មេដឹកនាំសហជីពក្រុមហ៊ុនណាហ្គាវើលដ៍ នៅថ្ងៃសុក្រនេះ ថ្លែងថា ការតវ៉ារបស់កម្មករនិយោជិត គឺដើម្បីធានាការគោរពសេរីភាពរបស់សហជីព ហើយសេរីភាពនេះមិនអាចទូទាត់នឹងសំណងបានឡើយ។ នេះជាការថ្លែងរបស់កញ្ញា ឈឹម ស៊ីថរ មេដឹកនាំសហជីព ដែលធ្លាប់ជាប់ពន្ធនាគារ ដោយសារការចេញមុខតវ៉ាប្រឆាំងនឹងការបញ្ឈប់បុគ្គលិករបស់ក្រុមហ៊ុនណាហ្គាវើលដ៍ ដែលភាគច្រើនសុទ្ធតែជាមេដឹកនាំសហជីព។
នៅក្នុងសន្និសីទសារព័ត៌មានមួយដែលធ្វើឡើងនៅសណ្ឋាគារកាំបូឌីយ៉ាណា កាលពីព្រឹកថ្ងៃសុក្រ កញ្ញា ឈឹម ស៊ីថរ មេដឹកនាំសហជីពល្បីឈ្មោះម្នាក់ បានថ្លែងថា សេរីភាពនៃការបង្កើតសហជីព និងសិទ្ធិការងារ មានចែងនៅក្នុងច្បាប់ការងារ។ កញ្ញាបន្តថា ការតវ៉ារបស់កម្មករ គឺដើម្បីធានាថាក្រុមហ៊ុនគោរពតាមច្បាប់ការងារ និងសេរីភាពរបស់សហជីពនៅកន្លែងធ្វើការ។
កញ្ញា ឈឹម ស៊ីថរ បញ្ជាក់ថា៖ «អ៊ីចឹងថា តើការទាមទាររបស់កម្មករនិយោជិត វាសមហេតុផល ឬក៏មិនសមហេតុផល សូមពិចារណាទាំងអស់គ្នា ជាជាងការដែលលើកឡើងថាកម្មករនិយោជិតដែលទាមទារត្រឡប់ចូលធ្វើការវិញ ហេតុអីមិនព្រមទទួលយកប្រាក់សំណង? ខ្ញុំបញ្ជាក់ហើយថា នេះពាក់ព័ន្ធនឹងសេរីភាពសហជីព និងសិទ្ធិការងារ។ ប្រសិនបើនិយោជកចេះតែអាចបញ្ឈប់កម្មករនិយោជិត ហើយអាចបង់សំណងតាមអំពើចិត្តបែបនេះ ថាតើកម្មករនិយោជិត គាត់អាចបង្កើតសហជីពបានទេ?»។
កញ្ញា ឈឹម ស៊ីថរ ឱ្យដឹងទៀតថាការបន្តធ្វើកូដកម្ម ឬតស៊ូមតិ អាស្រ័យលើការសម្រេចរបស់កម្មករនៅពេលខាងមុខទៀត ខណៈការចរចាមិនទាន់សម្រេចបានជោគជ័យ។
កញ្ញាបញ្ជាក់បន្ថែមថា៖ «អ៊ីចឹងដើម្បីដោះស្រាយបញ្ហាហ្នឹង ទាល់តែបោះបង់ចោលគំនិតមួយចង់រំលាយសហជីពចេញ ទើបអាចដោះស្រាយបញ្ហាហ្នឹងបាន។ បើសិនជាភាគីក្រុមហ៊ុននៅតែមានចេតនានៅក្នុងការរំលាយសហជីព បញ្ហាហ្នឹង គឺអត់អាចដោះស្រាយបានទេ»។
