នៅក្នុងពិធីបើកព្រឹត្តិការណ៍អង្គរសង្ក្រាន្តឆ្នាំ ២០២៣ នៅខេត្តសៀមរាប លោកនាយករដ្ឋមន្ត្រី ហ៊ុន សែន បានរំឭកឡើងវិញអនុសាសន៍របស់អតីតនាយករដ្ឋមន្ត្រីសិង្ហបុរីមួយរូប ពាក់ព័ន្ធនឹងគោលនយោបាយរបស់រដ្ឋាភិបាលកម្ពុជា ក្នុងការបើកឱ្យមានជើងយន្តហោះត្រង់មកកាន់ខេត្តសៀមរាប ដែលជាគោលដៅទេសចរណ៍វប្បធម៌សំខាន់មួយរបស់ប្រទេសកម្ពុជា។
លោក ហ៊ុន សែន ដែលបានចាត់ទុកខេត្តសៀមរាបថាជាប៉ូលសេដ្ឋកិច្ចទី ៣ របស់ប្រទេស និងដែលអាចនឹងក្លាយជាគោលដៅវិនិយោគឧស្សាហកម្មបន្ថែមលើវិស័យទេសចរណ៍ផងនោះ លើកឡើងថា ការផ្តល់យោបល់របស់អតីតនាយករដ្ឋមន្ត្រីសិង្ហបុរីលោក ហ្គោ ចុកតុង (Goh Chok Tong) ក្នុងការបើកឱ្យមានជើងយន្តហោះត្រង់មកកាន់ខេត្តសៀមរាបនោះ ជារឿងត្រឹមត្រូវ ដោយសារវាបាននាំមកនូវការវិនិយោគច្រើនសន្ធឹកសន្ធាប់ក្នុងវិស័យទេសចរណ៍។
ថ្លែងនៅឯបរិវេណប្រាសាទបាយ័ន ក្នុងខេត្តសៀមរាប នាព្រឹកថ្ងៃសុក្រនេះ លោកនាយករដ្ឋមន្ត្រី ហ៊ុន សែន បានប្រាប់ក្រុមមន្ត្រី និងពលរដ្ឋថា លោកបានទទួលអនុសាសន៍របស់លោក Goh Chok Tong កាលពីឆ្នាំ ១៩៩៤ ហើយនៅឆ្នាំ ១៩៩៧ លោកបានសម្រេចចិត្តបើកឱ្យមានជើងយន្តហោះត្រង់ចូលមកខេត្តសៀមរាប តាមរយៈក្រុមហ៊ុន Bangkok Airways បើទោះបីជាមានសំឡេងប្រឆាំងខ្លះក្តី។
លោកថ្លែងថា៖ «គាត់បានផ្តល់យោបល់ឱ្យខ្ញុំនៅឆ្នាំ ១៩៩៤ ថា ប្រសិនបើខ្ញុំជាឯកឧត្តម ហ៊ុន សែន ខ្ញុំនឹងបើកឱ្យសៀមរាបធ្វើការហោះហើរត្រង់ ដឹកទេសចរមកកាន់ទីនេះ។ វាពិតជាអនុសាសន៍ដ៏ត្រឹមត្រូវ។ ឆ្នាំ ១៩៩៧ នៅពេលដែលមានព្រឹត្តិការណ៍ដ៏អាក្រក់ នៅទីក្រុងភ្នំពេញ ក្រុមហ៊ុនយន្តហោះទាំងអស់ ក្រុមហ៊ុនយន្តហោះស្ទើរតែទាំងអស់ បានរត់ចេញពីកម្ពុជា គ្មានការហោះហើរ។ ខ្ញុំក៏ចាប់ផ្តើមបើកនៅខេត្តសៀមរាបដោយ Bangkok Airways ធ្វើការហោះហើរនៅពេលនោះ»។
លោកបានបន្ថែមថា៖ «យើងអាចនឹងពិនិត្យមើលថា ការសម្រេចចិត្តបើកជើងមេឃសម្រាប់ការហោះហើរត្រង់នៅខេត្តសៀមរាបខុស ឬត្រូវ គឺស្ថិតនៅលើការសង្កេតរបស់យើងនៅត្រង់ថា ប្រសិនបើយើងមិនអាច មិនមាន មិនបើកឱ្យមានការហោះហើរត្រង់មកកាន់សៀមរាបទេ គ្មាននរណាមកវិនិយោគសណ្ឋាគាររាប់ពាន់លានដុល្លារដូចសព្វថ្ងៃនេះទេ»។
