ទីភ្នាក់ងារអង្គការសហប្រជាជាតិនិងអង្គការសប្បុរសធម៌អន្តរជាតិបានចេញសេចក្តីថ្លែងការណ៍រួមគ្នាដ៏កម្រមួយអំពាវនាវឱ្យមានការឈប់បាញ់គ្នាដើម្បីផ្តល់ជំនួយមនុស្សធម៌ជាបន្ទាន់នៅក្នុងតំបន់ហ្កាហ្សា។
សេចក្តីថ្លែងការណ៍នោះបានបញ្ជាក់ថា អស់រយៈពេលជិត២ខែហើយ«ពិភពលោកកំពុងឃ្លាំមើលស្ថានភាពរីកកាន់តែធំឡើងនៅក្នុងប្រទេសអ៊ីស្រាអែលនិងទឹកដីដែលត្រួតត្រាដោយប៉ាឡេស្ទីនក្នុងការរន្ធត់និងភ័យខ្លាចដោយសារចំនួនអាយុជីវិតមនុស្សបាត់បង់និងបែកខ្ញែកគ្នា»។
ទីភ្នាក់ងារនិងអង្គការទាំងនោះបានកត់សម្គាល់ថា មនុស្សយ៉ាងតិច១.៤០០នាក់បានត្រូវសម្លាប់នៅក្នុងប្រទេសអ៊ីស្រាអែលនិងជាង២០០នាក់ទៀតបានត្រូវចាប់ជាចំណាប់ខ្មាំង។
ទីភ្នាក់ងារទាំងនោះបាននិយាយទៀតថា «ការសម្លាប់ដ៏រន្ធត់នៃជនស៊ីវិលកាន់តែច្រើនឡើងនៅក្នុងតំបន់ហ្កាហ្សាជាការក្រេវក្រោធមួយ នៅពេលដែលជនជាតិប៉ាឡេស្ទីន២,២លាននាក់បានត្រូវកាត់ផ្តាច់ស្បៀងអាហារ ទឹក ថ្នាំសង្កូវ ភ្លើងអគ្គិសនីនិងប្រេងឥន្ធនៈ»។
ទីភ្នាក់ងារបានបញ្ជាក់នៅក្នុងសេចក្តីថ្លែងការណ៍ថា «ល្មមគ្រប់គ្រាន់ហើយ។ ការណ៍នេះត្រូវតែបញ្ឈប់»។
ទីភ្នាក់ងារខ្លះនៅក្នុងក្រុមទាំង២ដែលបានចេញសេចក្តីថ្លែងការណ៍នោះរួមមានអង្គការសុខភាពពិភពលោក កម្មវិធីស្បៀងអាហារពិភពលោក អង្គការ CARE International អង្គការជួយសង្គ្រោះកុមា Save the Children និងអង្គការ Mercy Corps។
អ៊ីស្រាអែលបាននិយាយថា ការវាយប្រហាររបស់ខ្លួនលើក្រុមហាម៉ាស់នៅក្នុងតំបន់ហ្កាហ្សា ស្រ្ទីព (Gaza Strip) បានបំបែកទឹកដីប៉ាឡេស្ទីនជា២កាលពីថ្ងៃអាទិត្យម្សិលមិញ។
លោក Daniel Hagari អ្នកនាំពាក្យយោធាអ៊ីស្រាអែលបាននិយាយថា កងទ័ពអ៊ីស្រាអែល«បានឡោមព័ទ្ធតំបន់ហ្កាហ្សាខាងជើង។ ឥឡូវនេះមានតំបន់ហ្កាហ្សាខាងត្បូងនិងហ្កាហ្សាខាងជើង»។
រដ្ឋមន្ត្រីការបរទេសសហរដ្ឋអាមេរិកលោក Antony Blinken កំពុងខ្នះខ្នែងរាំងខ្ទប់វិបត្តិនោះដែលគំរាមកំហែងជុំវិញតំបន់នោះកាន់តែធំឡើង។ លោក Blinken បានជួបជាមួយប្រធានាធិបតីអាជ្ញាធរប៉ាឡេស្ទីនលោក Mahmoud Abbas នៅក្នុងតំបន់ West Bank ដែលអ៊ីស្រាអែលត្រួតត្រាកាលពីថ្ងៃអាទិត្យ។
លោកក៏បានធ្វើដំណើរបំពេញទស្សនកិច្ចមិនប្រាប់ឱ្យដឹងជាមុនទៅកាន់រដ្ឋធានីបាដាដនៃប្រទេសអ៊ីរ៉ាក់ជាទីកន្លែងដែលលោកបានជួបជាមួយនាយករដ្ឋមន្ត្រីអ៊ីរ៉ាក់លោក Shia al-Sudani។ ពួកអស់លោកបានពិភាក្សាពីជម្លោះរវាងអ៊ីស្រាអែលនិងក្រុមហាម៉ាស់និងពីការចាំបាច់ដើម្បីរារាំងសង្គ្រាមនោះកុំឱ្យរាលដាល រួមទាំងក្នុងប្រទេសអ៊ីរ៉ាក់ផង។
នៅថ្ងៃចន្ទនេះ លោក Blinken នឹងចរចាជាមួយពួកមន្ត្រីតួកគីនៅក្នុងរដ្ឋធានីអង់ការ៉ាស្តីពីស្ថានភាពនៅក្នុងតំបន់ហ្កាហ្សា។
នាយករដ្ឋមន្ត្រីអ៊ីស្រាអែលលោក Benjamin Netanyahu បាននិយាយជាមួយពួកអ្នកបើកបរយន្តហោះនៅឯមូលដ្ឋាន Ramon Air Force ក្នុងប្រទេសអ៊ីស្រាអែលភាគខាងត្បូងកាលពីថ្ងៃអាទិត្យដោយបានបញ្ជាក់ឡើងវិញថា «នឹងមិនមានការឈប់បាញ់គ្នាដោយគ្មានការដោះលែងចំណាប់ខ្មាំងនោះទេ»៕
អ្នកស្រី Nike Ching ប្រធានការិយាល័យវីអូអេប្រចាំនៅក្រសួងការបរទេសនិងលោក Jeff Seldin អ្នកឆ្លើយឆ្លងព័ត៌មានសន្តិសុខជាតិបានផ្តល់សេចក្តីរាយការណ៍នេះ។ ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន AP, Reuters និង AFP។
