ភ្ជាប់​ទៅ​គេហទំព័រ​ទាក់ទង

កូរ៉េខាងជើង​អះអាង​ថា សហរដ្ឋអាមេរិក​បាន​ប្រកាស​សង្គ្រាម


លោក Ri Yong Ho រដ្ឋមន្ត្រី​ការបរទេស​កូរ៉េខាងជើង​ថ្លែង​នៅ​ខាង​ក្រៅ​សណ្ឋាគារ U.N. Plaza នៅ​ក្នុង​បុរី​ញូវយ៉ក កាលពី​ថ្ងៃទី២៥ ខែកញ្ញា ឆ្នាំ២០១៧។

លោក Ri Yong Ho រដ្ឋមន្ត្រី​ការបរទេស​កូរ៉េខាងជើង​និយាយ​ថា សហរដ្ឋអាមេរិក​បាន​ប្រកាស​សង្គ្រាម​ជាមួយ​នឹង​ប្រទេស​របស់​លោក ហើយ​រដ្ឋាភិបាល​ក្រុង​ព្យុងយ៉ាង​នឹង​ចាត់​វិធានការ​តបត​វិញ ប្រសិន​បើ​មាន​ការ​គំរាមកំហែង ដោយរួម​ទាំង​ការ​ចាត់​វិធានការ​បាញ់​ទម្លាក់​យន្តហោះ​ចម្បាំង​អាមេរិក​ដែល​ហោះ​នៅ​ក្នុង​តំបន់​របស់​ខ្លួន​ផង​ដែរ។

លោក Ri និយាយ​ភ្ជាប់អត្ថាធិប្បាយ​របស់​លោក​ប្រធានាធិបតី​អាមេរិក ដូណាល់ ត្រាំ នៅ​លើ​បណ្តាញ​សង្គម Twitter ទៅ​នឹង​ការ​គំរាមកំហែង​នេះ។ ឆ្លើយតប​ទៅ​នឹង​សុន្ទរកថា​របស់​លោក Ri នៅ​ក្នុង​អង្គ​ប្រជុំ​មហាសន្និបាត​អង្គការ​សហប្រជាជាតិ​ លោក ត្រាំ បាន​សរសេរ​ថា «ទើប​តែ​បាន​ឮ​រដ្ឋមន្ត្រី​ការបរទេស​កូរ៉េខាងជើង​ថ្លែង​សុន្ទរកថា​នៅ​ឯ​អង្គការ​សហប្រជាជាតិ។​ ប្រសិន​បើ​គាត់​និយាយ​តាម​អ្វី​ដែល​ប្រធានាធិបតី​របស់​គាត់​គិត នោះ​ពួកគេ​នឹង​មិន​នៅ​បាន​យូរ​នោះ​ទេ»។

កាល​ពី​ថ្ងៃ​ចន្ទ រដ្ឋមន្ត្រី​ការបរទេស​កូរ៉េខាងជើង​បាន​ឆ្លើយតប។

លោក Ri បាន​ថ្លែង​ទៅ​កាន់​អ្នក​សារព័ត៌មាន​នៅ​ក្រៅ​សណ្ឋាគារ​នៅ​ទីក្រុង New York ដែល​លោក​ស្នាក់​នៅ​ថា «យោង​តាម​អត្ថាធិប្បាយ​ដែល​និយាយ​ចេញ​ពី​ជន​ម្នាក់​ដែល​កំពុង​តែ​កាន់​តំណែង​ជា​ប្រធានាធិបតី​អាមេរិក នេះ​ស​បញ្ជាក់​យ៉ាង​ច្បាស់​ថា គឺ​ជា​ការ​ប្រកាស​សង្គ្រាម។ ប្រទេស​ទាំងអស់​ដែល​ជា​សមាជិក​អង្គការ​សហប្រជាជាតិ​ និង​ពិភពលោក​ទាំង​មូល​គួរ​តែ​ចងចាំ​យ៉ាង​ច្បាស់​ថា សហរដ្ឋអាមេរិក​ទេ​ដែល​ជា​អ្នក​ប្រកាស​សង្គ្រាម​ជាមួយ​នឹង​ប្រទេស​របស់​យើង»។

លោកស្រី Sarah Sanders មន្ត្រី​ទំនាក់ទំនង​របស់​សេតវិមាន​បាន​និយាយ​ថា «យើង​មិន​បាន​ប្រកាស​សង្គ្រាម​ជាមួយ​នឹង​កូរ៉េខាងជើង​នោះ​ទេ»។ លោកស្រី​បាន​បន្ថែម​ទៀត​ថា ការ​លើកឡើង​យ៉ាង​ដូច្នេះ​គឺ​ «មិន​សមហេតុផល​ទាល់​តែ​សោះ»៕

XS
SM
MD
LG