រដ្ឋាភិបាលទីក្រុងភ្នំពេញបានប្រកែកមិនទទួលស្គាល់សេចក្តីរាយការណ៍របស់កាសែតថៃមួយដែលថា មានស្ត្រីជនជាតិថៃមួយរូបបានប្រឈមមុខនឹងការប៉ុនប៉ងវះកាត់យកសរីរាង្គ នៅពេលស្ត្រីរូបនោះ ត្រូវបានគេល្បួងឱ្យមកធ្វើការនៅមជ្ឈមណ្ឌលផ្តល់សេវាទូរសព្ទខុសច្បាប់មួយ ដែលធ្វើប្រតិបត្តិការដោយក្រុមមួយដែលប៉ូលិសថៃ អះអាថា ជាក្រុមជនអន្ធពាលចិន។
សេចក្តីរាយការណ៍ខាងលើត្រូវបានធ្វើឡើង កាលពីថ្ងៃទី ១២ ខែមីនា ឆ្នាំ ២០២២ ដោយសារព័ត៌មានអនឡាញរបស់ថៃ Thai Exminer ដែលចេញផ្សាយដំណឹងសម្រាប់ជនជាតិបរទេស។ សេចក្តីរាយការណ៍ខាងលើត្រូវក្រសួងការបរទេស និងសហប្រតិបតិ្តការអន្តរជាតិកម្ពុជាច្រានចោលភ្លាមៗថា មិនពិត និងគ្មានមូលដ្ឋាន។
បើតាមសេចក្តីបំភ្លឺរបស់អ្នកនាំពាក្យក្រសួងការបរទេសកម្ពុជាលោក ជុំ សុន្ទរី អាជ្ញាធរមានសមត្ថកិច្ចខេត្តព្រះសីហនុ បានប្រកាសបដិសេធរួចហើយថា នោះគឺជាការលើកឡើងដោយគ្មានមូលដ្ឋានត្រឹមត្រូវពិតប្រាកដ។
លោក ជុំ សុន្ទរី បានផ្តល់ការអត្ថាធិប្បាយក្នុងប្រព័ន្ធតេឡេក្រាមជាមួយអ្នកសារព័ត៌មានតាមន័យដើមថា៖
«ទន្ទឹមនឹងនេះ ស្ថានទូតកម្ពុជាប្រចាំនៅប្រទេសថៃ ក៏បានទាក់ទងជាមួយអាជ្ញាធរមានសមត្ថកិច្ចថៃ ស្វែងរកការបញ្ជាក់លើព័ត៌មាននេះ តែរហូតមកដល់ពេលនេះ (ព្រឹកថ្ងៃទី១៣ ខែមីនា) ពុំទាន់ទទួលបានការបញ្ជាក់ណាមួយថា នេះជាករណីដែលបានកើតឡើងនៅកម្ពុជាដូចព័ត៌មានដែលបានផ្សាយនោះឡើយ។ ស្ថានទូតកំពុងបន្តទាក់ទងជាមួយអាជ្ញាធរមានសមត្ថកិច្ចថៃ រកព័ត៌មានបន្ថែមទៀត»។
យ៉ាងណាក៏ដោយ បណ្តាញផ្សព្វផ្សាយរបស់ប្រទេសថៃមួយចំនួនទៀត ក៏បានចេញសេចក្តីរាយការណ៍ពាក់ព័ន្ធនឹងស្ត្រីថៃនោះដែរ តែគ្មានបណ្តាញផ្សព្វផ្សាយណារាយការណ៍ឱ្យដឹងថា នាងបានចូលមកកម្ពុជាតាមវិធីណា ហើយអត្តសញ្ញាណរបស់នាងត្រូវបានលាក់បាំងដើម្បីហេតុផលសុវត្ថិភាព។
បណ្តាញផ្សព្វផ្សាយខ្លះរាយការណ៍ថា ស្ត្រីជនជាតិថៃដដែលនោះ ក៏ត្រូវបានគេបង្ខាំងទុកដើម្បីទារយកប្រាក់ពីគ្រួសារនៅប្រទេសថៃ។ ប៉ុន្តែនាងត្រូវបានសង្គ្រោះដោយសារការទាក់ទងជាមួយស្ត្រីថៃម្នាក់ទៀត ដែលបានផ្តល់ដំណឹងដល់អាជ្ញាធរឱ្យតាមចាប់សញ្ញាទូរសព្ទរបស់នាង។
សារព័ត៌មានអនឡាញរបស់ថៃ Thai Examiner រាយការណ៍ថា នាងមានអាយុ ២៥ ឆ្នាំ និងជាពលរដ្ឋរស់នៅទីក្រុងបាងកក ហើយត្រូវបានសង្គ្រោះចេញពីប្រទេសកម្ពុជាមួយពលរដ្ឋថៃប្រមាណ ៧ នាក់ទៀត ក្នុងនោះមានស្ត្រី ៦ នាក់ កាលពីសប្តាហ៍មុន។
