រដ្ឋមន្ត្រីក្រសួងមហាផ្ទៃលោកស ខេងបានហៅរបាយការណ៍ព័ត៌មានពាក់ព័ន្ធនឹងការបូមឈាមបុរសជនជាតិចិនម្នាក់និងស្ត្រីថៃម្នាក់ដែលត្រូវបានគេសង្គ្រោះចេញពីប្រទេសកម្ពុជាកាលពីខែមីនានោះថាជា«ព័ត៌មានក្លែងក្លាយ»និងធ្វើឱ្យខូចខាតមុខមាត់ប្រទេសកម្ពុជា។
ព័ត៌មានក្លែងក្លាយដែលលោកស ខេងបានលើកឡើងខាងលើនោះត្រូវបានបណ្តាញព័ត៌មានក្នុងប្រទេសកម្ពុជានិងប្រព័ន្ធផ្សព្វផ្សាយនៅប្រទេសថៃរាយការណ៍ចន្លោះខែកុម្ភៈនិងខែមីនាឆ្នាំ២០២២។
ក្នុងសន្និបាតប្រចាំឆ្នាំរបស់អគ្គនាយកដ្ឋានអន្តោប្រវេសន៍ធ្វើឡើងកាលពីថ្ងៃពុធលោក ស ខេងប្រាប់ក្រុមមន្ត្រីកម្ពុជាថាការផ្សព្វផ្សាយកន្លងមកពាក់ព័ន្ធនឹងបុរសជនជាតិចិននោះបានបង្កការភាន់ច្រឡំដែលតោងឱ្យលោកត្រូវទាក់ទងជាមួយអាជ្ញាធរសន្តិសុខប្រទេសចិនដើម្បីផ្តល់ការបំភ្លឺនិងច្រានចោលព័ត៌មានមិនពិតនេះ។
លោករដ្ឋមន្ត្រីថ្លែងថា៖ «អាហ្នឹងយើងបានធ្វើការស្រាវជ្រាវយ៉ាងហ្មត់ចត់ទៅគឺជាព័ត៌មានមិនពិតបាទ។ព័ត៌មានក្លែងក្លាយ។វាប្រតិដ្ឋឡើង។ប៉ុន្តែទោះបីពិនិត្យយ៉ាងម៉េចក៏ដោយគឺនៅស្រុកចិនបានផ្សាយគឺថាទូទាំងប្រទេសចិនហើយអ្នកដែលcomment[ផ្តល់យោបល់]អីណារាប់លាននាក់…រាប់សិបលាននាក់នៅស្រុកចិនផ្សាយតាមប្រព័ន្ធទំនាក់ទំនងសង្គមហ្នឹង។ ប៉ុន្តែធាតុពិតវាអាfake news [ព័ត៌មានក្លែងក្លាយ]ហ្នឹងសោះ…ព័ត៌មានក្លែងក្លាយ»។
លោកបន្ថែមថា៖«បានន័យថាជាព័ត៌មានប្រតិដ្ឋ។ អ្នកហ្នឹងរកទៅថា ចូលទៅកម្ពុជាខុសច្បាប់ហើយពេលមានបញ្ហាទៅដេកនៅមន្ទីរពេទ្យគេយកឈាមទៅពិនិត្យធម្មតាតែមិនអ៊ីចឹងថាយកឈាមទៅលក់។អ៊ីចឹងវាខូចកិត្តិយសមុខមាត់ខ្មែរយើង….មិនធម្មតាទេ»។
ពាក់ព័ន្ធនឹងស្ត្រីជនជាតិថៃដែលត្រូវគេសង្គ្រោះចេញពីកម្ពុជាកាលពីខែមីនាលោក ស ខេង ថ្លែងថាលោកបានស្នើឱ្យអគ្គស្នងការនគរបាលជាតិនាយឧត្តមសេនីយ៍នេត សាវឿនចាត់សមត្ថកិច្ចជំនាញទាក់ទងអាជ្ញាធរថៃនៅទីក្រុងបាងកកឱ្យបំភ្លឺរឿងស្ត្រីជាតិថៃដែលត្រូវគេរាយការណ៍ស្រដៀងគ្នានឹងរឿងរបស់បុរសជនជាតិចិននោះដែរ។
បើតាមលោក ស ខេង ក្រោយមកអាជ្ញាធរថៃបានបញ្ជាក់ថាព័ត៌មានអំពីស្ត្រីជនជាតិថៃនោះក៏ជាព័ត៌មានក្លែងក្លាយផងដែរ។
