កងទ័ពឆ្មាំការពារជាតិត្រូវបានដាក់ពង្រាយនៅទូទាំងទីក្រុងបាល់ទីម័រ (Baltimore) រដ្ឋម៉ារីឡេន (Maryland) ភាគខាងកើតសហរដ្ឋអាមេរិក នៅពេលដែលក្រុមអាជ្ញាធរព្យាយាមធ្វើឲ្យមានសណ្តាប់ធ្នាប់ឡើងវិញ មួយថ្ងៃបន្ទាប់ពីមានកុប្បកម្មបានផ្ទុះឡើង ក្រោយពីពិធីបុណ្យសពរបស់លោក Freddie Grayអាយុ២៥ឆ្នាំ ជាជនជាតិស្បែកខ្មៅដែលបានស្លាប់ដោយសាររបួសពេលដែលស្ថិតនៅក្នុងការឃុំឃាំងរបស់ប៉ូលីសនៅដើមខែនេះ។
លោក Larry Hogan អភិបាលរដ្ឋម៉ារីឡេន បានប្រកាសស្ថានភាពអាសន្នក្នុងទីក្រុងបាល់ទីម័រ ហើយសាលារៀនសាធារណៈនៅក្នុងទីក្រុងបានបិទទ្វានៅថ្ងៃអង្គារនេះ។ លោក Stephanie Rawlings-Blakeអភិបាលក្រុងបាល់ទីម័រ បានហៅកុប្បកម្មនោះថាជា «ថ្ងៃដ៏ខ្មៅងងឹតមួយដែលទីក្រុងនោះមិនដែលធ្លាប់បានជួបប្រទះ» ហើយបានប្រកាសបម្រាមគោចរណ៍នៅពេលយប់រយៈពេលមួយសប្តាហ៍។
អំពើហិង្សាបានផ្ទុះឡើងបន្ទាប់ពីបុណ្យសពបុរសស្បែកខ្មៅ Freddie Gray
ក្រុមអ្នកពន្លត់អគ្គីភ័យបានបន្តពន្លត់អគ្គីភ័យនៅទូទាំងទីក្រុងបាល់ទីម័រ ប៉ុន្មានម៉ោងមុនពេលថ្ងៃទើបនឹងរះនៅថ្ងៃអង្គារនេះ រួមមានមជ្ឈមណ្ឌលសម្រាប់ចាស់ៗរស់នៅគ្រប់គ្រងដោយព្រះវិហារគ្រិស្តសាសនាដែលកំពុងស្ថិតនៅក្រោមការសាងសង់ផងដែរ។
អំពើហិង្សាបានចាប់ផ្តើមនៅពេលដែលសិស្សវិទ្យាល័យរាប់រយនាក់បានដើរក្បួនឆ្ពោះទៅកាន់មជ្ឈមណ្ឌលលក់ដូរក្នុងទីក្រុង បន្ទាប់ពីថ្នាក់រៀនត្រូវបញ្ឈប់រយៈពេលមួយថ្ងៃ ហើយបន្ទាប់មកពួកគេបានបំបែកគ្នានៅពាសពេញសង្កាត់ជាច្រើន ដែលហួសពីសមត្ថភាពរបស់ក្រុមប៉ូលីស ដើម្បីឆ្លើយតបនៅពេលដែលការតវ៉ាប្រឆាំងបានក្លាយជាអំពើហិង្សា។
បាតុករបានលួចនិងដុតកន្លែងលក់ដូរនិងរថយន្តរាប់សិប ហើយបានចោលដុំ ឥដ្ឋ ដប ហើយនិងរបស់របរផ្សេងទៀតដាក់ប៉ូលីស។ លោក Anthony Betts ស្នងការប៉ូលីសបាននិយាយថា មន្រ្តីប៉ូលីស១៥នាក់ បានរងរបួសនៅក្នុងការប៉ះទង្គិចគ្នា រួមមាន៦នាក់បានស្ថិតនៅក្នុងមន្ទីរពេទ្យ។ មនុស្សយ៉ាងហោចណាស់ក៏ជាង២០នាក់ដែរត្រូវបានចាប់ខ្លួន៕
