ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រសួង​រ៉ែ​និង​ថាមពល​ចាប់​ផ្តើម​រឹត​បន្តឹង​ការ​លក់​ហ្គាស​តាម​ផ្ទះ​ល្វែង​ ក្រោយ​មាន​ករណី​ផ្ទុះ​ហ្គាសស្លាប់


រូបឯកសារ៖ ធុងហ្គាសជាច្រើននៅខាងមុខផ្ទះ ក្រោយហេតុការណ៍ផ្ទុះហ្គាសសម្លាប់មនុស្ស៤នាក់ កាលពីថ្ងៃទី១៨ ខែកក្កដា ឆ្នាំ២០២០។ (ស៊ុន ណារិន/វីអូអេ)

ក្រសួង​រ៉ែ និង​ថាមពល​បាន​ចេញ​ប្រកាស​ថ្មី​មួយ ​ដោយ​តម្រូវ​ឲ្យ​អ្នក​លក់​ដូរ​ហ្គាស​ជា​កំប៉ុង​និង​ធុង​ទាំង​អស់ ​ត្រូវ​សុំ​ការ​អនុញ្ញាត​ពី​អាជ្ញាធរ​ពាក់ព័ន្ធ​ ដោយ​ក្នុង​នោះ​មាន​ការ​កម្រិត​បរិមាណ​លក់​ហ្គាស ​នៅ​តាម​ផ្ទះ​ល្វែង​ផង​ដែរ។ ​នេះ​បើ​យោង​តាម​ប្រកាស​ស្តីពី​នីតិវិធី​នៃ​ការ​គ្រប់​គ្រង​បច្ចេកទេស​សុវត្ថិ​ភាព​ឧស្ម័ន​អិលភីជី​ក្នុង​កំប៉ុង​និង​ធុង ​និង​ប្រេង​រំអិល​ក្នុង​កំប៉ុង​និង​ធុង ​ដើម្បី​លក់​និង​ប្តូរ​ដល់​យានយន្ត​ ​ចុះ​ថ្ងៃ​ទី​៧ ខែ​សីហា ឆ្នាំ​២០២០ និង​មន្រ្តី​របស់​ក្រសួង​រ៉ែ និង​ថាមពល។​

ការ​កំណត់​នេះ​ជា​គោល​ដៅ​មួយ​ក្នុង​ការ​កាត់​បន្ថយ​ហានិភ័យ​ ដែល​អាច​កើត​ឡើង ​ដោយសារ​ការ​ផ្ទុះ​ហ្គាស​ដែល​ជា​ការ​ព្រួយ​បារម្ភ​មួយ។​ ប្រកាស​ដែល​ចុះ​ហត្ថលេខា​ដោយ​រដ្ឋមន្រ្តី​ក្រសួង​រ៉ែ និង​ថាមពល​លោក ស៊ុយ សែម ​ធ្វើ​ឡើង​ ក្រោយ​មាន​ករណី​ផ្ទុះ​ហ្គាស​មួយ​នៅ​កណ្តាល​រាជធានី​ភ្នំពេញ ​កាល​ពី​ខែ​កក្កដា ​ដែល​សម្លាប់​មនុស្ស​៤​នាក់​និង​របួស​៥​នាក់។​

បើ​តាម​ប្រកាស​ដែល ​VOA ​ទទួល​បាន​ ការ​លក់​ដូរ​ហ្គាស​តូចតាច​និង​តាម​កម្រិត​កំណត់ ​ត្រូវ​មាន​ការ​អនុញ្ញាត​ពី​រដ្ឋបាល​ក្រុង​ស្រុក​ខណ្ឌ​ ដែល​ទីតាំង​អាជីវកម្ម​នោះ​ស្ថិត​នៅ។​ ការ​អនុញ្ញាត​ពី​រដ្ឋបាល​ក្រុង​ស្រុក​ខណ្ឌ​ កំណត់​ចំពោះ​ឧស្ម័ន​អិលភីជី​ដែល​ប្រើ​កំប៉ុង​ឬ​ធុង​ ដែល​មាន​ចំណុះ​ឧស្ម័ន​អិលភីជី​ ចាប់​ពី​ ៤៥​គីឡូ​ក្រាម​ ចុះ​ក្រោម​និង​មាន​ស្តុក​ឧស្ម័ន​ជាក់​ស្តែង​សរុប​ ចាប់​ពី​ ១០១​គីឡូក្រាម ​ដល់ ​៥​ម៉ឺន​គីឡូ​ក្រាម។​ ចំពោះ​ប្រេង​រំអិល​វិញ​ មាន​កំណត់​ប្រើ​កំប៉ុង​ឬ​ធុង​ ដែល​មាន​ចំណុះ​ប្រេង​រំអិល ​ចាប់​ពី ​២០០​លីត្រ​ ចុះ​ក្រោម ​និង​មាន​ស្តុក​ប្រេង​រំអិល​ជាក់​ស្តែង​សរុប ​ចាប់​ពី ​២០១​លីត្រ ​ដល់ ​១៥​ម៉ឺន​លីត្រ។​

