របបយោធាមីយ៉ាន់ម៉ាបានផ្ដល់ការលើកលែងទោសដល់អ្នកទោសជាង ៣.០០០ នាក់នៅក្នុងថ្ងៃបុណ្យចូលឆ្នាំថ្មីរបស់ខ្លួន ប៉ុន្តែគេនៅមិនទាន់ដឹងច្បាស់ភ្លាមៗនៅឡើយទេថាតើអ្នកដែលត្រូវបានដោះលែងនោះរួមមានទាំងអ្នកទោសនយោបាយណាម្នាក់ក្នុងចំណោមអ្នកទោសនយោបាយរាប់ពាន់នាក់ដែលត្រូវបានឃុំខ្លួន។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AP។
ទូរទស្សន៍របស់រដ្ឋមីយ៉ាន់ម៉ាបានរាយការណ៍ថា ក្រុមប្រឹក្សារដ្ឋបាលរដ្ឋ ដែលជាស្ថាប័នដឹកនាំបង្កើតឡើងដោយយោធា បានលើកលែងទោសអ្នកទោសចំនួន ៣.១១៣ នាក់ រួមមានទាំងជនបរទេស ៩៨ នាក់ផងដែរដែលនឹងត្រូវបញ្ជូនចេញពីប្រទេស។ ការលើកលែងទោសទ្រង់ទ្រាយធំដូចនេះគឺតែងតែធ្វើឡើងនៅចំថ្ងៃបុណ្យធំៗនៅមីយ៉ាន់ម៉ា។
អ្នកទោសនយោបាយប្រហែល ១៧.៤៦០ នាក់ដែលក្នុងនោះរួមមានទាំងអតីតមេដឹកនាំរដ្ឋាភិបាលស៊ីវិលរបស់មីយ៉ាន់ម៉ាអ្នកស្រី Aung San Suu Kyi ផងដែរ ត្រូវគេជឿថានៅជាប់ឃុំឃាំងនៅឡើយ។
ប្រទេសមីយ៉ាន់ម៉ាបានស្ថិតក្រោមការដឹកនាំរបស់យោធាតាំងពីឆ្នាំ ២០២១ មក នៅពេលដែលយោធាបានធ្វើរដ្ឋប្រហារផ្ដួលរំលំរដ្ឋាភិបាលជាប់ឆ្នោតរបស់អ្នកស្រី Suu Kyi។ របបយោធានេះបានប្រឈមនឹងការតវ៉ាប្រឆាំងអហិង្សាទ្រង់ទ្រាយធំ ដែលតាំងពីពេលនោះមកបានក្លាយជាការតស៊ូប្រដាប់អាវុធនៅទូទាំងប្រទេស៕
