លោកនាយករដ្ឋមន្ត្រីអង់គ្លេស Boris Johnson បានប្រកាសដោយមានទំនុកចិត្តកាលពីមួយឆ្នាំមុននេះថា«គេមិនអាចរិះគន់រាជាធិបតេយ្យបានទេ»។ ក្នុងសប្តាហ៍ទីពីរនៃខែមីនា នៅក្រោយមានការរិះគន់ខ្លាំងដោយព្រះអង្គម្ចាស់ Harry និងអ្នកម្នាង Meghan អំពីរាជវង្ស មេដឹកនាំអង់គ្លេសរូបនេះហាក់ដូចជាមិនសូវអះអាងដូចមុនទេ។
លោក Johnson បាននិយាយប្រាប់ពួកអ្នកកាសែតកាលពីពាក់កណ្តាលសប្តាហ៍នោះថា លោកមាន«ការគោរពខ្ពង់ខ្ពស់ណាស់»ដល់ព្រះមហាក្សត្រិយានី Elizabeth តែលោកមិនធ្វើអត្ថាធិប្បាយអំពីបញ្ហាឯទៀតៗនៃរាជវង្សទេ។ នេះជាគោលជំហរមួយដែលពួករដ្ឋមន្ត្រីជាន់ខ្ពស់ក្នុងគណៈរដ្ឋមន្ត្រីលោកបានប្រកាន់យកនៅក្រោយបទសម្ភាសន៍ពីរម៉ោងរបស់ព្រះអង្គម្ចាស់ Harry និងអ្នកម្នាង Meghan ជាមួយអ្នកស្រី Oprah Winfrey សេដ្ឋីបណ្តាញផ្សាយព័ត៌មាន ដែលមានការផ្សព្វផ្សាយច្រើន ក្នុងនោះមានការលើកឡើងអំពីបញ្ហាប្រកាន់ពូជសាសន៍និងអំណាចរាជវង្ស។
លោក Johnson បាននិយាយប្រាប់ពួកសមាជិកសភាថា «នៅពេលមានបញ្ហាទាក់ទងនឹងរាជវង្សជាការល្អដែលនាយករដ្ឋមន្ត្រីមិនត្រូវនិយាយអ្វីទាំងអស់ ហើយគ្មានអ្វីនិយាយជាអ្វីដែលខ្ញុំត្រូវនិយាយ»។
ជនជាតិអង់គ្លេសឯទៀតៗមិនសូវប្រយ័ត្នប្រយែងក្នុងប្រតិកម្មរបស់ពួកគេចំពោះបទសម្ភាសន៍នោះដែលនៅក្នុងនោះអ្នកម្នាង Meghan ដែលជាជនជាតិអាមេរិកាំងនិងជាអតីតតារាបានចោទប្រកាន់ថាមានសមាជិកម្នាក់នៃរាជវង្សអង់គ្លេសដែលមិនត្រូវបានបញ្ចេញឈ្មោះបានសម្តែង«កង្វល់»អំពីពណ៌សម្បុរស្បែកកូនទីមួយរបស់គូស្វាមីភរិយានេះឈ្មោះ Archie នៅមុនប្រសូត។
អ្នកម្នាង Meghan ក៏បានអះអាងដែរថា ជីវិតមានទុក្ខព្រួយរបស់អ្នកម្នាងក្នុងរាជវង្សអង់គ្លេសបាននាំឱ្យអ្នកម្នាងចង់ធ្វើអត្តឃាត រហូតដល់ពេលគូស្វាមីភរិយានេះដកខ្លូនចេញពីរាជកាតព្វកិច្ចហើយមករស់នៅក្នុងស.រ.អា.។
អ្នកម្នាង Meghan បាននិយាយអះអាងថា សមាជិករាជវង្សមិនសូវរាក់ទាក់ហើយ មិនអើពើអំពីសុខភាពផ្លូវចិត្តរបស់អ្នកម្នាងដែលចុះខ្សោយ ហើយមិនបានជួយដល់ការអង្វរកររបស់អ្នកម្នាងសុំជំនួយវេជ្ជសាស្ត្រទេ។ ព្រះអង្គម្ចាស់ Harry បានមានបន្ទូលថា រាជវង្សរបស់ទ្រង់មិនបាននិយាយអ្វីជាសាធារណៈប្រឆាំងនឹងអ្វីដែលទ្រង់ឃើញថា ជាការរាយការណ៍បែបប្រកាន់ពូជសាសន៍នៅក្នុងកាសែតខ្នាតតូចក្នុងចក្រភពអង់គ្លេសទេ។
