អ្នកវិភាគនានានិយាយថា ក្នុងករណីខ្លះ ក្រុមជនសកម្មប្រយុទ្ធហេសបូឡា (Hezbollah) មានភាពអល់អែកបន្តិចបន្តួចដោយសារតែក្រុមនេះបានតាំងខ្លួនជាចលនាប្រឆាំងចម្បងនឹងប្រទេសអ៊ីស្រាអែល។ ដូច្នេះ តើក្រុមនេះអាចបន្តស្ថិតនៅក្រៅសង្គ្រាមរវាងអ៊ីស្រាអែលនិងក្រុមហាម៉ាស់ (Hamas) នៅក្នុងតំបន់ហ្កាហ្សា (Gaza) នេះតាមរបៀបណា?
លោក Benjamin Allison នៃសាកលវិទ្យាល័យ Texas បានលើកឡើងអំពី «ឃ្លាំងសព្វាវុធបញ្ជាចំគោលដៅ រ៉ុក្កែត និងដ្រូនដ៏គួរឱ្យខ្លាច» របស់ក្រុមហេសបូឡាថាមិនដូចនឹងសព្វាវុធរបស់ក្រុមហាម៉ាស់នោះទេ។ លោកបានសរសេរនៅលើប្លុក Lawfare តាមអនឡាញថា «សព្វាវុធឆ្លាតវៃ» ផ្សេងៗរបស់ក្រុមហេសបូឡាអាចបង្កជា «គ្រោះថ្នាក់ធ្ងន់ធ្ងរចំពោះហេដ្ឋារចនាសម្ព័ន្ធរបស់អ៊ីស្រាអែលនិងអាចធ្វើឱ្យអ៊ីស្រាអែលចាប់ផ្ដើមសង្គ្រាមបង្ការជាមុន»។
រដ្ឋមន្ត្រីការបរទេសលីបង់លោក Abdullah Bou Habib អះអាងថា ទាំងប្រទេសលីបង់និងក្រុមហេសបូឡាសុទ្ធតែមិនចង់ឱ្យមានសង្គ្រាមជាមួយនឹងអ៊ីស្រាអែលដោយសារតែវាអាចធ្វើឱ្យមានមហន្តរាយសម្រាប់លីបង់ដែលកំពុងប្រឹងប្រែងទប់ទល់ជាមួយនឹងវិបត្តិសេដ្ឋកិច្ចដែលជាប់គាំងជាយូរមកហើយ។
អ្នកវិភាគលីបង់អ្នកស្រី Dania Koleilat Khatib បានប្រាប់ VOA ថា ក្រុមហេសបូឡាកំពុងរៀបចំ «ផែនការគ្រាអាសន្ន» និង «ត្រួតត្រាលើល្បឿន» នៃការវាយប្រហារដោយរ៉ុក្កែតឆ្លងព្រំដែនទៅវិញទៅមកជាមួយនឹងកងកម្លាំងការពារជាតិអ៊ីស្រាអែលនៅពេលនេះ។
អ្នកស្រី Khatib គឺជាប្រធានមជ្ឈមណ្ឌលស្រាវជ្រាវសម្រាប់កិច្ចសហប្រតិបត្តិការនិងការកសាងសន្តិភាព (Research Center for Cooperation and Peace Building) នៅក្នុងទីក្រុងបេរូតនៃប្រទេសលីបង់។ អ្នកស្រីនិយាយថា ក្រុមហេសបូឡាទំនងជាអាចប្រឡូកក្នុងសង្គ្រាមជាមួយនឹងអ៊ីស្រាអែលតែក្នុងមួយឬពីរករណីតែប៉ុណ្ណោះ។
អ្នកស្រីថ្លែងដូច្នេះថា៖ «ប្រសិនបើក្រុមហាម៉ាស់ជិតរងការកម្ទេចទាំងស្រុង ដោយសារតែបើក្រុមហាម៉ាស់ត្រូវបានកម្ទេចឬក៏បើអ៊ីស្រាអែលបាញ់ផ្លោងដាក់លីបង់ ក្រុមហេសបូឡាដឹងយ៉ាងច្បាស់ថាពួកគេនឹងក្លាយជាក្រុមបន្ទាប់ [ដែលត្រូវកម្ទេច]។ អ្វីដែលពួកគេកំពុងធ្វើឥឡូវនេះគឺការធ្វើយ៉ាងណាឱ្យកងកម្លាំងការពារជាតិអ៊ីស្រាអែលរវល់នៅភាគខាងជើង ឱ្យក្រុមស៊ើបការណ៍សម្ងាត់វិលវល់ និងឱ្យអ៊ីស្រាអែលខ្លាច។ វាដូចជាការធ្វើឱ្យបែកអារម្មណ៍ដូច្នេះដែរនៅពេលឥឡូវនេះ។ វាមិនមែនជាការប្រឈមមុខពិតប្រាកដនោះទេ ប៉ុន្តែវាអាស្រ័យលើស្ថានការណ៍»។
