ប្រទេសមីយ៉ាន់ម៉ាបានចាប់ផ្តើមជ្រើសរើសអ្នកធ្វើការបណ្តោះអាសន្នចំនួន៤០.០០០ដើម្បីជួយអាជ្ញាធរប៉ូលិសក្នុងការរក្សាសន្តិសុខក្នុងអំឡុងការបោះឆ្នោតដែលគ្រោងធ្វើនៅខែវិច្ឆិកាខាងមុខ។
លោក Maung Maung Soe វរសេនីយឯកនៃកងកម្លាំងប៉ូលិសថ្លែងថា គេនឹងផ្តល់អាទិភាពដល់អ្នកស្រុកមូលដ្ឋានដើម្បីក្លាយជាអ្នកជួយថែរក្សាសន្តិសុខនៅតាមការិយាល័យបោះឆ្នោតនីមួយៗនៅក្នុងប្រទេសនេះ។
«យើងនឹងបណ្តុះបណ្តាលពួកគេឲ្យមានចំណេះ និងការណែនាំគ្រប់គ្រាន់ដើម្បីអាចដឹងពីកិច្ចការរបស់ប៉ូលិស។ ពួកគេត្រូវស្តាប់តាមបង្គាប់របស់កងកម្លាំងប៉ូលិសមីយ៉ាន់ម៉ា។ យើងកំពុងរៀបរៀងកម្មវិធីបង្រៀនរយៈពេល២សប្ដាហ៍នេះ ដែលនៅក្នុងកម្មវិធីនេះនឹងមាននិយាយពីចំណុចដែលពួកគេអាចធ្វើបាន និងមិនអាចធ្វើបាន ក៏ដូចជាអំពីភារកិច្ចការងារជាទូទៅរបស់ពួកគេ»។
ក្នុងពេលកន្លងមក ស្ថាប័នប៉ូលិសមីយ៉ាន់ម៉ាត្រូវបានគេដឹងថា បានប្រើក្រុមមនុស្សស៊ីវិលដើម្បីបង្ក្រាបដោយហិង្សាទៅលើក្រុមបាតុករ។ ប៉ុន្តែនៅពេលត្រូវ VOA សាកសួរអំពីអតីតកាលនេះ លោក Maung Maung Soe ថ្លែងថា មានតែអ្នកស្រុកដែលមានកេរ្តិ៍ឈ្មោះល្អនៅក្នុងសហគមន៍ប៉ុណ្ណោះដែលនឹងត្រូវជ្រើសរើសឲ្យជួយរក្សាសន្តិសុខក្នុងពេលបោះឆ្នោត។
មន្ត្រីប៉ូលិសនោះបានបន្ថែមថា អ្នកធ្វើការដែលនឹងត្រូវជ្រើសរើសថ្មីនោះ នឹងទទួលបានប្រាក់បៀវត្សន៍ចំនួន១២០ដុល្លារក្នុងខែ ដែលនេះមានចំនួនស្មើនឹងប្រាក់ខែរបស់មន្ត្រីប៉ូលិសម្នាក់។ ថវិកាសម្រាប់ប្រាក់ខែនេះនឹងមានប្រភពពីជំនួយបរទេស រួមទាំងពីសហគមន៍អឺរ៉ុបផង។
លោកប្រធានាធិបតី Thein Sein នៃប្រទេសមីយ៉ាន់ម៉ាបានសន្យានឹងធ្វើអ្វីៗទាំងអស់ដែលលោកអាចធ្វើបានដើម្បីធានាឲ្យមានការបោះឆ្នោតដោយសេរី និងយុត្តិធម៌។ នៅក្នុងសុន្ទរកថាតាមវិទ្យុកាលពីថ្ងៃព្រហស្បតិ៍ លោក Thein Sein ថ្លែងថារដ្ឋាភិបាលរបស់លោកនឹងព្យាយាមសម្រេចឲ្យបាននូវកិច្ចព្រមព្រៀងបទឈប់បាញ់គ្នាមួយជាមួយក្រុមជនជាតិភាគតិចប្រដាប់អាវុធ នៅមុនការបោះឆ្នោតជាតិនៅឆ្នាំ២០១៥នេះ។
ការបោះឆ្នោតជាតិនេះនឹងគ្រោងធ្វើនៅក្នុងថ្ងៃទី៨ខែវិច្ឆិកាខាងមុខ៕
ប្រែសម្រួលដោយ សឹង សុផាត