បើតាមកញ្ញា ឈឹម ស៊ីថរ ក្រុមហ៊ុនណាហ្គាវើលដ៍ ក៏បានជ្រើសរើសបុគ្គលិកបន្ថែម ជារៀងរាល់ថ្ងៃ ហើយបុគ្គលិកកំពុងធ្វើការ បច្ចុប្បន្ននេះ ទទួលបន្ទុកការងារច្រើនបន្ថែមទៀត។ កញ្ញាបន្តចោទជាសំណួរ ថាតើហេតុអ្វីបានជាក្រុមហ៊ុនមិនដោះដូរបុគ្គលិកដែលត្រូវកាត់ ដើម្បីឱ្យក្រុមហ៊ុនបន្តមានសហជីពតំណាងកម្មករ។
បើតាមឯកសាររបស់សហជីពណាហ្គាវើលដ៍ មកដល់ថ្ងៃនេះ ក្នុងចំណោមបុគ្គលិកដែលត្រូវកាត់ឈ្មោះចេញ មានប្រមាណ១៧៥នាក់ចង់ចូលធ្វើការវិញ ខណៈបុគ្គលិកជាសមាជិកសហជីពដែលកំពុងធ្វើការ និងស្ម័គ្រចិត្តឱ្យក្រុមហ៊ុនកាត់ ឬប្តូរគ្នាជាមួយអ្នកចង់ចូលធ្វើការវិញ មានជាង៣០០នាក់។
កាលពីកន្លងទៅ តំណាងកម្មករនិយោជិត និងតំណាងក្រុមហ៊ុនណាហ្គាវើលដ៍ បានចូលរួមក្នុងការជជែកពិភាក្សាដោះស្រាយវិវាទការងារចំនួន១១លើក ប៉ុន្តែការចរចាមិនទាន់ឈានដល់ចំណុចព្រមព្រៀងគ្នានៅឡើយទេ។
អ្នកនាំពាក្យក្រសួងការងារ លោក ហេង សួរ បានការពារការបញ្ឈប់បុគ្គលិក ថ្នាក់ដឹកនាំសហជីព ឬសកម្មជនសហជីពនៃក្រុមហ៊ុនណាហ្គាវើលដ៍ថាធ្វើឡើងដោយស្របតាមច្បាប់ ឬស្របនីតិវិធី។
លោកបញ្ជាក់ថា៖ «ដូច្នេះការដែលគិតថា ការបញ្ឈប់បុគ្គលិកណាមួយជាការរំលាយសហជីព គឺជាការគិតខុស។ ការទូទាត់សំណងណាមួយដែលពាក់ព័ន្ធនឹងការផ្តាច់កិច្ចសន្យា គឺជារឿងដោយឡែកនៃបុគ្គលិកម្នាក់ៗ មិនពាក់ព័ន្ធនឹងការ រំលាយសហជីពនោះឡើយ»។
លោកបន្តថា បើភាគីណាមួយយល់ថាមិនទាន់អស់ចិត្ត គឺត្រូវឡើងទៅនីតិវិធីបន្ទាប់ ដែលមានចែងក្នុងច្បាប់ មិនអាចបន្តបកស្រាយដោយខ្លួនឯងទៀតនោះទេ។
វីអូអេមិនទាន់សុំការបញ្ជាក់ពីលោក Hein Dames នាយកគ្រប់គ្រងផ្នែកធនធានមនុស្សប្រចាំក្រុមហ៊ុនណាហ្គាវើលដ៍បាននៅឡើយទេ។
