អគ្គលេខាធិការនៃអង្គការអូតង់បាននិយាយថា ការបង្កើនវត្តមានកាន់តែច្រើនរបស់ក្រុមសម្ព័ន្ធមិត្តនៅអឺរ៉ុបខាងកើតបានផ្ញើជាសញ្ញាដ៏ច្បាស់មួយទៅកាន់អ្នកដែលនឹងគឃ្លើនទាំងអស់។
ដោយថ្លែងកាលពីថ្ងៃពុធនៅរដ្ឋធានីព្រុចសែល មុនពេលនៃកិច្ចប្រជុំថ្នាក់រដ្ឋមន្រ្តីការពារជាតិរបស់អង្គការអូតង់ដែលមានរយៈពេល២ថ្ងៃនោះ លោក Jens Stoltenberg បានមានប្រសាសន៍ដោយសំដៅលើប្រទេសរុស្ស៊ីយ៉ាងច្បាស់ថា «អង្គការអូតង់នឹងឆ្លើយតបទៅនឹងភាពគឃើ្លនទាំងឡាយណាទៅលើក្រុមសម្ព័ន្ធមិត្តរបស់ខ្លួន»។
ចាប់តាំងពីប្រទេសរុស្ស៊ីបានដណ្តើមយកតំបន់ Crimea កាលពី២ឆ្នាំមុនមក កងយោធារបស់ក្រុមសម្ព័ន្ធមិត្តនៅលោកខាងលិចមានការព្រួយបារម្ភកាន់តែខ្លាំងថា រដ្ឋាភិបាលទីក្រុងមូស្គូអាចនឹងឈ្លានពានយ៉ាងលឿនចូលក្នុងប្រទេសប៉ូឡូញ ឬបណ្តាប្រទេស Baltic។
លោក Michael Fallon រដ្ឋមន្រ្តីការពារប្រទេសអង់គ្លេសបានលើកឡើងម្តងហើយម្តងទៀតអំពីក្តីបារម្ភនេះ នៅពេលដែលលោកបានមកដល់រដ្ឋធានីព្រុចសែលកាលពីថ្ងៃពុធ។
យោងតាមទីភ្នាក់ងារសារព័ត៌មាន Reuters លោកស្រី Maria Zakharova អ្នកនាំពាក្យរបស់ក្រសួងការបរទេសរុស្ស៊ីបានមានប្រសាសន៍កាលពីថ្ងៃពុធថា ការណ៍ដែលយោធារបស់អង្គការអូតង់បានបង្កើនចំនួននៅលោកខាងកើត ដែលជាចំនួនច្រើនជាងគេបង្អស់នៅអឺរ៉ុបចាប់តាំងពីសង្រ្គាមត្រជាក់មក គឺជាកត្តាដែលមិនមានស្ថិរភាពមួយក្នុងការទប់ទល់នឹងរុស្ស៊ី។
គេរំពឹងថា ក្រុមរដ្ឋមន្រ្តីការពារជាតិរបស់អង្គការអូតង់នឹងពិភាក្សាលើសំណើរបស់ប្រទេសតួកគីក្នុងការស្នើឲ្យអង្គការអូតង់ជួយពន្យឺតការចូលមកអឺរ៉ុបរបស់ក្រុមជនអន្តោប្រវេសន៍៕
