ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ជើងឯក​កីឡា​វាយ​កូនបាល់​ឬ​វាយ​តឺនីស​ចិន​ដែល​បាត់​ខ្លួន និយាយ​ថា អ្នក​ស្រី​មាន​សុវត្ថិភាព


រូបឯកសារ៖ អ្នក​ស្រី Peng Shuai ជើងឯក​កីឡា​វាយ​កូនបាល់​ឬ​វាយ​តឺនីស​ចិន នៅ​សួន Melbourne ក្នុងទីក្រុង Melbourne ប្រទេស​អូស្ត្រាលី​ កាលពីថ្ងៃទី១៣ ខែមករា ឆ្នាំ២០១៩។ (Reuters)

អ្នក​ស្រី Peng Shuai ជើងឯក​កីឡា​វាយ​កូនបាល់​ឬ​វាយ​តឺនីស​ចិន​ដែល​បាត់​ខ្លួន បាន​បង្ហាញ​ខ្លួនជា​ថ្មី​ជា​សាធារណៈ​កាលពី​ថ្ងៃ​អាទិត្យ​នៅឯ​កន្លែងប្រកួត​កីឡា​យុវជន​មួយក្នុង​ទីក្រុង​ប៉េកាំង​ហើយ​ក្រោយ​មក បាន​ប្រាប់​មន្ត្រី​អូឡាំពិក​ម្នាក់​ថា អ្នក​ស្រី​មាន​សុវត្ថិភាព​ហើយ​មាន​សុខភាព​ល្អ​ទេ។

អ្នក​ស្រី Peng មិន​ត្រូវ​បាន​គេ​ឃើញ​ចាប់តាំង​ពី​ដើម​ខែ​នេះ​មក បន្ទាប់ពី​អ្នក​ស្រី​បាន​ចោទប្រកាន់​លោក Zhang Gaoliអតីត​ឧបនាយក​រដ្ឋមន្ត្រី​ចិន​ពី​ការចាប់បង្ខំ​អ្នកស្រី​ឱ្យ​រួមភេទ​កាលពី​ប៉ុន្មាន​ឆ្នាំ​កន្លង​មក​នេះ។ អវត្តមាន​របស់​អ្នក​ស្រី​ពីក្រសែ​ភ្នែក​សាធារណជន បាន​បណ្តាញ​ឲ្យ​មាន​ការទាមទារ​ពី​អន្តរជាតិឲ្យ​ពួក​មន្ត្រី​ចិនប្រាប់​ពី​សុវត្ថិភាព​របស់​អ្នក​ស្រី។

កាលពី​ថ្ងៃ​អាទិត្យ អតីត​ជើងឯក​វាយ​កូនបាល់​ឬ​តឺនិស​អូឡាំពិក​៣លើក​រូប​នេះ បាន​បង្ហាញ​ខ្លួន​ដោយ​ឈរ​នៅ​ខាងក្រៅ​កន្លែង​វាយ​កូនបាល់​ឬ​តឺនិស គ្រវី​ដៃ​ហើយ​ចុះ​ហត្ថលេខា​លើ​កូន​បាល់​វាយ​តឺនិស​សម្រាប់​ពួក​កូនក្មេង។

ក្រោយ​មក អ្នក​ស្រី​បាន​និយាយ​ទូរស័ព្ទ​រយៈពេល​៣០នាទី​ជាមួយ​លោក Thomas Bach ប្រធាន​គណៈកម្មាធិការ​អូឡាំពិក​អន្តរជាតិ​(IOC)ដែល​បាន​និយាយ​ថា អ្នក​ស្រី សូម​ថ្លែង​អំណរគុណ​គណៈកម្មាធិការ​អូឡាំពិក​អន្តរជាតិចំពោះ​ការព្រួយ​កង្វល់​អំពី​អ្នកស្រី។

គណៈកម្មាធិការ​អូឡាំពិក​អន្តរជាតិ​(IOC) បាន​បញ្ជាក់​នៅ​ក្នុង​សេចក្តី​ថ្លែងការណ៍​ថា៖ «អ្នកស្រី​បាន​ពន្យល់​ថា អ្នក​ស្រី​មាន​សុវត្ថិភាព​និង​សុខភាព​ល្អ ដោយ​កំពុង​រស់​នៅ​ឯ​ផ្ទះ​របស់​អ្នក​ស្រី​ក្នុង​ទីក្រុង​ប៉េកាំង ក៏ប៉ុន្តែ​ចង់​ឲ្យ​មាន​ការ​គោរព​ឯកជនភាព​របស់​អ្នក​ស្រី​នៅពេល​នេះ»។

ការបាត់​ខ្លួន​និង​ការ​ចោទប្រកាន់​របស់​អ្នក​ស្រី Peng ប្រឆាំង​អតីត​មន្ត្រី​ចិន កើត​មាន​ឡើង​នៅពេល​ដែល​រដ្ឋាភិបាល​ក្រុង​ប៉េកាំង​គ្រោង​ធ្វើ​ជា​ម្ចាស់​ផ្ទះ​រៀបចំ​កីឡា​អូឡាំពិក​រដូវ​រងា​ដោយ​ចាប់ផ្តើម​នៅ​ថ្ងៃ​ទី៤ ខែ​កុម្ភៈ ឆ្នាំ​២០២២ នៅ​ពេល​ដែល​មាន​ការថ្កោលទោស​ពីសំណាក់​អន្តរជាតិ​អំពី​ប្រវត្តិ​សិទ្ធិ​មនុស្ស​របស់​ចិន៕

(ព័ត៌មាន​ខ្លះ​នៅ​ក្នុង​អត្ថបទ​នេះ​មាន​ប្រភព​ពី​ទី​ភ្នាក់ងារ​ព័ត៌មាន​ Reutersនិង AP)

XS
SM
MD
LG