នៅក្នុងសភាជាន់ទាបក្នុងប្រទេសមីយ៉ាន់ម៉ានៅថ្ងៃសុក្រនេះ លោក Htin Kyaw ដែលជាមន្រ្តីចូលនិវត្តន៍នៃគណបក្សសម្ព័ន្ធជាតិដើម្បីលទ្ធិប្រជាធិបតេយ្យ ដែលបានយកឈ្នះលើអនុប្រធានាធិបតីនាពេលបច្ចុប្បន្ន គឺលោក Sai Mauk Kham នៅក្នុងការបោះឆ្នោតលើកដំបូងបង្អស់ កំពុងតែខិតកាន់តែជិតទៅកាន់តំណែងជាប្រធានាធិបតីហើយ។
លោក Htin Kyaw បានយកឈ្នះលើលោក Sai Mauk Kham ចំនួន២៧៤ទល់នឹង២៩នៅក្នុងការបោះឆ្នោតក្នុងជុំទី១។
វាគឺជាការអនុវត្តលទ្ធិប្រជាធិបតេយ្យនៅក្នុងប្រទេស ខណៈដែលគណបក្សរបស់លោកស្រី អង់សាន ស៊ូជី ត្រៀមនឹងយករដ្ឋាភិបាលពីលោកប្រធានាធិបតី Thein Sein នៅក្នុងពិធីមួយនៅថ្ងៃទី៣០ខែមីនា ដែលនឹងបញ្ចប់អំណាចយោធាជាច្រើនទសវត្សរ៍ក្នុងប្រទេសនេះ។
ជ័យលាភីពានរង្វាន់ណូបែលរូបនេះបានដឹកនាំក្រុមតំណាងរាស្ត្ររបស់លោកស្រីនៅក្នុងការបោះឆ្នោតសម្រាប់បេក្ខជនដែលលោកស្រីបានរើសដោយផ្ទាល់ដៃ ដែលត្រូវបានគេធានាថានឹងក្លាយទៅជាប្រធានាធិបតី។
លោក Htin Kyaw មិនសូវមានគេចុះផ្សាយព័ត៌មាននោះទេ គិតមកដល់ត្រឹមសប្តាហ៍មុន។ មកទល់នឹងពេលនេះ ការអះអាងដ៏ធំជាងគេបង្អស់របស់លោកដើម្បីឲ្យល្បីល្បាញ គឺប្រហែលជាព័ត៌មានអំពីការដែលលោកគឺជាមនុស្សទី១ដែលត្រូវបានសាកលវិទ្យាល័យ Yangon បញ្ជូនឲ្យទៅសិក្សានៅបរទេសកាលពីឆ្នាំ ១៩៧១ ដើម្បីសិក្សាជំនាញវិទ្យាសាស្រ្តកុំព្យូទ័រ។
ប៉ុន្តែបេក្ខជនដែលលោកស្រី អង់សាន ស៊ូជី ជ្រើសតាំងឲ្យធ្វើជាបេក្ខជនប្រធានាធិបតីរូបនេះមានភាពល្បីល្បាញនៅក្នុងគណបក្សសម្ព័ន្ធជាតិដើម្បីលទ្ធិប្រជាធិបតេយ្យ។ លោកគឺជាសមាជិកនៃគណៈកម្មាធិការប្រតិបត្តិរបស់គណបក្ស និងជាស្វាមីរបស់លោកស្រីតំណាងរាស្រ្ត Su Su Lwin ដែលជាកូនស្រីរបស់សហស្ថាបនិកម្នាក់នៃគណបក្សសម្ព័ន្ធជាតិដើម្បីលទ្ធិប្រជាធិបតេយ្យនេះ៕
