មន្ត្រីរដ្ឋាភិបាលកម្ពុជាបានបញ្ជាក់ថា កម្ពុជាកំពុងរៀបចំបែបបទសម្ភាសជាមួយក្រុមជនជាតិកុលសម្ព័ន្ធភ្នំវៀតណាមដែលបានមកដល់ទីក្រុងភ្នំពេញ បន្ទាប់ពីពួកគេត្រូវបានអង្គការសហប្រជាជាតិទទួលបន្ទុកសិទ្ធិមនុស្សបានប្រទះឃើញនៅក្នុងព្រៃកាលពីថ្ងៃចុងសប្តាហ៍មុន។
យ៉ាងតិចមានជនជាតិម៉ុងតាញ៉ាចំនួន៨នាក់ត្រូវបានមន្ត្រីអង្គការសហប្រជាជាតិបានរកឃើញ និង៥នាក់ផ្សេងទៀតក្នុងនោះមានស្ត្រីម្នាក់ត្រូវបានក្រុមអាជ្ញាធរមានសមត្ថកិច្ចកម្ពុជាបានរកឃើញកាលពីថ្ងៃសៅរ៍នៅកន្លែងផ្សេងៗគ្នា បន្ទាប់ពីពួកគេបានភៀសខ្លួនពីប្រទេសវៀតណាមមកលាក់ខ្លួននៅក្នុងព្រៃនៃខេត្តរតនៈគីរីអស់រយៈពេលជិតមួយខែ។
លោកនាយឧត្តមសេនីយ៍ខៀវ សុភ័គ អ្នកនាំពាក្យក្រសួងមហាផ្ទៃ មានប្រសាសន៍ថា ជនជាតិកុលសម្ព័ន្ធភ្នំវៀតណាមទាំង១៣នាក់កំពុងស្ថិតនៅក្រោមការគ្រប់គ្រងរបស់សមត្ថកិច្ចនៅក្នុងសណ្ឋាគារមួយដោយមានការរិតបន្តឹងសន្តិសុខដើម្បីការពារសុវត្តិភាពរបស់ពួកគេ។
លោកបានបញ្ជាក់ថា រដ្ឋាភិបាលកំពុងរៀបចំបញ្ជីសំណួរ ដោយមានការសហការជាមួយនឹងអង្គការសហប្រជាជាតិដើម្បីសម្ភាសជនជាតិ ម៉ុងតាញ៉ាទាំងនោះ ហើយប្រសិនណាបើយើងរកឃើញថា ពួកគេមិនពិតប្រាកដថា ជាជនជាតិម៉ុងតាញ៉ាទេ ពួកគេអាចប្រឈមមុខនិរទ្ទេសទៅកាន់ប្រទេសវៀតណាមវិញ។
ក៏ប៉ុន្តែ ទោះជាយ៉ាងណាក៏ដោយ លោកបានបញ្ជាក់ថា កម្ពុជានឹងប្រឹងប្រែងដើម្បីគោរពច្បាប់អន្តរជាតិ។
លោកនិយាយថា៖ «គ្មានហេតុផលណាក្រៅពីហ្នឹងទេ ប្រសិនណាបើមិនច្បាស់លាស់។ ប៉ុន្តែយើងត្រូវសហការជាមួយUNដែរការងារហ្នឹង។ ប៉ុន្តែសិទ្ធិសម្រេចនៅលើសមត្ថកិច្ចកម្ពុជា ពិសេសគឺក្រសួងមហាផ្ទៃជាអ្នកសម្រេចស្របតាមអនុក្រិត្យរបស់រដ្ឋាភិបាល»។
លោក គឹម សារិន ប្រធាននាយកដ្ឋានជនភៀសខ្លួននៃក្រសួងមហាផ្ទៃមិនបានធ្វើអត្ថាធិប្បាយទេ ដោយលោកបានបញ្ជាក់ថា កំពុងជាប់ប្រជុំ។
លោកនិយាយថា៖ «ខ្ញុំជាប់ប្រជុំបន្តិច ចាំមើលខ្ញុំចប់ប្រជុំសិន។ ឥឡូវនិយាយអត់បាន»។
ជនជាតិកុលសម្ព័ន្ធភ្នំម៉ុងតាញ៉ាមានគ្នាចំនួន២ក្រុមសរុបទាំងអស់ចំនួន ១៣នាក់បានភៀសខ្លួនដោយសារការធ្វើទុក្ខបុម្នេញពីអាជ្ញាធរវៀតណាមខាងសេរីភាពសាសនា សេរីភាពក្នុងការប្រើប្រាស់អ៊ីនធឺណែត និងសិទ្ធិដីធ្លី ហើយមកលាក់ខ្លួនក្នុងព្រៃនៃខេត្តរតនគីរីកាលពីក្នុងអំឡុងខែវិច្ឆិកា។
វីអូអេបានព្យាយាមទាក់ទងសុំសេចក្តីអត្ថាធិប្បាយបំភ្លឺពីមន្ត្រីអង្គការសហប្រជាជាតិទទួលបន្ទុកសិទ្ធិមនុស្ស និងមន្ត្រីអង្គការសហប្រជាជាតិទទួលបន្ទុកជនភៀសខ្លួន តែមិនអាចទាក់ទងបានទេនៅថ្ងៃច័ន្ទនេះ។
លោកនី ចរិយា ប្រធានក្រុមស៊ើបអង្កេតរបស់សមាគមសិទ្ធិមនុស្សអាដហុក សង្ឃឹមថា អង្គការសហប្រជាជាតិនិងធ្វើកិច្ចការលើជនភៀសខ្លួននេះមិនទៅតាមគំនាបរបស់រដ្ឋាភិបាលទេ។
លោកបានបញ្ជាក់ថា៖ «ខ្ញុំជឿថា គាត់នឹងអនុវត្តទៅតាមកតិកាសញ្ញាស្តីអំពីឋានៈនៃជនភៀសខ្លួន និងពិធីសារស្តីពីជនភៀសខ្លួនដែលរដ្ឋាភិបាលកម្ពុជាបានចុះហត្ថលេខាជាប្រទេសភាគី»។
ជនជាតិកុលសម្ព័ន្ធភ្នំវៀតណាម ដែលរស់នៅតំបន់ខ្ពង់រាបភាគកណ្តាលនៃប្រទេសវៀតណាម ធ្លាប់បានរត់ភៀសខ្លួនមកកម្ពុជាយ៉ាងតិចចំនួនពីរលើករួចមកហើយ គឺលើកទី១នៅឆ្នាំ២០០១ និងលើកទីពីរឆ្នាំ២០០៤ បន្ទាប់ពីមានការបង្ក្រាបទៅលើអ្នកបះបោរជាជនជាតិដើមភាគតិច ដែលប្រឆាំងនឹងរដ្ឋាភិបាលវៀតណាមដែលបានគាបសង្កត់ផ្នែកប្រពៃណី និងសាសនា។
មានជនជាតិដើមភាគតិចជាង៥០ជនជាតិដែលកំពុងរស់នៅក្នុងប្រទេសវៀតណាមត្រូវបានគេអះអាងថា អាជ្ញាធរវៀតណាមបានរិតត្បិតខាងផ្នែកសាសនា សិទ្ធិមនុស្សស្រដៀងៗគ្នានឹងការរិតត្បិត ការធ្វើទុក្ខបុកម្នេញពលរដ្ឋកម្ពុជាក្រោមផងដែរ៕