ក្រសួង​រ៉ែ​និង​ថាមពល​ឲ្យ​ដឹង​ថា​ ការ​ដាក់​ពាក្យ​ស្នើ​សុំ​ត្រូវ​ធ្វើ​ឡើង​នៅ​ការិយាល័យ​ច្រក​ចេញ​ចូល​តែ​មួយ​ ស្រប​តាម​ការ​កំណត់​របស់​រដ្ឋបាល​ក្រុង​ស្រុក​ខណ្ឌ។​

ក្រុម​ហ៊ុន​ដែល​ចង់​រក​ស៊ី​លក់​ហ្គាស​និង​ប្រេង​រំអិល​នេះ​ត្រូវ​សុំ​ការ​អនុញ្ញាត​ពី​ក្រសួង​រ៉ែ និង​ថាមពល​ដោយ​ផ្ទាល់​ ប្រសិន​បើ​ការ​លក់​ដូរ​កំប៉ុង​ឬ​ធុង​ ចាប់​ពី​ ៤៨​គីឡូ​ក្រាម​ ចុះ​ក្រោម​និង​មាន​ស្តុក​ឧស្ម័ន​លើស​ពី ​៥​ម៉ឺន​គីឡូក្រាម។ ​ចំពោះ​ប្រេង​រំអិល​វិញ​គឺ​ចាប់​ពី​ ២០០​លីត្រ​ ចុះ​ក្រោម​និង​មាន​ស្តុក​ជាក់​ស្តែង​សរុប​លើស​ពី​ ១៥​ម៉ឺន​លីត្រ។​

អគ្គនាយក​នៃ​អគ្គ​នាយកដ្ឋាន​ប្រេងកាត​នៃ​ក្រសួង​រ៉ែ និង​ថាមពល​ លោក​ ជៀប សួរ​ មាន​ប្រសាសន៍​ថា​ នេះ​ជា​ប្រកាស​ថ្មី​មួយ​ដែល​ចែង​លម្អិត​ ដោយសារ​កន្លង​ទៅ​មាន​ជា​សេចក្តី​ណែនាំ​ខ្លីៗ​តែ​ប៉ុណ្ណោះ។​ លោក​បន្ត​ថា ​សម្រាប់​ផ្ទះ​ល្វែង​ទីតាំង​តូចៗ​ជាប់ៗ​គ្នា​ មាន​ការ​អនុញ្ញាត​ឲ្យ​លក់​ហ្គាស​ត្រឹម​តែ​ ៥០០​គីឡូ​ក្រាម ចុះ​ក្រោម ​ដែល​សរុប​ទៅ​មាន​ជាង ​៣០​ធុង ​តែ​ប៉ុណ្ណោះ។​ លោក​បញ្ជាក់​ថា​ ការ​បញ្ចូល​ហ្គាស​ក្នុង​ធុង​ ត្រូវ​មាន​ទីតាំង​ជាក់​លាក់​ ដោយ​មាន​ឧបករណ៍​គ្រប់​គ្រាន់​ គឺ​មិន​អនុញ្ញាត​ឲ្យ​បញ្ចូល​នៅ​ផ្ទះ​ល្វែង​នោះ​ទេ។​

មន្រ្តី​រូប​នោះ​អំពាវនាវ​ឲ្យ​ប្រជា​ពលរដ្ឋ​អនុវត្ត​តាម​ការ​ណែនាំ ​ដើម្បី​ធានា​កាត់​បន្ថយ​ហានិភ័យ​នៃ​ការ​ផ្ទុះ​ហ្គាស។​

លោក​មាន​ប្រសាសន៍​ថា៖​ «នៅ​ក្នុង​ផ្ទះ​ល្វែង​ យើង​អត់​ឲ្យ​មាន​បញ្ចូល​ទេ។​ ហើយ​ទន្ទឹម​នឹង​នេះ​ ទីតាំង​ផ្សេងៗ​ទៀត​តាម​កម្រិត​វា។​ ប្រសិន​បើ​បរិមាណ​វា​កម្រិត​ណា​ វា​ត្រូវ​មាន​គម្លាត​ពី​ទីតាំង​ផ្ទះ​អ្នក​ជិត​ខាង ​ឬ​ក៏​កន្លែង​ការដ្ឋាន​ផ្សេងៗ ​ប៉ុន្មាន​ម៉ែត្រៗ»។​

