រធានាធិបតីអូបាម៉ាបានមានប្រសាសន៍ថា៖ «យើងចាប់ផ្តើមឃើញការងើបឡើងនូវនយោបាយប្រកាន់និកាយសាសនា យើងចាប់ផ្តើមឃើញការ ងើបឡើងនូវភាពគគ្លើនខាងជាតិនិយម យើងចាប់ផ្តើមឃើញទាំងនៅក្នុងប្រទេសអភិវឌ្ឍន៍ និងប្រទេសកំពុងអភិវឌ្ឍន៍នូវការកើនឡើងនូវភាពមិនសប្បាយចិត្តអំពីក្រុមជនជាតិភាគតិច ហើយនិងការធ្វើបាបមនុស្សដែលមិនដូចយើងឬប្រកាន់ជំនឿសាសនាដូចយើង»៕