កាលពីព្រឹកថ្ងៃច័ន្ទ មានមនុស្សអង្គុយពេញលើកៅអីវែងៗក្នុងព្រះវិហារគ្រឹស្តសាសនាមួយក្នុងក្រុង Baltimore នាប៉ែកខាងកើតស.រ.អា.នៅពេលដែលពួកជនដែលមានក្តីអាណិតស្រឡាញ់បានប្រមូលផ្តុំគ្នាសម្រាប់ពិធីបុណ្យសពបុរសម្នាក់អាយុ២៥ឆ្នាំដែលបានស្លាប់ដោយសាររបួសដែលលោកបានរងគ្រោះនៅពេលឋិតនៅក្នុងការឃុំឃាំងរបស់ពួកប៉ូលិស។
ការស្លាប់របស់លោក Freddie Gray បានក្លាយទៅជាឧប្បត្តិហេតុថ្មីបំផុតដែលបានបណ្តាលឲ្យមានសំណួរនិងបាតុកម្មអំពីការទាក់ទងរវាងក្រុមជនអំបូរភាគតិចនិងពួកប៉ូលិសនៅក្នុងប្រទេសអាមេរិក។
មន្ត្រីសេតវិមានបាននិយាយថា លោក Broderick Johnson លេខាធិការគណៈរដ្ឋមន្ត្រីគឺជាតំណាងរដ្ឋបាលលោកប្រធានាធិបតីបារ៉ាក់អូបាម៉ានៅក្នុងពីធីបុណ្យសពនេះ។ លោក Johnson បានដឹកនាំការផ្តើមគំនិតរបស់លោកប្រធានាធិបតីដែលមានរយៈពេលមួយឆ្នាំមកហើយដើម្បីជួយដោះស្រាយគម្លាតនៃឱកាសផ្សេងៗសម្រាប់ក្រុមបុរសវ័យក្មេងនៃក្រុមជនអំបូរភាគតិច។
គ្រួសារ មិត្តភ័ក្តិនិងសមាជិកសហគមន៍បានសម្តែងការគោរពរបស់ពួកគេដល់សពលោក Gray កាលពីថ្ងៃអាទិត្យ គឺពីរអាទិត្យក្រោយពីលោកមានរបួសធ្ងន់នៅសរសៃឆ្អឹងខ្នងនៅក្រោយលោកត្រូវបានចាប់ខ្លួននិងបានជាប់ឃុំឃាំង និងនៅពេលមួយសប្តាហ៍ក្រោយពីលោកបានបាត់បង់ជីវិត៕
