ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ករណី​ផ្ទុះ​ហ្គាស​សម្លាប់​មនុស្ស​៤​នាក់​នៅ​ភ្នំពេញ នាំឲ្យ​ព្រួយ​បារម្ភ​បន្ថែម​លើ​ការគ្រប់គ្រង​ហ្គាស​នៅ​កម្ពុជា


ធុងហ្គាសជាច្រើននៅខាងមុខផ្ទះ ក្រោយហេតុការណ៍ផ្ទុះហ្គាសសម្លាប់មនុស្ស៤នាក់ កាលពីថ្ងៃទី១៨ ខែកក្កដា ឆ្នាំ២០២០។ (ស៊ុន ណារិន/វីអូអេ)

សមត្ថកិច្ច​ឲ្យ​ដឹង​ថា​ ហេតុការណ៍​នេះ ​បណ្តាល​មកពី​ការ​ផ្សារ​ដែក​ខ្ទាត​កម្ទេច​ផ្កា​ភ្លើង​ប៉ះ​ជាមួយ​ហ្គាស ​ ទើប​បណ្តាល​ឲ្យ​ឆាប​ឆេះ​តែម្តង។​

មន្រ្តី​សង្គម​ស៊ីវិល​អះអាង​ថា ប្រទេស​កម្ពុជា​មិន​ទាន់​មាន​ការ​គ្រប់គ្រង​ហ្គាស​ឲ្យ​បាន​ល្អ​ត្រឹម​ត្រូវ​ និង​មាន​សុវត្ថិភាព​នៅ​ឡើយ​ទេ ​ខណៈ​ការ​យល់​ដឹង​របស់​ប្រជា​ពលរដ្ឋ​នៅ​មាន​កម្រិត​នៅ​ឡើយ។​ ការ​លើក​ឡើង​បែប​នេះ​ធ្វើ​ឡើង​ ក្រោយ​មាន​គ្រោះ​អគ្គីភ័យ​នៅ​ផ្ទះ​លក់​ហ្គាស​មួយ​ក្នុង​ខណ្ឌ​ដូនពេញ​ រាជធានី​ភ្នំពេញ ​កាល​ពី​ថ្ងៃ​សៅរ៍​សប្តាហ៍​មុន​ ដែលបានសម្លាប់​មនុស្ស​៤​នាក់ ​និង​៥​នាក់ទៀតរងរបួស។​

ហេតុ​ការណ៍​អគ្គីភ័យ​ដោយសារ​ផ្ទុះ​ហ្គាស​នេះ​ កើត​ឡើង​នៅ​ផ្ទះ​លក់​ហ្គាស ​ខ្យល់​អ៊ីដ្រូសែន​ និង​ថ្ម​ស្អុយ​មួយ​កន្លែង​ ស្ថិត​តាម​បណ្តោយ​ផ្លូវ​លេខ​៦៣​ សង្កាត់​បឹងរាំង ​ខណ្ឌ​ដូនពេញ ​រាជធានី​ភ្នំពេញ។ ធុង​ហ្គាស​ធំៗ​ជា​ច្រើន​ត្រូវ​បាន​ដាក់​លក់​នៅ​ខាង​ក្នុង​ផ្ទះ​ និង​ខាង​មុខ​ផ្ទះ។ ​ការ​ផ្ទុះ​នេះ​បណ្តាល​ឲ្យ​កូន​របស់​ម្ចាស់​ផ្ទះ​ពីរ​នាក់ ​និង​កម្មករ​ពីរ​នាក់​ស្លាប់។ ​ នេះ​បើ​យោង​តាម​វេបសាយ​របស់​អគ្គ​ស្នង​ការដ្ឋាន​នគរបាល​ជាតិ។ ​ សមត្ថកិច្ច​ឲ្យ​ដឹង​ថា​ ហេតុការណ៍​នេះ ​បណ្តាល​មកពី​ការ​ផ្សារ​ដែក​ខ្ទាត​កម្ទេច​ផ្កា​ភ្លើង​ប៉ះ​ជាមួយ​ហ្គាស ​ ទើប​បណ្តាល​ឲ្យ​ឆាប​ឆេះ​តែម្តង។​