លោក Rami Khoury នៃសាកវិទ្យាល័យ American University of Beirut បានប្រាប់មជ្ឈមណ្ឌលអារ៉ាប់ (Arab Center) ដែលមានមូលដ្ឋាននៅរដ្ឋធានីវ៉ាស៊ីនតោន សហរដ្ឋអាមេរិកថា ក្រុមហេសបូឡាគឺជាក្រុម «ដែលអ៊ីស្រាអែលមិនចង់ប្រឡូកជាមួយដោយសារតែការតស៊ូនិងការជម្នះរបស់ក្រុមនេះ»។ លោករំពឹងថា ក្រុមតំណាងនាំមុខរបស់អ៊ីរ៉ង់នេះនឹងរក្សាការដាក់សម្ពាធលើព្រំដែនភាគខាងជើងរបស់អ៊ីស្រាអែល។
លោក Khoury ថ្លែងដូច្នេះថា៖ «ក្រុមហេសបូឡាគឺបន្តការរុកគួនអ៊ីស្រាអែល។ ពួកគេស្ទង់មើលគ្រប់ពេលទាំងអស់ចំពោះការឆ្លើយតបរបស់អ៊ីស្រាអែល មនោសញ្ចេតនារបស់ប្រជាជនអ៊ីស្រាអែល ភាពក្លៀវក្លារបស់ទាហានអ៊ីស្រាអែល ឬក៏ថាតើអ៊ីស្រាអែលខ្លាចពួកគេឬក៏អត់។ ដូច្នេះ ពួកគេសាកវាយប្រហារតិចតួចលមើលជាមុនសិន។ ពួកគេកំពុងព្យាយាមបង្កើតភាពរន្ធត់និងការភ័យខ្លាចបែបចិត្តសាស្ត្រក្នុងចំណោមប្រជាជនអ៊ីស្រាអែលជាជាងវាយប្រហារលើពួកគេដោយប្រើរ៉ុក្កែតជាច្រើន ដែលករណីនេះអាចកើតឡើងប្រសិនបើពួកគេប្រឡូកក្នុងសង្គ្រាម»។
ប៉ុន្តែ លោក Khoury គិតថា ក្រុមហេសបូឡាទំនងជាមិនប្រឡូកនៅក្នុងសង្គ្រាមទេ។
លោកលើកឡើងដូច្នេះថា៖ «ខ្ញុំគិតថាពួកគេមិនប្រឡូកក្នុងសង្គ្រាមពេញទំហឹងទេ។ ខ្ញុំគិតថាអ៊ីរ៉ង់ក៏មិនប្រឡូកនៅក្នុងសង្គ្រាមដែរ។ ប៉ុន្តែវាមិនមែនមិនអាចទៅរួចនោះទេ ដោយសារតែប្រសិនបើសង្គ្រាមបន្តទៅមុខល្អឬអាក្រក់ ពួកគេប្រហែលជាអាចចូលប្រឡូក។ ប៉ុន្តែ ខ្ញុំនៅតែគិតថាវាទំនងជានឹងមិនកើតឡើងនោះទេ»។
អ្នកស្រី Maha Yahya ប្រធានមជ្ឈមណ្ឌល Carnegie Middle East Center នៅទីក្រុងបេរូត បានប្រាប់កាសែត The New York Times ថា អ៊ីរ៉ង់នឹងទំនងជាមិនធ្វើឱ្យបាត់បង់កងកម្លាំងក្រុមហេសបូឡានៅពេលនេះនោះទេ ពីព្រោះវាមានហានិភ័យខ្ពស់ដោយសារ «នាវាដឹកយន្តហោះចម្បាំងរបស់សហរដ្ឋអាមេរិកពីរគ្រឿងដែលមានវត្តមាននៅសមុទ្រមេឌីទែរ៉ាណេអាចវាយប្រហារលើក្រុម [ហេសបូឡា] បាន»៕
ប្រែសម្រួលដោយលោក ភី សុភាដា
