មេដឹកនាំអង្គការអូតង់កំពុងជួបប្រជុំគ្នានៅថ្ងៃព្រហស្បតិ៍នេះនៅទីក្រុងម៉ាឌ្រីដ ប្រទេសអេស្ប៉ាញ សម្រាប់ថ្ងៃចុងក្រោយនៃកិច្ចប្រជុំកំពូលដែលរួមបញ្ចូលការអនុម័តគោលគំនិតយុទ្ធសាស្ត្រថ្មីសម្រាប់សម្ពន្ធមិត្តនេះ ដោយចាត់ទុកថា«ការឈ្លានពានរបស់រុស្ស៊ី» «បញ្ហាប្រឈមជាប្រព័ន្ធដែលបង្កឡើងដោយសាធារណរដ្ឋប្រជាមានិតចិន» និង «ការពង្រឹងភាពជា ដៃគូយុទ្ធសាស្ត្រ»រវាងប្រទេសទាំងពីរជាអាទិភាពចម្បងកិច្ចប្រជុំនេះ។
នៅក្នុងឯកសារនេះ សម្ពន្ធមិត្តយោធាលោកខាងលិចដែលត្រូវបានបង្កើតឡើងក្រោយសង្គ្រាមលោកលើកទី ២នោះ បានកំណត់ថា ប្រទេសរុស្ស៊ីជា«ការគំរាមកំហែងដ៏សំខាន់បំផុត និងដោយផ្ទាល់» ហើយអូតង់ដោះស្រាយបញ្ហាប្រឈមជាលើកដំបូងដែលប្រទេសចិនបង្កឡើងចំពោះសន្តិសុខ ផលប្រយោជន៍ និងគុណតម្លៃរបស់ខ្លួន។ អូតង់បានព្រមព្រៀងគ្នាជំរុញការគាំទ្រសម្រាប់អ៊ុយក្រែន ខណៈប្រទេសនេះទប់ទល់ការឈ្លានពានរបស់រុស្ស៊ី ដែលឥឡូវនេះចូលដល់ខែទីប្រាំហើយនោះ។ អគ្គលេខាធិការអូតង់លោក Jens Stoltenberg បានប្រាប់អ្នកយកព័ត៌មាននៅដើមសប្តាហ៍នេះថា អូតង់នឹងបង្កើនចំនួនកងទ័ពជាង៧ដងសម្រាប់ត្រៀមកម្រិតខ្ពស់គឺឡើងដល់ជាង ៣០ម៉ឺននាក់ខណៈលោកចាត់ទុកពេលនេះមាន«វិបត្តិសន្តិសុខដ៏ធ្ងន់ធ្ងរបំផុត» ចាប់តាំងពីសង្គ្រាមលោកលើកទីពីរមក។
កាលពីថ្ងៃពុធ ប្រធានាធិបតីអាមេរិកលោក Joe Biden បានប្រកាសថា សហរដ្ឋអាមេរិកកំពុងពង្រឹងវត្តមានយោធារបស់ខ្លួននៅក្នុងទ្វីបអឺរ៉ុប រួមទាំងការដាក់ពង្រាយនាវាពិឃាតនិងកងទ័ពជើងទឹកបន្ថែមទៀតនៅក្នុងប្រទេសអេស្ប៉ាញ និងដាក់កងទ័ពបន្ថែមនៅកន្លែងផ្សេងទៀត ដើម្បីឆ្លើយតបទៅនឹង«ការផ្លាស់ប្តូរបរិយាកាសសន្តិសុខ» និងដើម្បីពង្រឹង«សន្តិសុខរួម»។
លោក Biden បាននិយាយថា សហរដ្ឋអាមេរិកនឹងបង្កើតទីស្នាក់ការអចិន្ត្រៃយ៍សម្រាប់អង្គទ័ពទី៥ របស់សហរដ្ឋអាមេរិក(U.S. 5th Army Corps )នៅក្នុងប្រទេសប៉ូឡូញ បន្ថែមកងពលតូចប្តូរវេណចំនួន៣.០០០នាក់ និងបុគ្គលិក២.០០០នាក់ផ្សេងទៀតនៅទីស្នាក់ការកណ្តាលក្នុងប្រទេសរូម៉ានី ព្រមទាំងបញ្ជូនបន្ថែមទៀតអង្គភាពយន្តហោះចម្បាំង F-35 ចំនួន២ទៅអង់គ្លេស។
លោកបាននិយាយថា៖ «កាលពីដើមឆ្នាំនេះ យើងបានបង្កើនកងកម្លាំងអាមេរិកចំនួន២ម៉ឺន នាក់ទៅកាន់ទ្វីបអឺរ៉ុប ដើម្បីពង្រឹងជួរទ័ពរបស់យើង ដើម្បីឆ្លើយតបសកម្មភាពគឃ្លើនរបស់រុស្ស៊ី ដែលនាំឱ្យកម្លាំងរបស់យើងសរុបនៅអឺរ៉ុបឡើងដល់១០ម៉ឺននាក់»។ លោកបន្ថែមថា៖ «ដោយផ្អែកលើការគំរាមកំហែង សហរដ្ឋអាមេរិកនឹងបន្តកែសម្រួលគោលនយោបាយការពារដោយពិគ្រោះយោបល់យ៉ាងដិតដល់ជាមួយសម្ពន្ធមិត្តរបស់យើង»។
កាលពីថ្ងៃពុធនោះដែរ នៅក្នុងសុន្ទរកថាតាមអ៊ីនធើណិតទៅកាន់អង្គការអូតង់ ប្រធានាធិបតីអ៊ុយក្រែនលោក Volodymyr Zelenskyy បាននិយាយថា ប្រទេសរបស់លោកត្រូវការអាវុធទំនើបបន្ថែមទៀត និងថវិកាប្រមាណ៥ពាន់លានដុល្លារក្នុងមួយខែដើម្បីការពារខ្លួន។ លោក Zelenskiy បានប្រាប់មេដឹកនាំកិច្ចប្រជុំកំពូលថា៖ «នេះមិនមែនជាសង្រ្គាមរុស្ស៊ីប្រឆាំងតែអ៊ុយក្រែននោះទេ។ នេះគឺជាសង្រ្គាមសម្រាប់សិទ្ធិកំណត់លក្ខខណ្ឌនៅអឺរ៉ុប គឺ សណ្តាប់ធ្នាប់ពិភពលោកនាពេលអនាគត»៕
អ្នកយកព័ត៌មានវីអូអេ លោក Chris Hannas និង Henry Ridgwell រួមចំណែកក្នុងសេចក្តីរាយការណ៍នេះ
