មនុស្សយ៉ាងហោចណាស់ក៏៥៨នាក់ដែរឥឡូវនេះបានបញ្ជាក់ថាស្លាប់បន្ទាប់ពីការរញ្ជួយដីដ៏ធំមួយបានកើតមានឡើងនៅតំបន់ភាគខាងត្បូងប្រទេសម៉ិចស៊ិច កាលពីយប់ថ្ងៃព្រហស្បតិ៍ នេះបើតាមការបញ្ជាក់របស់អភិបាលរដ្ឋ Oaxaca កាលពីថ្ងៃព្រហស្បតិ៍។
លោក Alejandro Murat អភិបាលរដ្ឋបានប្រាប់ពួកអ្នកយកព័ត៌មានថា មនុស្ស១៧នាក់នៃមនុស្សទាំងនោះបានបញ្ជាក់ថាស្លាប់មកពីទីក្រុង Juchitan ដែលស្ថិតនៅតំបន់ភាគអាគ្នេយ៍នៃប្រទេសម៉ិចស៊ិច។
ពួកអាជ្ញាធរបាននិយាយថា ចំនួនមនុស្សស្លាប់ទំនងនឹងបន្តឡើងខ្ពស់នៅពេលដែលគេទទួលបានព័ត៌មានកាន់តែច្រើនឡើងទៀត។
ការរញ្ជួផែនដីដែលមានកម្លាំងដ៏ខ្លាំងរហូត៨,២រិចទ័របានកើតមានឡើងនៅឆ្នេរមហាសមុទ្រប៉ាស៊ីហ្វិកភាគខាងត្បូងនៃប្រទេសម៉ិចសិចមុនពាក់កណ្តាលយប់ថ្ងៃព្រហស្បតិ៍ ដែលស្ថិតនៅចម្ងាយប្រហែល១០០គីឡូម៉ែត្រពីទីក្រុង Tonala។ លោកប្រធានាធិបតីនៃប្រទេសម៉ិចស៊ិចបានមានប្រសាសន៍ថា វាជាការរំជួយដីដ៏ធំបង្អស់ដែលប្រទេសនោះបានជួយនៅក្នុងរយៈពេលជាង១០០ឆ្នាំ។
លោក Enrique Pena Nieto ប្រធានាធិបតីនៃប្រទេសម៉ិចស៊ិចបាននិយាយកាលពីថ្ងៃសុក្រថា ការរញ្ជួផែនដីបានធ្វើឲ្យផ្ទះដួលរលំនៅក្នុងរដ្ឋ Chiapasភាគខាងត្បូង ហើយថាវាមានកម្លាំងខ្លាំងជាងការរំជួយផែនដីនៅឆ្នាំ១៩៨៥នៅក្នុងប្រទេសដែលបានសម្លាប់មនុស្សរាប់ពាន់នាក់។
លោកប្រធានាធិបតីបានមានប្រសាសន៍ថា៖ «វាជាការរំជួយផែនដីក្នុងទំហំធំនិងខ្លាំងបំផុតនៅក្នុងរយៈពេល១០០ឆ្នាំ»។
ការរញ្ជួយផែនដីនេះបានបណ្តាលឲ្យមានរលកយក្សស៊ូណាមីដែលមានកម្លាំង១.០ នេះបើយោងតាមមជ្ឈមណ្ឌលការព្រមានរលកយក្សស៊ូណាមីនៅមហាសមុទ្រប៉ាស៊ីហ្វិក។ មិនមានការអះអាងភ្លាមៗពីការបំផ្លិចបំផ្លាញដែលបណ្តាលមកពីរលកយក្សស៊ូណាមីទេ៕
