សភានៃប្រទេសភូមាបានបង្កើតមុខនាទីថ្មីមួយជូនលោកស្រី អង់សាន ស៊ូជី ដែលជាប្រធាននៃគណបក្សគ្រប់គ្រងប្រទេសជាប់ឆ្នោតកាលពីពេលថ្មីៗនេះ។
កាលពីថ្ងៃអង្គារ ពួកសមាជិកសភាបានបោះឆ្នោតបង្កើតតំណែងទីប្រឹក្សារដ្ឋដែលនាំឱ្យមានការប្រឆាំងពីពួកអ្នកតំណាងក្រុមយោធានៅក្នុងសភា។
វិធានការនេះធ្វើឱ្យលោកស្រី អង់សាន ស៊ូជី ក្លាយទៅជាមេដឹកនាំកំពូលរបស់ប្រទេសតាមព្រឹត្តន័យ ដែលគំនិតផ្តួចផ្ដើមនេះត្រូវបានលើកឡើងកាលពីសប្តាហ៍មុន ហើយវាជាបទនីតិបញ្ញត្តិលើកទីមួយរបស់សភាថ្មីនេះ។
លោកស្រី អង់សាន ស៊ូជី ធ្លាប់បានមានប្រសាសន៍នៅក្នុងពេលធ្វើការឃោសនាបោះឆ្នោតថា លោកស្រីនឹងកាន់តំណែងមួយ «ខ្ពស់ជាងប្រធានាធិបតី»។ នៅពេលនេះលោកស្រីក៏ជារដ្ឋមន្ត្រីការបរទេសនិងរដ្ឋមន្ត្រីប្រចាំការិយាល័យប្រធានាធិបតីផងដែរ។
ដោយសារកូនរបស់លោកស្រីជាពលរដ្ឋបរទេស លោកស្រី អង់សាន ស៊ូជីជី បានត្រូវរារាំងតាមរយៈរដ្ឋធម្មនុញ្ញមិនឱ្យកាន់តំណែងប្រធានាធិបតីនៃប្រទេសភូមាទេ។
ពួកអ្នកតំណាងក្រុមយោធា ដែលកាន់កាប់២៥ភាគរយនៃអាសនៈក្នុងសភាតាមរយៈរដ្ឋធម្មនុញ្ញដែលត្រូវបានព្រាងដោយអតីតរដ្ឋាភិបាលយោធា និយាយថាតំណែងថ្មីនេះមិនត្រឹមត្រូវតាមរដ្ឋធម្មនុញ្ញទេ។ ក៏ប៉ុន្តែសេចក្តីព្រាងច្បាប់នេះបានត្រូវអនុម័តដោយងាយពីព្រោះសមាជិកភាគច្រើននៃសភាជាសមាជិកនៃគណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រី ដែលបានទទួលជ័យជម្នះនៅក្នុងការបោះឆ្នោតកាលពីខែវិច្ឆិកាមុន។
នៅពេលនេះសេចក្តីព្រាងច្បាប់នេះត្រូវចុះហត្តលេខាឱ្យក្លាយទៅជាច្បាប់ដោយលោកប្រធានាធិបតី Htin Kyaw ដែលជាសម្ព័ន្ធមិត្តជិតស្និទ្ធម្នាក់របស់លោកស្រីស៊ូជី។
កាលពីថ្ងៃអង្គារនោះដែរ លោកស្រី អង់សាន ស៊ូជី បានជួបជាមួយលោក Wang Yi រដ្ឋមន្ត្រីការបរទេសចិន ដែលបានសរសើរប្រទេសនេះដែលបានបង្កើតរដ្ឋាភិបាលស៊ីវិលថ្មីមួយហើយបានសន្យាថា ប្រទេសចិននឹងបន្តធ្វើគម្រោងការដែលផ្តល់អត្ថប្រយោជន៍ដល់ប្រទេសទាំងពីរ៕
