រដ្ឋមន្ត្រីក្រសួងសាធារណការនិងដឹកជញ្ជូន លោក ស៊ុន ចាន់ថុល បានឱ្យដឹងថា ផ្លូវល្បឿនលឿនភ្នំពេញ-បាវិត នឹងបើកការដ្ឋានសាងសង់នាដើមខែមិថុនាខាងមុខ ដោយក្រុមហ៊ុនសាជីវកម្មស្ពាននិងថ្នល់ចិន CRBC ដែលជាក្រុមហ៊ុនស្ថាបនាផ្លូវល្បឿនលឿនពីភ្នំពេញទៅខេត្តព្រះសីហនុ។
ផ្លូវល្បឿនលឿនទីពីរក្នុងប្រទេសកម្ពុជា ដែលមានប្រវែងប្រមាណ ១៣៥គីឡូម៉ែត្រ ពីភ្នំពេញទៅកាន់ព្រំដែនប្រទេសវៀតណាមនេះ គ្រោងចំណាយទឹកប្រាក់ ១.៤០០លានដុល្លារអាមេរិក។ នៅក្នុងពិធីសម្ពោធបើកឱ្យប្រើប្រាស់ជាផ្លូវការមណ្ឌលត្រួតពិនិត្យលក្ខណៈបច្ចេកទេស(ឆៀក) យានយន្តសាខាសំរោងអណ្តែត នៅថ្ងៃទី២១ ខែមេសា ២០២៣ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសារធារណការនិងដឹកជញ្ជូន បានឱ្យដឹងថា ផ្លូវល្បឿនលឿនភ្នំពេញ-បាវិត នឹងបើកការដ្ឋាននៅថ្ងៃទី៧ ខែមិថុនា ដែលគ្រោងចំណាយទឹកប្រាក់ ១.៤០០លានដុល្លារអាមេរិក ដោយក្រុមហ៊ុនសាជីវកម្មស្ពាននិងថ្នល់ចិនCRBC។
លោកថ្លែងថា៖ «អានេះច្បាស់ហើយ ព្រោះលោក[នាយករដ្ឋមន្ត្រី ហ៊ុន សែន ចារថ្ងៃ៧ ខែ៦នឹងបើកការដ្ឋានសាងសងផ្លូវល្បឿនលឿនភ្នំពេញទៅបាវិត។ អានេះផ្លូវទី២ របស់យើងហើយ។ ជាមោទនភាពជាតិយើង ដែលមានផ្លូវល្បឿនលឿនទី១ហើយ ឥឡូវដោយសារអ្នកវិនិយោគ គេទុកចិត្តលើរាជរដ្ឋាភិបាល ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន គេយកលុយគេ ១ពាន់៤រយលាន [១៤០០លានដុល្លារអាមេរិក] មកដាក់ទុននៅកម្ពុជាទៀត។ យកលុយដុំដាក់វិនិយោគ យកលុយរាយវិញ»។
កាលពីថ្ងៃទី១០ ខែវិច្ឆិកា ឆ្នាំ២០២២ លោក ស៊ុន ចាន់ថុល បានចុះកិច្ចព្រមព្រៀងក្របខ័ណ្ឌ ជាមួយ ក្រុមហ៊ុនសាជីវកម្មស្ពាននិងថ្នល់ចិន CRBC ដើម្បីឈានទៅចរចាបញ្ចប់កិច្ចព្រមព្រៀងសម្បទានវិនិយោគ ផ្លូវល្បឿនលឿនតភ្ជាប់ពីភ្នំពេញ-បាវិត។ ផ្លូវនេះគ្រោងបញ្ចប់ការសាងសង់នៅចុងឆ្នាំ២០២៦ ឬដើមឆ្នាំ២០២៧។
ផ្លូវល្បឿនលឿនភ្នំពេញ-បាវិត (Phnom Penh-Bavet Expressway) គឺជាគម្រោងផ្លូវល្បឿនលឿនទីពីរហើយក្នុងប្រទេសកម្ពុជា បន្ទាប់ផ្លូវល្បឿនលឿនភ្នំពេញក្រុងព្រះសីហនុ ខណៈផ្លូវនេះ គឺជាផ្លូវថ្មីទាំងស្រុង ដែលត្រូវសាងសង់ជា ៤គន្លង និងតួផ្លូវមានទទឹង ២៥,៥ម៉ែត្រ។ ផ្លូវមួយខ្សែនេះ នឹងចាប់ផ្ដើមចេញពីភ្នំពេញនៅចំណុចផ្លូវក្រវាត់ក្រុងទី៣ កាត់តាមខេត្តកណ្តាល ខេត្តព្រៃវែង និងខេត្តស្វាយរៀង ឆ្ពោះទៅក្រុងបាវិត ព្រំដែនកម្ពុជា-វៀតណាម។
បើតាមការចុះផ្សាយរបស់ក្រសួងព័ត៌មាន លោក ស៊ុន ចាន់ថុល ធ្លាប់បានលើកឡើងថា ផ្លូវល្បឿនលឿនតភ្ជាប់ពីភ្នំពេញ-បាវិតនេះ មានសារៈសំខាន់ណាស់ ក្នុងការតភ្ជាប់ពីប្រទេសចិន មកភូមា មកប្រទេសថៃ មកកម្ពុជា និងទៅវៀតណាម ដើម្បីផ្តល់ភាពងាយសម្រួលក្នុងការដឹកជញ្ជូនទំនិញ និងការធ្វើដំណើរ។