ការខ្វែងគំនិតគ្នារវាងមនុស្សជំនាន់ផ្សេងគ្នា
បទសម្ភាសន៍នេះបាននាំឱ្យប្រជារាស្ត្រអង់គ្លេសខ្វែងគំនិតគ្នាតាមខ្សែបន្ទាត់នយោបាយនិងប្រជាសាស្ត្រដូចការចាកចេញរបស់អង់គ្លេសពីសហភាពអឺរ៉ុបដែរ ដែលហាក់ដូចជាសង្គ្រាមវប្បធ៌មអំពីអត្តសញ្ញាណមុខមាត់និងប្រពៃណីអង់គ្លេស។
ចាប់តាំងពីការផ្សាយបទសម្ភាសន៍នោះមក ការស្ទង់មតិបង្ហាញថាក្រុមមនុស្សអាយុច្រើនជាង៥៥ឆ្នាំគាំទ្ររាជវង្សហើយមានការសង្ស័យថាការលើកឡើងរបស់អ្នកម្នាង Meghan ដើម្បីបង្ហាញថា ខ្លួនជាស្ត្រីគ្មានទោសពៃរ៍និងជាជនរងគ្រោះម្នាក់នៃរាជវង្សចិត្តអាក្រក់។
ជនជាតិអង់គ្លេសវ័យក្មេង ជាពិសេសពួកជនអាយុជាង២០ឆ្នាំមានទំនោរច្រើនជឿការអះអាងដោយព្រះអង្គម្ចាស់ Harry និងអ្នកម្នាង Meghan អំពីទំនាក់ទំនងមិនកក់ក្តៅជាមួយរាជវង្សហើយក៏មានសមានចិត្តដល់ការនិយាយអះអាងដោយអ្នកម្នាង Meghan អំពីការប្រកាន់ពូជសាសន៍ផងដែរ។ ពួកគេយល់ឃើញថា ការប្រព្រឹត្តទៅលើអ្នកម្នាងនេះជាការឆ្លុះបញ្ចាំងអំពីប្រទេសមួយដែលមានការរើសអើងខ្លាំង។
ការស្ទង់មតិដោយ YouGov បង្ហាញថា ភាគច្រើននៃពួកមនុស្សអាយុលើសពី៦៥ឆ្នាំមានជំនឿថា រាជវង្សបានរាប់រកគូស្វាមីភរិយានេះ ដោយយុត្តិធម៌ ចំណែកឯ៦១%នៃក្រុមជនអាយុចន្លោះ១៨ឆ្នាំនិង២៤ឆ្នាំជឿថា ព្រះអង្គម្ចាស់ Harry និងអ្នកម្នាង Meghan មិនបានទទួលការរាប់រកយុត្តិធម៌ទេ។
ពួកអ្នកបោះឆ្នោតអភិរក្សនិយមទំនងជាលម្អៀងទៅខាងរាជវាំង Buckingham។ ក្រុមអ្នកគាំទ្រគណបក្សពលករនិងប្រជាធិបតេយ្យសេរីនិយមលម្អៀងទៅខាងព្រះអង្គម្ចាស់ Harry និងអ្នកម្នាង Meghan។
ពួកមន្ត្រីរាជវាំង Buckingham មានការស្រួលចិត្តខ្លះ នៅក្នុងការស្ទង់មតិមួយទៀតដោយកាសែត Daily Mail នៅក្រោយការផ្សាយបទសម្ភាសន៍នេះដែលថាជនជាតិអង់គ្លេសភាគច្រើនយល់ថាព្រះអង្គម្ចាស់ Harry និងអ្នកម្នាង Meghan ធ្វើខុសដោយបានផ្តល់បទសម្ភាសន៍ដែលកេងចំណេញហើយថា គូស្វាមីភរិយានេះបានធ្វើឱ្យព្រះមហាក្សត្រិយានីស្រងាកព្រះទ័យ ហើយគួរត្រូវដករាជឋានៈពួកគេផងដែរ។
