នាយករដ្ឋមន្ត្រីអ៊ីស្រាអែលលោក Benjamin Netanyahu បាននិយាយថា ប្រទេសអ៊ីស្រាអែលនឹងពិចារណាអំពីការផ្អាកប្រតិបត្តិការយោធារយៈពេលខ្លីដើម្បីអនុញ្ញាតឱ្យជំនួយមនុស្សធម៌បានចូលទៅដល់តំបន់ហ្កាហ្សា (Gaza) ឬក៏ដើម្បីអនុញ្ញាតឱ្យចំណាប់ខ្មាំងដែលក្រុមសកម្មប្រយុទ្ធហាម៉ាស់ (Hamas) ចាប់ឃុំអាចចាកចេញបាន ប៉ុន្តែលោកបានច្រានចោលនូវកិច្ចឈប់បាញ់គ្នាជាទូទៅនៅក្នុងសង្គ្រាមរយៈពេលមួយខែកន្លងមកនេះរបស់អ៊ីស្រាអែលជាមួយនឹងក្រុមហាម៉ាស់។
លោក Netanyahu បានថ្លែងប្រាប់ទូរទស្សន៍ ABC News ថា លោកប្រមើលមើលឃើញថាប្រទេសអ៊ីស្រាអែលនឹង «មានការទទួលខុសត្រូវផ្នែកសន្តិសុខជារួម» នៅក្នុងតំបន់ហ្កាហ្សាសម្រាប់រយៈពេលមិនកំណត់មួយនៅក្រោយពេលដែលខ្លួនសម្រេចបាននូវគោលបំណងនៃការកម្ទេចក្រុមហាម៉ាស់បានទាំងស្រុង។
សេតវិមានប្រធានាធិបតីអាមេរិកបានបញ្ជាក់កាលពីថ្ងៃចន្ទថា លោកប្រធានាធិបតី Joe Biden និងលោក Netanyahu បានពិភាក្សាគ្នានៅក្នុងការសន្ទនាតាមទូរស័ព្ទអំពីលទ្ធភាពនៃការផ្អាកប្រតិបត្តិការយោធាបែបយុទ្ធវិធីដើម្បីអនុញ្ញាតឱ្យជនស៊ីវិលនៅក្នុងតំបន់ហ្កាហ្សាអាចចាកចេញដោយសុវត្ថិភាពពីតំបន់ដែលកំពុងមានការប្រយុទ្ធគ្នាជាបន្ត ធានាថាជំនួយបានចូលទៅដល់ដៃរបស់ជនស៊ីវិលដែលត្រូវការជំនួយ និងរិះរកវិធីធ្វើយ៉ាងណាឱ្យមានការដោះលែងចំណាប់ខ្មាំង។
លោក Biden បានបញ្ជាក់ជាថ្មីអំពីការគាំទ្រមិនងាករេរបស់លោកចំពោះប្រទេសអ៊ីស្រាអែលនៅក្នុងការប្រយុទ្ធប្រឆាំងនឹងក្រុមហាម៉ាស់ និងបានសង្កត់ធ្ងន់អំពីភាពចាំបាច់នៅក្នុងការការពារជនស៊ីវិលប៉ាឡេស្ទីននិងកាត់បន្ថយគ្រោះថ្នាក់ចំពោះជនស៊ីវិលក្នុងអំឡុងពេលប្រតិបត្តិការយោធា។ លោកក៏បានលើកឡើងអំពីស្ថានការណ៍នៅក្នុងតំបន់ West Bank និងតម្រូវការនៅក្នុងការធ្វើឱ្យអ្នកតាំងទីជ្រុលនិយមទទួលខុសត្រូវចំពោះទង្វើហិង្សារបស់ខ្លួនផងដែរ។
ការិយាល័យមនុស្សធម៌អង្គការសហប្រជាជាតិបានបញ្ជាក់ថា រថយន្តដឹកជំនួយចំនួន ៩៣ គ្រឿងដែលដឹកស្បៀងអាហារ ថ្នាំពេទ្យ គ្រឿងបរិក្ខារពេទ្យ និងទឹកបានឆ្លងព្រំដែនពីប្រទេសអេហ្ស៊ីបចូលទៅក្នុងតំបន់ហ្កាហ្សាកាលពីថ្ងៃចន្ទ។
ទីភ្នាក់ងារមនុស្សធម៌នេះបានបន្ថែមថា ចាប់តាំងពីពេលដែលការដឹកជញ្ជូនជំនួយបានចាប់ផ្ដើមកាលពីថ្ងៃទី ២១ ខែតុលាមក រថយន្តដឹកជំនួយសរុបចំនួន ៥៩៣ គ្រឿងបានចូលទៅដល់តំបន់ហ្កាហ្សា បើប្រៀបទៅនឹងរថយន្តដឹកជំនួយជាមធ្យមចំនួន ៥០០ គ្រឿងក្នុងមួយថ្ងៃដែលបានចូលទៅដល់តំបន់នោះមុនពេលសង្គ្រាមបានចាប់ផ្ដើម។
នៅក្នុងការប្រជុំជូនដំណឹងតាមអនឡាញមួយកាលពីថ្ងៃចន្ទ អ្នកនាំពាក្យក្រុមប្រឹក្សាសន្តិសុខជាតិសេតវិមានលោក John Kirby បានបង្ហាញនូវក្ដីសង្ឃឹមថា ការផ្អាកប្រតិបត្តិការយោធារយៈពេលខ្លីដើម្បីមនុស្សធម៌នឹងធ្វើឡើងឆាប់ៗខាងមុខនេះតាមដែលអាចធ្វើទៅបាននៅក្នុងតំបន់ហ្កាហ្សា៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន Reuters និងទីភ្នាក់ងារសារព័ត៌មាន AFP។