ស្ថានភាពរងគ្រោះ របស់ស្ត្រីថៃរូបនោះ ត្រូវបានរាយការណ៍ទៅកាន់ប្រព័ន្ធផ្សព្វផ្សាយដោយអគ្គស្នងការរងនគរបាលជាតិថៃឧត្តមសេនីយ៍ឯកលោក សុរាឆាត ហាក់ផាន (Surachate Hakparn)។
លោក សុរាឆាតថា នៅពេលស្ត្រីវ័យក្មេងរូបនោះ ទៅដល់ប្រទេសកម្ពុជា នាងត្រូវបានប្រាប់ឱ្យធ្វើការនៅមជ្ឈមណ្ឌលទូរសព្ទនោះ ប៉ុន្តែនាងប្រកែក ហើយក្រោយមកត្រូវបានគេវាយដំបង្ខាំងទុក និងទុកឱ្យអត់ឃ្លាន។ នាយនគរបាលថៃជាន់ខ្ពស់រូបនេះឱ្យដឹងទៀតថាមុនពេល ស្ត្រីរូបនោះត្រូវបានសង្គ្រោះ នាងក៏អះអាងថា ក្រុមជនពាលបានបូមយកឈាមនាងប្រមាណ ៣ ទៅ៤ បោ្លក នៅពេលនាងត្រូវក្រុមជនពាលបញ្ជូនទៅតំបន់មួយក្បែរព្រំដែនវៀតណាម។
បើតាមសារព័ត៌មានអនឡាញថៃ The Thaiger នគរបាលថៃ កំពុងព្រមានពលរដ្ឋថៃអំពីការទទួលយកការងារនៅក្រៅប្រទេស ដែលពួកគេមិនត្រឹមតែអាចត្រូវរងគ្រោះដោយបញ្ហានិងថែមទាំងធ្លាក់ចូលប្រតិបត្តិការ ឬសកម្មភាពឆបោកនោះទេ ប៉ុន្តែនគរបាលនិយាយថា អ្នកជួញដូរសរីរាង្គមនុស្សត្រូវបានគេដឹងថា អាចវះយកក្រលៀន ថ្លើម និងភ្នែក បន្ទាប់ពីការបូមឈាមរួចនោះ។
នាយករងទទួលបន្ទុកឃ្លាំមើលសិទ្ធិមនុស្សនៃអង្គការលីកាដូលោក អំ សំអាត ប្រាប់វីអូអេនៅថ្ងៃចន្ទថា ការបំភ្លឺរបស់ក្រសួងការបរទេសកម្ពុជា ពាក់ព័ន្ធនឹងស្ថានភាពរងគ្រោះរបស់ស្ត្រីជនជាតិថៃខាងលើមិនទាន់គ្រប់គ្រាន់ទេ និងថាអាជ្ញាធរកម្ពុជាគួរបង្កើនកិច្ចសហការជាមួយអាជ្ញាធរថៃបើកការស៊ើបអង្កេតរកជនសង្ស័យ ដើម្បីបញ្ចៀសការខាតបង់របស់កម្ពុជា ក្នុងបញ្ហាសនិ្តសុខ និងសកម្មភាពជំនួញ។ លោកលើកឡើងថា៖
«គឺបញ្ហាទេសចរណ៍សម្រាប់ប្រទេសកម្ពុជាយើង បញ្ហាសន្តិសុខសុវត្ថិភាពរបស់ប្រជាពលរដ្ឋ ហើយនិងអ្នកវិនិយោគទុន។ អាហ្នឹងវាជារឿងសំខាន់។ អ៊ីចឹងយើងត្រូវមានការបង្ហាញនូវតម្លាភាពនៃការស៊ើបអង្កេតឱ្យមានជំនឿទុកចិត្តអាហ្នឹងជារឿងសំខាន់ សម្រាប់កម្ពុជាយើង»។
អ្នកនាំពាក្យរដ្ឋបាលខេត្តព្រះសីហនុលោក ឃាង ភារម្យ ចាត់ទុកការផ្សព្វផ្សាយព័ត៌មាន ទាក់ទិននឹងស្ត្រីជនជាតិថៃនោះ ថាជាការបំប៉ោងសភាពការណ៍ដែលអាចប៉ះពាល់ដល់ស្ថានភាពរស់នៅរបស់ប្រជាពលរដ្ឋនិងការអភិវឌ្ឍសេដ្ឋកិច្ចនៅក្នុងខេត្តព្រះសីហនុ។
បើតាមលោក ឃាង ភារម្យ គ្មានករណីដូចការអះអាងរបស់ស្ត្រីជនជាតិថៃរូបនោះ ដែលថាមានក្រុមឧក្រិដ្ឋជនប៉ុនប៉ងប្រមាញ់យកសរីរាង្គ និងបូមឈាមនៅខេត្តព្រះសីហនុរបស់កម្ពុជាទេ បើផ្អែកតាមការស៊ើបអង្កេតដិតដល់របស់អាជ្ញាធរកម្ពុជា។