លោក​ យង់ គិមអេង ​ប្រធាន​មជ្ឈមណ្ឌល​ប្រជា​ពលរដ្ឋ​ដើម្បី​អភិវឌ្ឍន៍​និង​សន្តិភាព ​ថ្លែង​ប្រាប់ ​VOA​ នៅ​ថ្ងៃ​ច័ន្ទ​នេះ​ថា​ ការ​ផ្ទុះ​ហ្គាស​ឆេះ​ផ្ទះ​និង​ធ្វើ​ឲ្យ​មនុស្ស​ស្លាប់​និង​រង​របួស​នេះ​ កើត​ឡើង​ជា​បន្ត​បន្ទាប់​គួរ​ឲ្យ​ព្រួយ​បារម្ភ​នៅ​កម្ពុជា។​ លោក​បន្ត​ថា​ ការ​ដាក់​លក់​ហ្គាស​នៅ​កម្ពុជា​ស្ថិត​ក្នុង​ហានិភ័យ​ខ្ពស់​និង​ងាយ​បង្ក​គ្រោះ​ថ្នាក់ ​ក្នុង​នោះ​មាន​ការ​ប្រើ​ប្រាស់​ធុង​ហ្គាស​ចាស់ ​មិន​ត្រឹមត្រូវ​តាម​ស្តង់ដារ ​ដែល​ទាមទារ​ការ​ត្រួត​ពិនិត្យ​ឲ្យ​បាន​ហ្មត់​ចត់។​

លោក​មាន​ប្រសាសន៍​ថា៖ ​«ផ្ទះ​គាត់​មាន​តែ​មួយ​បន្ទប់​ហើយ​គាត់​ដាក់​ហ្គាស​លក់ ​ ហើយ​វា​អត់​មាន​ឃ្លាំង​ស្តុក​អី​ត្រឹម​ត្រូវ​ កន្លែង​ដាក់​ស្តុក​អី​ផ្សេង​ដោយ​ឡែក។ ​ អ៊ីចឹង​ទៅ ​កាល​ណា​ផ្ទុះ​ទៅ​ គឺ​ហានិភ័យ​ទាំង​ខ្លួន​ឯង​ និង​អ្នក​ដែល​នៅ​ជិត​ខាង​ហ្នឹង​បាទ។​ អ៊ីចឹង​រឿង​ហ្នឹង ​ដែល​ជា​ការ​មួយ​ព្រួយ​បារម្ភ»។​

លោក​បន្ត​ថា ​ប្រជា​ពលរដ្ឋ​ក៏​មិន​ទាន់​បាន​ស្វែង​យល់​ពី​ហានិភ័យ​នៃ​ការ​ផ្ទុះ​ហ្គាស​នេះ​និង​របៀប​នៃ​ការ​ប្រើប្រាស់​ឲ្យ​មាន​សុវត្ថិភាព​នៅ​ឡើយ​ទេ។​

លោក​បញ្ជាក់​ថា៖​ «រឿង​នេះ​កើត​ឡើង​ជា​ច្រើន​លើក​ច្រើន​សា​ហើយ​ដែរ​ដូច្នេះ​ខ្ញុំ​យល់​ថា​ ​វា​គួរ​តែ​មាន​វិធាន​ការ​ពី​អាជ្ញាធរ​នៅ​ក្នុង​ការ​ណែនាំ​គាត់​នៅ​ក្នុង​ការ​ទុក​ដាក់​យ៉ាង​ម៉េច​ឲ្យ​មាន​សុវត្ថិ​ភាព»។​

បើ​តាម​លោក​យង់ គិមអេង​ ការ​ប្រើ​ប្រាស់​ហ្គាស​នៅ​កម្ពុជា​មាន​ច្រើន ​ដោយ​សារ​វា​មាន​តម្លៃ​ថោក​ជាង​សាំង។ ​លោក​ក៏​ព្រួយ​បារម្ភ​ចំពោះ​រថយន្ត​តាក់ស៊ី​ដែល​ប្រើប្រាស់​ហ្គាស​ផង​ដែរ ​ហើយ​គួរ​មាន​ការ​ត្រួត​ពិនិត្យ​ឲ្យ​បាន​ត្រឹម​ត្រូវ។​

កាល​ពី​ខែ​សីហា ​ឆ្នាំ​២០១៩ ​មាន​ករណី​ផ្ទុះ​ហ្គាស​ បង្ក​ជា​អគ្គីភ័យ​ឆេះ​ស្ថានីយ​បញ្ចូល​ហ្គាស​រថយន្ត​មួយ​កន្លែង​នៅ​ខេត្ត​សៀមរាប ​បណ្តាល​ឲ្យ​មនុស្ស​ជាង​១០​នាក់​រង​របួស​ធ្ងន់​និង​ស្រាល។​