កាលពីកន្លងទៅ តំណាងភាគីក្រុមហ៊ុនណាហ្គាវើលដ៍ បានលើកឡើងថាក្រុមហ៊ុននៅតែរក្សាកញ្ចប់ប្រាក់បំណាច់បញ្ចប់កិច្ចសន្យាចំពោះអតីតកម្មករនិយោជិត ដែលត្រូវបានបញ្ឈប់ពីការងារ ហើយបញ្ជាក់ថាអ្នកមិនទាន់ទទួលប្រាក់បំណាច់នេះនៅសល់តែជាង១៩០នាក់ប៉ុណ្ណោះ។ ហើយក្រុមហ៊ុននៅតែបន្តអនុញ្ញាតឱ្យកម្មករនិយោជិតដែលអវត្តមាន ដោយគ្មានច្បាប់ វិលត្រឡប់ចូលធ្វើការវិញ។
លោក ឃុន ថារ៉ូ ប្រធានគ្រប់គ្រងកម្មវិធីការងាររបស់មជ្ឈមណ្ឌលសម្ពន្ធភាពការងារ និងសិទ្ធិមនុស្ស ហៅកាត់ថាសង់ត្រាល់ ថ្លែងថាការធានាការគោរពសេរីភាពរបស់សហជីព គឺជាតួនាទីរបស់រដ្ឋ។
លោកថ្លែងថា៖ «អ៊ីចឹងបើសិនជាក្រុមហ៊ុនណាហ្គា ដែលជាក្រុមហ៊ុនមួយដែលមានឥទ្ធិពលនៅក្នុងការបំផ្លាញ ក្នុងការជីកឫសគល់ រំលាយសហជីពឯករាជ្យនៅក្នុងក្រុមហ៊ុននេះ គឺវាជាចំណុចមួយដែលឆ្លុះបញ្ចាំងអំពីតួនាទីរបស់រដ្ឋនៅក្នុងការធានានូវការលើកកម្ពស់នូវគោលការណ៍សិទ្ធិសេរីភាពជាមូលដ្ឋាន អង្គការវិជ្ជាជីវៈដែលប្រទេសកម្ពុជាយើងបានផ្តល់សច្ចាប័ន ហើយវាគឺជាគំរូអាក្រក់បំផុតសម្រាប់និយោជកផ្សេងៗទៀត»។
លោក ឃុន ថារ៉ូ កត់សម្គាល់ឃើញថាសហជីពឯករាជ្យ តែងតែប្រឈមការធ្វើទុក្ខបុកម្នេញ និងការរឹតត្បិតសិទ្ធិសេរីភាពជាបន្តបន្ទាប់ ដែលបញ្ហានេះ គឺជាការបង្អាក់ និងជាឧបសគ្គរារាំងការយល់ដឹងពីសិទ្ធិការងារនៅក្នុងប្រទេសកម្ពុជា។
គួររំឭកផងដែរថា បុគ្គលិកក្រុមហ៊ុនកាស៊ីណូណាហ្គាវើលដ៍ ដែលចុះបញ្ជីនៅផ្សារភាគហ៊ុនក្នុងទីក្រុងហុងកុង បានប្រមូលផ្តុំធ្វើកូដកម្មជាច្រើនខែ បន្ទាប់ពីកម្មករនិយោជិតប្រមាណ១.៣២៩នាក់ ត្រូវបានបញ្ឈប់ពីការងារដោយបង្ខំ កាលពីអំឡុងខែមេសា ឆ្នាំ២០២១។
កូដកម្មរបស់កម្មករនិយោជិតឬអតីតបុគ្គលិកនៅក្រុមហ៊ុនណាហ្គាវើលដ៍ បានចាប់ផ្តើមកាលពីខែធ្នូ ឆ្នាំ២០២១។ ប៉ុន្តែរដ្ឋាភិបាលបានប្រកាសមិនអនុញ្ញាតឱ្យកូដករជាកម្មករនិយោជិត ឬអតីតបុគ្គលិកក្រុមហ៊ុនបន្តតវ៉ា ទោះបីមានការដោះលែងតំណាងសហជីពយ៉ាងហោចណាស់៨នាក់ ដែលត្រូវបានចាប់ខ្លួន ឱ្យនៅក្រៅឃុំជាបណ្តោះអាសន្ន កាលពីកន្លងទៅក៏ដោយ៕
