មានប្រតិកម្មចម្រុះនៅក្នុងប្រទេសបាគីស្ថានទៅលើរបាយការណ៍របស់សេតវិមានអំពីការស្លាប់របស់ពួកជនស៊ីវិលនៅក្នុងការវាយប្រហារដោយយន្តហោះគ្មានមនុស្សបើកនៅក្នុងប្រទេសបាគីស្ថាន ដែលជាប្រទេសបានរងគ្រោះដោយសារការវាយប្រហារច្រើនជាងគេ និងមានមនុស្សស្លាប់ច្រើនជាងគេនៅខាងក្រៅ«តំបន់មានជម្លោះសកម្ម»។
ក្រសួងការបរទេសបាគីស្ថាន បានចេញផ្សាយសេចក្តីថ្លែងការណ៍ព័ត៌មានមួយដោយបានអំពាវនាវជាថ្មីឱ្យមាន«ការបញ្ឈប់ជាបន្ទាន់នូវការវាយប្រហារដោយកងយន្តហោះគ្មានមនុស្សបើកដែលរំលោភលើបូរណភាពដែនដីនិងអធិបតេយ្យភាពនៃរដ្ឋ»។ រដ្ឋាភិបាលបាគីស្ថានបានបរិហាររិះគន់ជានិច្ចកាលដល់ការវាយប្រហារបែបនេះដែលសាធារណជនមានកាមិនពេញចិត្តយ៉ាងខ្លាំង ក៏ប៉ុន្តែគេមានជំនឿថា អាជ្ញាធរបានយល់ព្រមជាផ្លូវឯកជនឱ្យមានកិច្ចប្រតិបត្តិការបែបនេះដែលយកពួកជនសកម្មប្រយុទ្ធនៅក្នុងតំបន់កុលសម្ព័ន្ធជាទីដៅនៃការវាយប្រហារ។
សេចក្តីរាយការណ៍របស់ស.រ.អា.បានចែងថា មានជនស៊ីវិលពី៦៤នាក់ទៅ១១៦នាក់បានត្រូវសម្លាប់នៅក្នុងការវាយប្រហារដោយយន្តហោះគ្មានអ្នកបើកនៅខាងក្រៅតំបន់មានការប្រយុទ្ធសកម្មពីឆ្នាំ២០០៩ដល់ឆ្នាំ២០១៥។ របាយការណ៍នេះនិយាយថា ការវាយប្រហារទាំងនេះបានបណ្តាលឱ្យយុទ្ធជនពី២៣៧២នាក់ទៅ ២៥៨១នាក់ស្លាប់។
លោក Imran Khan អ្នកនយោបាយប្រឆាំងនិងជាអ្នករិះគន់ខ្លាំងបំផុតម្នាក់ដល់ការវាយប្រហារតាមយន្តហោះគ្មានមនុស្សបើកនេះ បានហៅតួលេខនៃចំនួនមនុស្សស្លាប់របស់រដ្ឋាភិបាលលោក អូបាម៉ា ថា មានតិចជាងចំនួនពិតប្រាកដនៅលើដីជាក់ស្តែង៕
