នាយករដ្ឋមន្ត្រីប្រទេសនូវែលសេឡង់លោកស្រី Jacinda Ardern បានជំរុញឱ្យប្រធានាធិបតីសហរដ្ឋអាមេរិកលោក Joe Biden ចូលទាក់ទិនកាន់តែខ្លាំងឡើងថែមទៀតជាមួយប្រទេសដែនកោះនៅក្នុងមហាសមុទ្រប៉ាស៊ីហ្វិកនៅពេលដែលចិនខិតខំបង្កើនឥទ្ធិពលរបស់ខ្លួននៅក្នុងតំបន់នោះ។ ការជំរុញរបស់លោកស្រីត្រូវបានធ្វើឡើងនៅពេលដែលលោកស្រីបានជួបជាមួយមេដឹកនាំសហរដ្ឋអាមេរិកនៅឯសេតវិមានកាលពីថ្ងៃអង្គារម្សិលមិញ។
លោកស្រី Ardern បានមានប្រសាសន៍ថា«យើងនឹងលើកទឹកចិត្តឱ្យសហរដ្ឋអាមេរិកបន្តនិងពង្រឹងការចូលរួមនៅក្នុងតំបន់របស់យើងពិតប្រាកដ រួមទាំងការចូលរួមខាងផ្នែកសេដ្ឋកិច្ចដែលមានសារៈសំខាន់ដល់តំបន់របស់យើងផងដែរ»។
លោកប្រធានាធិបតី Biden បានបញ្ជាក់ឡើងវិញថា រដ្ឋបាលរបស់លោកបានស្វះស្វែងធ្វើដៃគូជាមួយប្រទេសនានានៅក្នុងតំបន់។ លោកប្រធានាធិបតីមានប្រសាសន៍ថា «យើងមានការងារជាច្រើនទៀតដែលត្រូវធ្វើនៅក្នុងប្រទេសប្រជុំកោះទាំងនោះ នៅក្នុងមហាសមុទ្រប៉ាស៊ីហ្វិក»។
ជំនួបរវាងលោក Biden និងលោកស្រី Ardern បានកើតមានឡើងបន្ទាប់ពីការទាក់ទងជាបន្តបន្ទាប់ដែលរដ្ឋបាលរបស់លោក Biden បានធ្វើជាមួយបណ្តាប្រទេសនៅតំបន់ឥណ្ឌូប៉ាស៊ីហ្វិកកាលពីខែឧសភា ជាមួយមេដឹកនាំសមាគមប្រជាជាតិអាស៊ីអាគ្នេយ៍ឬអាស៊ាន ដំណើរទស្សនកិច្ចរបស់លោក Biden កាលពីសប្តាហ៍មុនទៅកាន់ប្រទេសកូរ៉េខាងត្បូងនិងជប៉ុនដែលជាសម្ពន្ធមិត្តរបស់ខ្លួនហើយនិងជំនួបកំពូលក្នុងទីក្រុងតូក្យូជាមួយមេដឹកនាំចតុភាគី Quad ដែលរួមមានសហរដ្ឋអាមេរិក ជប៉ុន ឥណ្ឌានិងប្រទេសអូស្ត្រាលី។
ចាប់តាំងពីប្រធានាធិបតីចិនលោក Xi Jinping បានចូលកាន់អំណាចនៅឆ្នាំ២០១៣មក រដ្ឋាភិ បាលក្រុងប៉េកាំងបានបង្កើនការទាក់ទិនយ៉ាងខ្លាំងនៅក្នុងតំបន់ប្រជុំកោះមហាសមុទ្រប៉ាស៊ី ហ្វិកដោយផ្តោតលើការពង្រីកចំណងទាក់ទងសេដ្ឋកិច្ច និងបង្កើនវិស័យការទូតនិងសន្តិ សុខ។ បើតាមរបាយការណ៍របស់រដ្ឋាភិបាលសហរដ្ឋអាមេរិកឆ្នាំ២០១៨បានឱ្យដឹងថា ចិនជាអ្នកដើរតួដ៏សំខាន់មួយនៅក្នុងតំបន់ ដោយនាំមុខសហរដ្ឋអាមេរិកនៅក្នុងវិស័យជាច្រើនរួមទាំងវិស័យពាណិជ្ជកម្ម ការវិនិយោគទុន ជំនួយអភិវឌ្ឍន៍និងវិស័យទេសចរណ៍ជាដើម។
លោក Patrick Cronin នាយកខាងសន្តិសុខនៅវិទ្យាស្ថាន Hudson បាននិយាយថា រដ្ឋបាលរបស់លោក Biden កំពុងលេងល្បែង«ដេញចាប់» ។
លោក Cronin បានប្រាប់វីអូអេថា «យើងបានពឹងផ្អែកយ៉ាងខ្លាំងអស់ជាច្រើនឆ្នាំមកហើយលើប្រទេសអូស្ត្រាលីចំពោះការអភិវឌ្ឍនិងការទាក់ទិនរបស់ពួកគេជាមួយប្រទេសទាំងនោះនៅក្នុងមហាសមុទ្រប៉ាស៊ីហ្វិក»។
កាលពីខែកុម្ភៈ រដ្ឋមន្ត្រីការបរទេសសហរដ្ឋអាមេរិកលោក Antony Blinken បានទៅបំពេញទស្សនកិច្ចក្នុងប្រទេសហ្វ៊ីជី ហើយលោកជារដ្ឋមន្ត្រីការបរទេសអាមេរិកលើកទី១ដែលបានទៅធ្វើទស្សនកិច្ចនៅក្នុងប្រទេសនោះក្នុងរយៈពេល៣៦ឆ្នាំ និងបានសន្យាឱ្យមានសករាជថ្មីនៃការផ្តោតការយកចិត្តទុកដាក់ និងការចូលរួមនៅក្នុងតំបន់នោះពីសហរដ្ឋអាមេរិក៕