លោករៀបរាប់បន្តទៀតថា ចាប់តាំងពីការបើកចំហជើងមេឃដែលអនុញ្ញាតឱ្យមានជើងយន្តហោះត្រង់សំដៅមកខេត្តសៀមរាបមកនោះ ខេត្តដែលសម្បូរដោយប្រាសាទបុរាណមួយនេះមានកំណើនសណ្ឋាគារ ដែលដើមឡើយលោកថា មានតែសណ្ឋាគារចាស់ៗពីរតែប៉ុណ្ណោះ។
លោកថ្លែងថា៖ «ពេលនោះ យើងចាប់ផ្តើមពីសណ្ឋាគារចាស់ៗតែពីរប៉ុណ្ណោះ ប៉ុន្តែនៅពេលដែលយើងបើក ឥឡូវយើងមានសណ្ឋាគាររាប់រយសណ្ឋាគារ។ នេះជាចំណុចនៃក្របខណ្ឌគោលនយោបាយបើកចំហជើងមេឃសម្រាប់ការហោះហើរត្រង់»។
វិស័យទេសចរណ៍ក្នុងខេត្តសៀមរាបបានរងសម្ពាធខ្លាំងពីការរាតត្បាតនៃជំងឺឆ្លងកូវីដ១៩ ដែលបានធ្វើឱ្យសណ្ឋាគារជាច្រើនបិទទ្វារ និងសេវាកម្មទេសចរណ៍ផ្សេងៗទៀតផ្អាកដំណើរការ។ ប៉ុន្តែចាប់តាំងពីរដ្ឋាភិបាលកម្ពុជាបើកប្រទេសឡើងវិញកាលពីខែវិច្ឆិកា ឆ្នាំ ២០២១ កំណើនទេសចរផ្ទៃក្នុងនៅខេត្តសៀមរាបបានចាប់ផ្តើមរើបឡើងវិញសន្សឹមៗ ហើយមកដល់ពេលនេះ មានលំហូនៃភ្ញៀវទេសចរបរទេសចូលមកកាន់ខេត្តនេះជាបណ្តើរៗហើយដែរ។ ចំណែកសណ្ឋាគារមួយចំនួនក៏ចាប់ផ្តើមដំណើរការឡើងវិញ ហើយខ្លះក៏នៅបន្តបិទទ្វារ។ នេះបើតាមអ្នកពាក់ព័ន្ធក្នុងវិស័យទេសចរណ៍។
នៅក្នុងពិធីបើកព្រឹត្តិការណ៍អង្គរសង្ក្រាន្តឆ្នាំ ២០២៣ នៅខេត្តសៀមរាបដដែលនោះ លោកនាយករដ្ឋមន្ត្រី ហ៊ុន សែន បានប្រកាសឱ្យដឹងទៀតថា ព្រលានយន្តហោះដ៏ធំថ្មីមួយគឺអាកាសយានដ្ឋានអន្តរជាតិសៀមរាប-អង្គរ ដែលមានសមត្ថភាពទទួលយកយន្តហោះខ្នាតធំ អាចនឹងចាប់ផ្តើមដំណើរការនៅខែតុលា ឆ្នាំ ២០២៣ នេះ។
លោកថ្លែងថា៖ «ទន្ទឹមនឹងនេះ ក៏សូមជម្រាបជូនថា តាមរយៈនៃការវិនិយោគ ព្រលានយន្តហោះដ៏ធំមួយនៅខេត្តសៀមរាប ប្រហែលជាមិនយូរជាងខែតុលាខាងមុខនេះទេ យើងនឹងបើកឱ្យប្រើប្រាស់នូវព្រលានយន្តហោះដ៏ធំ នៅក្នុងខេត្តសៀមរាប ដែលនេះគឺអាចនិយាយបានថា វាជាដំណើរការមួយដែលយើងអាចនឹងឈានទៅទទួលយន្តហោះខ្នាតធំ ដែលហោះត្រង់ពីប្រទេសនានាមកចុះនៅខេត្តសៀមរាប»។
លោកបញ្ជាក់ទៀតថា ព្រលានយន្តហោះថ្មីនេះអាចទាក់ទាញភ្ញៀវទេសចរបន្ថែមទៀត ហើយជាមួយនឹងការវិនិយោគយ៉ាងគំហុកក្នុងខេត្តសៀមរាប តំបន់ខ្លះនៅក្នុងខេត្តទេសចរណ៍មួយនេះ នឹងអាចប្រែក្លាយទៅជាតំបន់ឧស្សាហកម្មផងដែរ៕