លោក ស៊ុន ចាន់ថុល ក៏បានថ្លែងនៅថ្ងៃសុក្រនេះថា ការស្ថាបនាផ្លូវល្បឿនលឿននេះ អាចនឹងប៉ះផ្ទះរបស់ប្រជាពលរដ្ឋមួយចំនួន ប៉ុន្តែក្រសួងនឹងខិតខំបញ្ចៀស និងដោះស្រាយសំណងទៅតាមនីតិវិធីរបស់ក្រសួងសេដ្ឋកិច្ច និងហិរញ្ញវត្ថុ។
លោកបញ្ជាក់ថា៖ «តាយើងធ្វើផ្លូវហើយ តែងតែប៉ះផ្ទះប្រជាពលរដ្ឋ ប៉ុន្តែក្នុងពេលសិក្សានេះ យើងតែងតែប្រឹងប្រែងបញ្ចៀសឱ្យផុតឱ្យបានច្រើនក្នុងការប៉ះពាល់ទៅដល់លំនៅដ្ឋាន បងប្អូនប្រជាពលរដ្ឋយើង។ ក្នុងករណីចៀសមិនបាន [បើ]ត្រូវមានការប៉ះពាល់ ត្រូវតែរើចេញ គឺគណៈកម្មាការដោះស្រាយគោលនយោបាយ ដឹកនាំដោយក្រសួងសេដ្ឋកិច្ច ហិរញ្ញវត្ថុ លោកនឹងរៀបចំនីតិវិធី បង់ថ្លៃជូនទៅតាមនីតិវិធីរបស់ក្រសួងសេដ្ឋកិច្ច ហិរញ្ញវត្ថុ មិនមែនចេះតែយកដីរបស់បងប្អូនប្រជាពលរដ្ឋ ដោយមិនបានបង់ថ្លៃជូនគាត់ទេ»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ ចង់ឃើញការផ្តល់ព័ត៌មាន និងដោះស្រាយផលប៉ះពាល់ប្រកបដោយតម្លាភាព ព្រោះលោកថាផ្លូវល្បឿនលឿនភ្នំពេញ-ព្រះសីហនុ គឺជាមេរៀនមួយ ដែលបង្ហាញឱ្យឃើញថា ពលរដ្ឋខ្លះសប្បាយចិត្ត និងពលរដ្ឋខ្លះមិនសប្បាយចិត្ត ដោយហេតុពួកគេរងផលប៉ះពាល់ ដោយសារការមិនទទួលបានព័ត៌មានគ្រប់ជ្រុងជ្រោយអំពីការវិនិយោគនោះ។
លោកថ្លែងថា៖ «ទាំងអាជ្ញាធរ ទាំងដៃគូ ពាក់ព័ន្ធទាំងអស់ ជាពិសេសក្រុមហ៊ុន ដែលវិនិយោគត្រូវមានការផ្តល់នូវព័ត៌មានបែបតម្លាភាពជាមួយប្រជាពលរដ្ឋ ដើម្បីកុំឱ្យព័ត៌មានទាំងឡាយមានការខ្វះចន្លោះ ព្រោះយើងដឹងហើយថា រាល់ការអភិវឌ្ឍតែងតែមានផលប៉ះពាល់ អ៊ីចឹងការដោះស្រាយត្រូវធ្វើឡើងដោយមានតម្លាភាព ហើយឆ្លើយតបជាមួយនឹងអ្វីដែលជាផលប៉ះពាល់ពិតប្រាកដ មានផលប៉ះពាល់តិច និងផលប៉ះពាល់ធ្ងន់ធ្ងរដល់ផលប្រយោជន៍របស់ប្រជាពលរដ្ឋ»។
ក្រុមហ៊ុនសាជីវកម្មស្ពានថ្នល់ចិន CRBC ជាក្រុមហ៊ុនសាងសង់ផ្លូវល្បឿនលឿនភ្នំពេញ-ក្រុងព្រះសីហនុ ក្រោមរូបភាពវិនិយោគ «សាងសង់-ប្រតិបត្តិការ-ផ្ទេរ» (BOT: Build-Operate-Transfer) ជាមួយរយៈពេលវិនិយោគចំនួន ៥០ឆ្នាំ។
ក្រុមហ៊ុនសាជីវកម្មស្ពានថ្នល់ចិន CRBC ក៏បានសិក្សាគម្រោងលើកកម្រិតផ្លូវរថភ្លើងភាគខាងជើង ភ្នំពេញ-ប៉ោយប៉ែត ឱ្យទៅជាផ្លូវរថភ្លើងល្បឿនលឿនដំបូងគេបំផុតនៅកម្ពុជា។ នេះបើតាមព័ត៌មានដែលក្រសួងសាធារណការ និងដឹកជញ្ជូន បង្ហោះលើទំព័រហ្វេសប៊ុករបស់ខ្លួន កាលពីខែមករា ឆ្នាំ២០២៣។
ក្រុមហ៊ុនសាជីវកម្មស្ពានថ្នល់ចិន CRBC ក៏កំពុងសិក្សាការស្ថាបនាផ្លូវល្បឿនលឿនពីភ្នំពេញទៅខេត្តសៀមរាប ដែលគ្រោងនឹងបញ្ចប់នាចុងខែឧសភា ឆ្នាំ២០២៣ ខាងមុខ។ នេះបើតាមលោក ស៊ុន ចាន់ថុល៕