«គឺសមត្ថកិច្ចយើងបានធ្វើការស្រាវជ្រាវ ស៊ើបអង្កេតយ៉ាងលម្អិត គឺថាមិនមានករណីបែបនេះកើតឡើងក្នុងទឹកដីនៃខេត្តព្រះសីហនុនោះឡើយ ដូច្នេះខ្ញុំសូមប្រកាសបដិសេធចោទទាំងស្រុងនូវការចុះផ្សាយព័ត៌មានខាងលើដែលខ្វះមូលដ្ឋានទិន្នន័យ និងភាពជាក់ស្តែង ហើយជាពិសេសការផ្សព្វផ្សាយនេះ វាគឺជាការបំប៉ោងនូវព័ត៌មានក្នុងគោលបំណងធ្វើឱ្យមានការរើសអើង និងបង្កចលាចលសង្គម ជាពិសេសទៀតនោះ គឺធ្វើឱ្យប៉ះពាល់ដល់ការអភិវឌ្ឍសេដ្ឋកិច្ច និងជីវភាពរស់នៅរបស់ប្រជាពលរដ្ឋនៃខេត្តព្រះសីហនុ»។
គួរបញ្ជាក់ថា កាលពីថ្ងៃទី ៩ ខែមីនា អភិបាលខេត្តព្រះសីហនុលោក គួច ចំរើន បានថ្លែងក្នុងពិធីមួយថាអាជ្ញាធរពាក់ព័ន្ធបានដាក់ចេញវិធានការមួយចំនួនក្នុងការអនុវត្តដោះស្រាយបញ្ហាប្រឈមទាំងនោះ ដែលរួមមានការគ្រប់គ្រងអាជីវកម្មការគ្រប់គ្រងការស្នាក់នៅរបស់ជនបរទេស និងការត្រួតពិនិត្យតាមទីតាំងកាស៊ីណូនៅតាមតំបន់តូចៗ និងតាមដងផ្លូវជាដើមដើម្បីទប់ស្កាត់បទល្មើសនានា រួមមានការរត់ពន្ធមនុស្សនិងការជួញដូរកម្លាំងពលកម្មជាដើម។ លោកក៏ស្នើឱ្យមានចំណាត់ការរហ័សពីស្ថាប័នតុលាការផងដែរ។
មួយថ្ងៃក្រោយការថ្លែងរបស់អភិបាលខេត្តជាប់មាត់សមុទ្រមួយនេះ ក្រុមអង្គការសង្គមស៊ីវិលយ៉ាងហោចណាស់ ៣៦ ស្ថាប័នបានចេញសេចក្តីថ្លែងការណ៍រួមមួយថា ខេត្តព្រះសីហនុនិងខេត្តមួយចំនួនទៀតរបស់កម្ពុជា ត្រូវបានកំណត់ថាជាទីតាំងនៃការបង្ខាំងមនុស្សប្រើប្រាស់ក្នុងការងារ ដែលជាញឹកញាប់ទាក់ទងនឹងប្រតិបត្តិការបោកប្រាស់តាមប្រព័ន្ធអ៊ិនធឺណិត ដែលដាក់គោលដៅលើជនបរទេសរស់នៅខាងក្រៅប្រទេសកម្ពុជា។
សេចក្តីថ្លែងការណ៍រួមចុះថ្ងៃទី ១០ ខែមីនា បញ្ជាក់ថា៖ «យើងខ្ញុំស្នើសុំឱ្យអាជ្ញាធរកម្ពុជាបំពេញការទទួលខុសត្រូវរបស់ខ្លួន ដើម្បីស៊ើបអង្កេតឱ្យបានពេញលេញនូវការរំលោភបំពាននៅក្នុងប្រទេសរបស់ខ្លួន ព្រមទាំងលុបបំបាត់រាល់ទីតាំងទាំងអស់ ដែលជាប់ទាក់ទងនឹងល្បែងស៊ីសងខុសច្បាប់និងប្រតិបត្តិការបោកបញ្ឆោត ក៏ដូចជាការបង្ខំឱ្យធ្វើពលកម្មទាសភាពឬការធ្វើទារុណកម្ម»។
ក្រុមសង្គមស៊ីវិលសង្កត់ធ្ងន់ថា ការបន្តឱ្យកើតមានឡើងនៃប្រតិបត្តិការទាំងនេះ គឺជាសោកនាដកម្មមួយហើយក៏ជាការសោកស្តាយមួយយ៉ាងខ្លាំង ដែលប្រទេសកម្ពុជាកំពុងត្រូវបានប្រើប្រាស់ជាមូលដ្ឋានសម្រាប់ភាពអមនុស្សធម៌បែបនេះ៕