លោក​ ជៀប សួរ ​បន្ត​ថា​ ក្រសួង​នឹង​ធ្វើ​ការ​ផ្សព្វផ្សាយ​និង​ការ​បណ្តុះ​បណ្តាល​ដល់​ថ្នាក់​ក្រោម​ជាតិ​អំពី​ប្រកាស​នេះ។​

នាយក​ប្រតិបត្តិ​ប្រចាំ​ប្រទេស​កម្ពុជា​នៃ​សម្ព័ន្ធ​ភាព​គណនេយ្យ​សង្គម​ លោក ​សន ជ័យ​ មាន​ប្រសាសន៍​ថា​ ការ​កម្រិត​ស្តង់ដារ​អប្បបរមា​នៃ​ការ​គ្រប់​គ្រង​ទុក​ដាក់​ហ្គាស​ជា​រឿង​ចាំបាច់​មួយ ​ខណៈ​ការ​ប្រើប្រាស់​ហ្គាស​មាន​ការ​កើន​ឡើង ​ពី​មួយ​ថ្ងៃ​ទៅ​មួយ​ថ្ងៃ​ ហើយ​ហានិភ័យ​នៅ​តែ​ខ្ពស់​នៅ​ឡើយ។​

លោក​មាន​ប្រសាសន៍​ថា៖​ «យើង​មើល​ទៅ​លើ​ឥរិយាបថ​នៃ​ការ​យល់​ដឹង​ទៅ​លើ​ហានិភ័យ​វិញ​ ខ្ញុំ​យល់​ថា នៅ​មាន​កម្រិត​ទាប។​ សូម្បី​តែ​ការ​ដឹក​ជញ្ជូន​ហ្នឹង​ ក៏​មាន​ការ​ព្រួយ​បារម្ភ​អំពី​លទ្ធភាព​នៃ​ការ​ផ្ទុះ​ឆេះ​ដែរ។ ​អ៊ីចឹង​រូបភាព​ជា​ច្រើន​ ដែល​យើង​មើល​ឃើញ​ទៅ​លើ​បញ្ហា​ឧស្ម័ន​ហ្គាស​នេះ»។​

លោក​ សន ជ័យ ​បន្ត​ថា​ កម្ពុជា​ត្រូវ​មាន​យន្ត​ការ​នៃ​ការ​តាម​ដាន​និង​ត្រួត​ពិនិត្យ​ជា​ប្រចាំ ​ដើម្បី​ធានា​ការ​អនុវត្ត​របស់​អ្នក​លក់​ដូរ។​

លោក​បញ្ជាក់​ថា៖​ «រឿង​ដែល​សំខាន់​គឺ​ការ​អនុវត្ត។​ ការ​អនុវត្ត​នេះ​វា​ត្រូវ​ការ​មន្រ្តី​ដែល​សកម្ម ហើយ​នឹង​ចុះ​ត្រួត​ពិនិត្យ​ឲ្យ​បាន​ហ្មត់​ចត់​ទូលំ​ទូលាយ។​ ចៀសវាង​កុំ​ឲ្យ​មាន​បញ្ហា ​ដូច​អ្វី​ដែល​កើត​មក​កន្លង​មក​ហ្នឹង។​ ក្របី​បាត់​ទើប​ធ្វើ​របង​ជា​ក្រោយ ​បណ្តែត​បណ្តោយ​ឲ្យ​មាន​ការ​លក់​ដូរ​ដោយ​ខុស​ច្បាប់​ ហើយ​ទី​បញ្ចប់​ មិន​មាន​អ្វី​ក្រៅ​តែ​ពី​ការ​បញ្ជាក់​ពី​រដ្ឋាភិបាល​ថា កន្លែង​លក់​ដូរ​ហ្នឹង​លក់​ដូរ​ចែក​ចាយ​ដោយ​ខុស​ច្បាប់»។​

បើ​តាម​ប្រកាស​ថ្មី​នេះ អគ្គ​នាយកដ្ឋាន​ប្រេងកាត​នៃ​ក្រសួង​រ៉ែ និង​ថាមពល​ មាន​ភារកិច្ច​ពិនិត្យ​និង​ផ្តល់​យោបល់​លើ​សំណុំ​ឯកសារ​ស្នើ​សុំ​ ហើយ​ក្រុម​មន្រ្តី​ជំនាញ​ត្រូវ​ចុះ​ពិនិត្យ​ទីតាំង​ស្នើ​សុំ​ជាក់​ស្តែង​ តាម​ការ​ចាំបាច់។​ សុពល​ភាព​នៃ​អាជ្ញាបណ្ណ​មាន​រយៈ​ពេល ​១០​ឆ្នាំ៕

តួលេខនៃករណីឆ្លងជំងឺកូវីដ១៩

XS
SM
MD
LG