លោកស ខេងលើកឡើងថា៖«ដូចគ្នារឿង… ប្រហែលគ្នាហ្នឹងហ្មង។ ហើយថា មានជនជាតិថៃម្នាក់ហ្នឹងគឺនាំនាងហ្នឹងមករកការងារធ្វើនៅប៉ោយប៉ែតហើយបន្ទាប់មកទៀតថានៅភ្នំពេញ។ បើតាមចម្លើយថាទៅដល់កំពង់សោមប៉ុន្តែការណ៍ពិតទៅអត់ដល់កំពង់សោមទេ។វាទៅអ៊ីចឹង!ហើយថា គេយកមកបូមឈាមទៅលក់។ ហើយរឿងដូចងាយៗណាស់! រួចហើយគ្រាន់តែមួយភ្លែតចុះពីលើឡានទៅទាក់ទងសង្សារទាក់ទងអី។ ខ្ញុំមើលទៅរឿងដូចមិនស្រូវស្រួលទេមើលទៅ!ឱ្យឆែកមើលមែនទែន!មើលទៅអ្នកសួរយើងជួនអីគ្នាខ្វះជំនាញដែរ»។
លោករដ្ឋមន្ត្រីមហាផ្ទៃបន្ថែមថា៖ «អ៊ីចឹងបានឱ្យវឿនចាត់អ្នកជំនាញមែនទែន សហការជាមួយខាងនគរបាលបាងកកថៃ។ ខាងថៃហ្នឹងគឺខាងនគរបាលថៃហ្នឹងគាត់ក៏សហការជាមួយយើងល្អដែរ….ដល់បញ្ជាក់ឡើងវិញបានព្រមព្រៀងឯកភាពថាអ្ហូ៎អាហ្នឹង fake news [ព័ត៌មានក្លែងក្លាយ]ដែរ…ប្រតិដ្ឋតែហ្មង!ប្រតិដ្ឋរឿង!អាហ្នឹងសុទ្ធតែទាសករលក់ឈាម រឿងអ៊ីចឹង»។
កាលពីខែមីនាកាសែតអនឡាញថៃមួយឈ្មោះ Thai Examiner បានចេញសេចក្តីរាយការណ៍មួយបង្ហាញថាមានស្ត្រីជនជាតិថៃមួយរូបត្រូវបានសង្គ្រោះដោយអាជ្ញាធរកម្ពុជាក្រោយទំនាក់ទំនងរបស់ស្ត្រីរូបនោះជាមួយស្ត្រីថៃម្នាក់ទៀតបន្ទាប់ពីគាត់ត្រូវបានគេល្បួងឱ្យមកធ្វើការនៅមណ្ឌលផ្តល់សេវាទូរសព្ទខុសច្បាប់មួយក្នុងក្រុងព្រះសីហនុដែលធ្វើប្រតិបត្តិការដោយក្រុមមួយដែលប៉ូលិសថៃអះអាងថា ជាក្រុមជនអន្ធពាលចិន។
បើតាមសារព័ត៌មានអនឡាញថៃ Thai Examiner នៅពេលស្ត្រីរូបនោះទៅដល់ប្រទេសថៃគាត់បានប្រាប់ប៉ូលិសថៃថាគាត់បានប្រឈមមុខនឹងការប៉ុនប៉ងវះកាត់យកសរីរាង្គដោយក្រុមជនអន្ធពាលចិនដែលគាត់ចោទថាបានបូមយកឈាមគាត់ប្រមាណ៣ទៅ៤ប្លោកផងដែរ។
របាយការណ៍របស់ប្រព័ន្ធផ្សព្វផ្សាយអំពីស្ត្រីជនជាតិថៃរូបនេះកើតមានឡើងមួយខែក្រោយពីបុរសជនជាតិចិនមួយរូបត្រូវបណ្តាញព័ត៌មានក្នុងស្រុកគឺសំឡេងប្រជាធិបតេយ្យ(VOD)រាយការណ៍ថា ត្រូវបានគេបង្ខាំងនិងបូមឈាមខ្សោះខ្លួននៅតំបន់ China Town ដ៏អាស្រូវមួយជិតឆ្នេរអូត្រេះខេត្តព្រះសីហនុ។