បើ​តាម​អនុក្រឹត្យ​ស្តីពី​លក្ខខណ្ឌ​និង​វិធាន​ការ​នានា​ស្តីពី​ការ​បង្ការ​ និង​ការ​ពន្លត់​អគ្គីភ័យ​ចេញ​ផ្សាយ​កាល​ពី​ឆ្នាំ​២០១៧​ មាន​ការ​ហាម​ឃាត់​ការ​ជក់​បារី ​ដុត​សំរាម ​ប្រើប្រាស់​ភ្លើង ​ទូរស័ព្ទ​ដៃ ​ឬ​ វត្ថុ​ផ្សេងៗ​ ដែល​អាច​ប្រតិកម្ម​បង្កើត​បាន​ជា​ប្រភព​ភ្លើង​និង​ប្រភព​កម្តៅ ​នៅ​ក្បែរ​គោល​ដៅ​ស្តុក​វត្ថុ​ធាតុ​ងាយ​ឆេះ​និង​ងាយ​ផ្ទុះ​ឆេះ។​ អនុក្រឹត្យ​នោះ​ ក៏​មាន​ការ​ហាម​យក​លំនៅដ្ឋាន​ធ្វើ​ជា​ឃ្លាំង​ស្តុក​សារ​ធាតុ​ងាយ​ឆេះ​និង​ងាយ​ផ្ទុះ​ឆេះ។​

លោក ​អំ សំអាត​ នាយក​រង​ទទួល​បន្ទុក​ឃ្លាំ​មើល​សិទ្ធិ​មនុស្ស​នៃ​អង្គការ​លីកាដូ ​មាន​ប្រសាសន៍​ថា​ ករណី​ផ្ទុះ​ហ្គាស​ចុង​ក្រោយ​សម្លាប់​មនុស្ស​នេះ​ បង្ហាញ​ថា​ កម្ពុជា​ស្ថិត​នៅ​ក្នុង​ហានិភ័យ​ខ្ពស់​នៃ​ការ​ប្រើប្រាស់​លក់​ដូរ​ហ្គាស ​ ខណៈ​ការ​ប្រើប្រាស់​ និង​ការ​ចែកចាយ​ហ្គាស​នៅ​កម្ពុជា​មាន​ច្រើន ​ប៉ុន្តែ​មិន​ទាន់​មាន​ច្បាប់​ទាក់​ទង​នឹង​ការ​ត្រួត​ពិនិត្យ​កន្លែង​លក់​ហ្គាស​ឲ្យ​បាន​ត្រឹម​ត្រូវទេ។​

លោក​មាន​ប្រសាសន៍​ថា៖​ «គិត​ថា ​ប្រសិន​បើ​យើង​មិន​មាន​វិធាន​ការ​គ្រប់គ្រង​ឲ្យ​បាន​ត្រឹម​ត្រូវ​ទេ ​ អា​ហានិភ័យ​នឹង​ខ្ពស់​ និង​អាច​បន្ត​ច្រើន​ទៅ​ទៀត»។​

ផ្ទះលក់ហ្គាស ខ្យល់អ៊ីដ្រូសែននិងថ្មស្អុយ ស្ថិតតាមបណ្តាយផ្លូវលេខ៦៣ សង្កាត់បឹងរាំង ខណ្ឌដូនពេញ រាជធានីភ្នំពេញ បានផ្ទុះហ្គាស សម្លាប់មនុស្ស៤នាក់ កាលពីថ្ងៃទី១៨ ខែកក្កដា ឆ្នាំ២០២០។ (ស៊ុន ណារិន/វីអូអេ)
ផ្ទះលក់ហ្គាស ខ្យល់អ៊ីដ្រូសែននិងថ្មស្អុយ ស្ថិតតាមបណ្តាយផ្លូវលេខ៦៣ សង្កាត់បឹងរាំង ខណ្ឌដូនពេញ រាជធានីភ្នំពេញ បានផ្ទុះហ្គាស សម្លាប់មនុស្ស៤នាក់ កាលពីថ្ងៃទី១៨ ខែកក្កដា ឆ្នាំ២០២០។ (ស៊ុន ណារិន/វីអូអេ)