ក៏ប៉ុន្តែការស្ទង់មតិនេះក៏បានបង្ហាញដែរថា បទសម្ភាសន៍នោះប្រហែលធ្វើឱ្យខូចព្រះនាមមហាក្សត្រីយានីនៅពេលប្រជាប្រិយភាពព្រះអង្គកំពុងធ្លាក់ចុះ។
ពួកអ្នកធ្វើបទអត្ថាធិប្បាយអំពីរាជវង្សអង់គ្លេសនិយាយថាការខ្វែងគំនិតគ្នារវាងមនុស្សជំនាន់ផ្សេងគ្នាអំពីបទសម្ភាសន៍នោះនាំឱ្យយល់ថា អាចមានបញ្ហាសម្រាប់ព្រះរជ្ជទាយាទគឺព្រះអង្គម្ចាស់ Charles ដែលនឹងត្រូវភ្ជាប់ទំនាក់ទំនងរបស់ព្រះអង្គជាថ្មីជាមួយប្រជារាស្ត្រវ័យក្មេងប្រសិនបើត្រូវធ្វើឱ្យមានភាពប្រាកដប្រជាសម្រាប់អនាគតនៃរាជាធិបតេយ្យ។
លោក Daniel Finkelstein ដែលជាអ្នកសរសេរអត្ថបទចុះក្នុងសារព័ត៌មាន The Times បាននិយាយថា នេះជា«ឧបសគ្គច្បាស់លាស់មួយសម្រាប់ទ្រង់នៅពេលនេះ»។
ពួកអ្នកធ្វើបទអធិប្បាយខ្លះដែលមានសមានចិត្តចំពោះព្រះអង្គម្ចាស់ Harry និងអ្នកម្នាង Meghan ហើយនឹងប្រជារាស្ត្រអង់គ្លេសវ័យក្មេងនិយាយថា រាជវង្សបាត់បង់ឱកាសមួយក្នុងការការពាររាជាធិបតេយ្យក្នុងពេលអនាគតដោយប្រើលក្ខណៈទាន់សម័យនិងមានភាពជឿនលឿនរបស់គូស្វាមីភរិយានេះដើម្បីជួយដល់អន្តរកាលបន្តពូជពង្សនៃស្ថាប័ននេះពីព្រះមហាក្សត្រិយានី Elizabeth ព្រះជន្ម៩៤ព្រះវស្សាទៅព្រះអង្គម្ចាស់ Charles និងបន្តទៅព្រះរាជបុត្រាច្បងរបស់ទ្រង់គឺព្រះអង្គម្ចាស់ William។
ចាប់តាំងពីមានការផ្សាយបទសម្ភាសន៍នោះមកបណ្តាញសង្គម កាសែតនិងស្ថានីយ៍វិទ្យុនិងទូរទស្សន៍ត្រូវគ្របដណ្តប់ដោយការជជែកដេញដោលគ្នា ដែលជួនកាលនិយាយហួសប្រមាណអំពីព្រះអង្គម្ចាស់ Harry និងអ្នកម្នាង Meghan និងរាជវង្ស។
វោហារសាស្ត្រខ្លាំងក្លាបាននាំឱ្យបាត់បង់ការងារមួយខាងបណ្តាញព័ត៌មានដោយសារលោក Piers Morgan អ្នកចាត់ចែងកម្មវិធីទូរទស្សន៍ «Good Morning Britain» ឈប់ធ្វើការ បន្ទាប់ពីអ្នកមើលកម្មវិធី៤ម៉ឺននាក់ត្អូញត្អែរអំពីវោហារសាស្ត្ររបស់លោកមិនទទួលស្គាល់ការចោទប្រកាន់របស់អ្នកម្នាង Meghan ដែលលោកបានហៅថាជា«ការនិយាយរិះគន់ផ្តេសផ្តាស»។
ការឆ្លើយតបរបស់រាជវាំង