ក្រោយមានការចេញផ្សាយដំណឹងនោះនគរបាលកម្ពុជាបានបើកការស្រាវជ្រាវហើយបានរកឃើញថាព័ត៌មានខាងលើនោះជា«ព័ត៌មានប្រតិដ្ឋ»ដែលត្រូវបានរៀបចំដោយជនជាតិចិនឈ្មោះLi Ya Yuan Lun ភេទប្រុសអាយុ៣១ឆ្នាំនិងអ្នកពាក់ព័ន្ធចំនួន៣នាក់ផ្សេងទៀត។
នាយករងទទួលបន្ទុកឃ្លាំមើលសិទ្ធិមនុស្សនៃអង្គការលីកាដូលោក អំ សំអាត ប្រាប់វីអូអេនៅថ្ងៃព្រហស្បតិ៍ថាអាជ្ញាធរកម្ពុជាគួរបើកការស៊ើបអង្កេតឱ្យបានហ្មត់ចង់ក្នុងសំណុំរឿងខាងលើនិងបង្ហាញលទ្ធផលជាក់លាក់មួយដល់សាធារណជនទូទៅដើម្បីធានាថា កម្ពុជាមិនមែនជាទីតាំងសម្រាប់ប្រតិបត្តិការសកម្មភាពឧក្រិដ្ឋកម្មឆ្លងដែនដូចជាការចាប់ជំរិតតាមប្រព័ន្ធអ៊ីនធើណិតឬក៏ការបង្ខាំងឱ្យធ្វើពលកម្មជាដើម។
លោកបញ្ជាក់ថា៖ «គឺត្រូវបើកកិច្ចសហប្រតិបត្តិការហើយធ្វើការស៊ើបអង្កេតឱ្យបានហ្មត់ចត់ដើម្បីទប់ស្កាត់និងបង្ការរាល់ទម្រង់បទល្មើសឧក្រិដ្ឋនិងបទល្មើសផ្សេងទៀតរវាងជនបរទេសឬនឹងជនបរទេសដែលកើតឡើងនៅក្នុងប្រទេសកម្ពុជាហើយនឹងជនដែលពាក់ព័ន្ធនៅក្នុងករណីហ្នឹង»។
យ៉ាងណាក៏ដោយអ្នកនាំពាក្យក្រសួងមហាផ្ទៃលោកនាយឧត្តមសេនីយ៍ខៀវ សុភ័គអះអាងថា អាជ្ញាធរមានសមត្ថកិច្ចកម្ពុជាបានបើកការស៊ើបអង្កេតនិងបង្រ្កាបជនដែលប្រតិដ្ឋព័ត៌មានខាងលើដោយមានកិច្ចសហការពីប្រទេសពាក់ព័ន្ធ។
នៅក្នុងសំណុំរឿងស្ត្រីជនជាតិថៃលោក ខៀវ សុភ័គ ថា អាជ្ញាធរថៃបានសម្រេចដាក់ស្ត្រីរូបនោះក្នុងពន្ធនាគារចំពោះព័ត៌មានដែលនាងបានប្រតិដ្ឋឡើងដើម្បីឱ្យមានការជួយយកនាងចេញពីកម្ពុជា។ លោកថ្លែងថា៖«នារីហ្នឹងត្រូវបានសមត្ថកិច្ចថៃគេ…គេចាត់ចែងតាមច្បាប់របស់ថៃហើយដូចជាត្រូវជាប់គុក…ជាប់ទោសនៅថៃហ្នឹងហើយ…ជាប់គុកនៅថៃ។ពីពេលចេញទៅពេលខាងកម្ពុជាយើងស្នើឱ្យស៊ើបអង្កេតឡើងវិញរឿងហ្នឹងគាត់និយាយ…គាត់សារភាព។ គាត់ជាប់ទោសនៅថៃបើតាមពូដឹង»។
ទាក់ទិនករណីបូមឈាមបុរសជនជាតិចិនម្នាក់នៅខេត្តព្រះសីហនុ លោក ខៀវ សុភ័គ បញ្ជាក់ថាបុរសរូបនោះនិងអ្នកពាក់ព័ន្ធ៣នាក់ទៀតត្រូវបានអាជ្ញាធរចាប់ខ្លួននិងបញ្ជូនទៅតុលាការរង់ចាំការកាត់ទោស។
លោក ខៀវ សុភ័គ ស្នើថា អង្គការសង្គមស៊ីវិលគួរជួយផ្សព្វផ្សាយអ្វីដែលអាជ្ញាធរមានសមត្ថកិច្ចកម្ពុជាបានធ្វើកន្លងមកជាជាងគ្រាន់តែលើកសំណើឡើង៕
