នាយករដ្ឋមន្ត្រីអ៊ីស្រាអែលលោក Benjamin Netanyahu បាននិយាយកាលពីថ្ងៃអាទិត្យថា លោកប្រឆាំងនឹងកិច្ចព្រមព្រៀងបណ្ដោះអាសន្នណាមួយដែលត្រូវបានគេរាយការណ៍ថាកំពុងត្រូវបានចរចារវាងសហរដ្ឋអាមេរិកនិងប្រទេសអ៊ីរ៉ង់ ទាក់ទិននឹងកម្មវិធីនុយក្លេអ៊ែររបស់អ៊ីរ៉ង់។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AP។
លោក Netanyahu បាននិយាយដូច្នេះ បន្ទាប់ពីមានសេចក្ដីរាយការណ៍នៅក្នុងប្រព័ន្ធផ្សព្វផ្សាយរបស់អ៊ីស្រាអែលថា ការយោគយល់គ្នាកំពុងធ្វើឡើងរវាងសហរដ្ឋអាមេរិកនិងអ៊ីរ៉ង់ក្នុងគោលបំណងដាក់កំហិតលើកម្មវិធីនុយក្លេអ៊ែររបស់អ៊ីរ៉ង់ ដើម្បីជាថ្នូរនឹងការដកទណ្ឌកម្មមួយចំនួនចេញ។ ទីភ្នាក់ងារសារព័ត៌មាន AP មិនទាន់អាចបញ្ជាក់ថា សេចក្ដីរាយការណ៍នេះពិតជាត្រឹមត្រូវឬក៏យ៉ាងណានោះទេ ហើយសហរដ្ឋអាមេរិកបានច្រានចោលជាសាធារណៈថាមិនមានកិច្ចព្រមព្រៀងណាមួយដូចនេះទេ។
លោក Netanyahu បាននិយាយថា អ៊ីស្រាអែលបានជូនដំណឹងដល់សហរដ្ឋអាមេរិកថា៖ «ការយោគយល់មានកំណត់ដែលហៅថា «កិច្ចព្រមព្រៀងតូច» នេះ សម្រាប់ទស្សនៈរបស់យើងគឺមិនមានប្រយោជន៍នោះទេ ហើយយើងក៏ប្រឆាំងនឹងកិច្ចព្រមព្រៀងទាំងនេះផងដែរ»។
មន្ត្រីអ៊ីស្រាអែលជឿថា ការយោគយល់មួយចំនួនត្រូវបានសម្រេចរួចហើយទាក់ទិននឹងការដាក់កំហិតលើការធ្វើឱ្យប្រសើរឡើងនូវសារធាតុអ៊ុយរ៉ាញ៉ូមដើម្បីផលិតនុយក្លេអ៊ែរ ហើយថា ថវិកាមួយចំនួនលែងត្រូវបង្កក។ មន្ត្រីអ៊ីស្រាអែលទាំងនេះបាននិយាយក្នុងលក្ខខណ្ឌមិនបញ្ចេញឈ្មោះ ដោយសារតែពួកគេនិយាយអំពីការវាយតម្លៃបែបការទូតសម្ងាត់។
កាលពីសប្ដាហ៍មុន ប្រព័ន្ធផ្សព្វផ្សាយព័ត៌មាន Walla របស់អ៊ីស្រាអែល បានរាយការណ៍ថា នៅក្រោមការយោគយល់គ្នាដែលកំពុងលេចឡើងនេះ ប្រទេសអ៊ីរ៉ង់នឹងដាក់កំហិតលើការធ្វើឱ្យប្រសើរឡើងនូវសារធាតុអ៊ុយរ៉ាញ៉ូមរបស់ខ្លួនឱ្យបានត្រឹមកម្រិតតែ ៦០% ប៉ុណ្ណោះ ដើម្បីជាថ្នូរនឹងការដកទណ្ឌកម្ម។ ប្រព័ន្ធផ្សព្វផ្សាយនេះក៏បានរាយការណ៍ផងដែរថា ភាគីទាំងពីរបានពិភាក្សាគ្នាអំពីការដោះលែងអ្នកទោសទៅវិញទៅមក។
អ្នកនាំពាក្យក្រសួងការបរទេសអាមេរិកលោក Matthew Miller បាននិយាយកាលពីសប្ដាហ៍មុនថា «មិនមានកិច្ចព្រមព្រៀងណាមួយទេ» និងបានបន្ថែមថា សេចក្ដីរាយការណ៍នេះគឺមិនពិតនោះឡើយ៕