រាជវាំងBuckingham បានព្យាយាមបញ្ចៀសការបង្កើនកំហឹងថែមទៀតដោយចេញផ្សាយសេចក្តីថ្លែងការណ៍មួយមានបីវគ្គដែលគូសបញ្ជាក់ថារាជវង្សនៅតែស្រឡាញ់ព្រះអង្គម្ចាស់ Harry និងអ្នកម្នាង Meghan និងកូនប្រុសរបស់ពួកគេតទៅទៀតហើយមានទុក្ខព្រួយដោយបានដឹងអំពីភាពអត់ធន់របស់អ្នកម្នាង Meghan ដូចដែលបានលើកឡើង។
សេចក្តីថ្លែងការណ៍នេះក៏បានចែងដែរថា រាជវង្សប្រុងប្រៀបដោះស្រាយបញ្ហាដែលត្រូវលើកឡើងក្នុងបទសម្ភាសន៍នេះជាបញ្ហាឯកជនដោយមានរួមបញ្ចូលការរើសអើងពូជសាសន៍ផងដែរ។
សេចក្តីថ្លែងការណ៍នេះក៏បានបង្ហើបបន្តិច ដោយកត់សម្គាល់ថា«ការចងចាំខ្លះអាចខុសគ្នា»រវាងការចងចាំរបស់រាជវង្សនិងការចងចាំរបស់គូស្វាមីភរិយាដែលមានទុក្ខ។
លោក Rhiannon Mills អ្នកធ្វើអត្ថាធិប្បាយអំពីរាជវង្សបាននិយាយប្រាប់អ្នកមើលទូរទស្សន៍ Sky News ថា សេចក្តីថ្លែងការណ៍នេះជា«ការប៉ុនប៉ងមួយដើម្បីបញ្ឈប់ការជជែកដេញដោលសាធារណៈ»។
អ្នកវិភាគឯទៀតៗនិយាយថា រាជវាំងហាក់ដូចជាប្តេជ្ញាបញ្ចៀសកុំឱ្យមានជាថ្មីទៀតនូវអ្វីដែលហៅថា«សង្គ្រាមខ្លី»ដូចរឿងរ៉ាវរវាងមាតាបិតារបស់ព្រះអង្គម្ចាស់ Harry គឺព្រះអង្គម្ចាស់ Charles និងអ្នកម្នាង Diana នៅក្រោយលែងលះគ្នា។ព្រះអង្គម្ចាស់ Charles និងអ្នកម្នាង Diana ព្រមទាំងពួកបុគ្គលិករបស់ពួកគេបានធ្វើឱ្យ លេចចេញការចោទប្រកាន់ប្រកបដោយពឹសពុលប្រឆាំងគ្នាដើម្បីបំភ្លៃសេចក្តីរាយការណ៍របស់កាសែតដើម្បីផលប្រយោជន៍របស់ពួកគេអំពីការរស់នៅបែកគ្នានិងការលែងលះគ្នាយ៉ាងជូរចត់។
កាលពីថ្ងៃព្រហស្បតិ៍ទី១១មីនានៅក្នុងការឆ្លើយតបនឹងសំណួរស្រែកសួរមួយអំឡុងព្រះរាជទស្សនកិច្ចមួយ ព្រះអង្គម្ចាស់ William បានច្រានចោលការចោទដែលថា រាជវង្សរើសអើងពូជសាសន៍។ ព្រះអង្គម្ចាស់ក៏បានមានបន្ទូលដែរថា ទ្រង់មិនទាន់បានមានបន្ទូលជាមួយអង្គម្ចាស់ Harry ដែលជាព្រះអនុជនៅឡើយទេ តែថាទ្រង់នឹងមានបន្ទូលជាមួយព្រះអនុជ។
គេនៅមិនទាន់ដឹងទេថាតើសេចក្តីថ្លែងការណ៍នេះរបស់រាជវាំងBuckingham នឹងបន្ថយការប្តេជ្ញារបស់ពួកជនដែលប្រុងប្រៀបធ្វើសង្គ្រាមវប្បធម៌អំពីជម្លោះក្នុងរាជវង្សឬបែបណាទេ៕
ប្រែសម្រួលដោយលោកឈឹម សុមេធ