លោក​បន្ត​ថា​ ប្រជា​ពលរដ្ឋ​កម្ពុជា​ជា​ច្រើន​ដែល​ប្រើប្រាស់​ហ្គាស​ ក៏​មិន​ទាន់​យល់​ដឹង​អំពី​របៀប​នៃ​ការ​ប្រើប្រាស់​ប្រកប​ដោយ​សុវត្ថិភាព​នៅ​ឡើយ​ទេ។ ​ លោក​បញ្ជាក់​ថា៖ ​«ខ្ញុំ​យល់​ថា​ រាល់​ថ្ងៃ​នេះ​ ប្រជា​ពលរដ្ឋ​ខ្មែរ​មិន​ទាន់​យល់​ដឹង​អំពី​ការ​ប្រើប្រាស់​ឲ្យ​បាន​ត្រឹម​ត្រូវ​ទាក់ទង​នឹង​បញ្ហា​ហ្គាស​នេះ ​ហើយ​នឹង​វិធានការ​និង​សុវត្ថិភាព​នៃ​ការ​ប្រើប្រាស់​ឲ្យ​បាន​ត្រឹម​ត្រូវ​នៅ​ឡើយ។​អ៊ីចឹង​ខ្ញុំ​គិត​ថា​ រដ្ឋាភិបាល​គួរ​មាន​វិធានការ​ឲ្យ​បាន​ហ្មត់ចត់​ដើម្បី​ចៀសវាង​ហានិភ័យ​កាន់​តែ​ខ្ពស់​បន្ត​ទៅ​ទៀត»។​

លោក​ ជៀប សួរ​ អគ្គនាយក​នៃ​អគ្គ​នាយកដ្ឋាន​ប្រេងកាត​ ដែល​ទទួល​បន្ទុក​ក្នុង​ការ​គ្រប់គ្រង​ហ្គាស​នេះ​ដែរ​ បដិសេធ​មិន​ឆ្លើយ​តប​ភ្លាមៗ ​ដោយ​តម្រូវ​ឲ្យ​ VOA ​ដាក់​លិខិត​ទៅ​ក្រសួង​រ៉ែ ​និង​ថាមពល​ដើម្បី​សុំ​ការ​ឆ្លើយ​តប។​

កាល​ពី​ខែ​មីនា ​ឆ្នាំ​២០២០ ​ក្រសួង​រ៉ែ​និង​ថាមពល​ បាន​ចេញ​ផ្សាយ​វីដេអូ​ទាក់ទង​នឹង​សុវត្ថិភាព​នៃ​ការ​ទុក​ដាក់​ប្រើ​ប្រាស់​ហ្គាស ​ក្នុង​នោះ​មាន​ការ​ត្រួត​ពិនិត្យ​កំប៉ុង​ថ្មី​ មិន​ច្រេះ​ស៊ី ​ឬ​ ក្រពឹត ​កុំ​ដាក់​ហ្គាស​ឲ្យ​ត្រូវ​កម្តៅ​ថ្ងៃ​និង​ដាក់​ឲ្យ​ឆ្ងាយ​ពី​វត្ថុ​ងាយ​ឆេះ​ជាដើម។​

នៅ​ព្រឹក​ថ្ងៃ​ច័ន្ទ​នេះ ​ លោក​ ស ថេត ​ស្នងការ​នគរបាល​រាជធានី​ភ្នំពេញ​ បើក​កិច្ច​ប្រជុំ​មួយ​ដោយ​ណែនាំ​ដល់​ការិយាល័យ​បង្ការ​អគ្គីភ័យ ​ត្រូវ​បង្កើន​ការ​ចុះ​ណែនាំ​អប់រំ​ជា​ប្រចាំ​ដល់​អ្នក​ប្រកប​មុខ​របរ​ ដែល​ងាយ​រង​គ្រោះ​ដូច​ជា​ស្ថានីយ​លក់​ប្រេង ​ទីតាំង​លក់និ​ង​បញ្ចូល​ហ្គាស ​ជា​ពិសេស​ទីតាំង​ដែល​ងាយ​រង​គ្រោះ​ផ្សេងៗ​ទៀត ​ហើយ​កន្លែង​រក​ស៊ី​ទាំង​អស់​នោះ គួរ​តែ​មាន​បំពង់​ពន្លត់​អគ្គីភ័យ ​ដើម្បី​ត្រៀម​ជួយ​សង្គ្រោះ​បឋម ​ក្នុង​ករណី​ដែល​មាន​អគ្គីភ័យ​កើត​ឡើង​ជាយថាហេតុ៕

តួលេខនៃករណីឆ្លងជំងឺកូវីដ១៩

XS
SM
MD
LG